Teunga Lelei Taha ki he Sāpaté ʻi Palāsila
“Tauhi ʻa e ʻaho Sāpaté ke fakamāʻoniʻoniʻi ia” (Teutalōnome 5:12).
ʻOku ʻikai pē ha taimi momoko ia ʻi Mainasi Silaisi ʻi Palāsila. Ko e faʻahitaʻu pē aí ʻa e taimi laʻalaaá mo e taimi ʻuhá. Ko ha feituʻu ʻoku lava pē ke vela mo ngaʻungaʻu hono ʻeá! Kuo ʻiloʻi ʻe he fānau Palaimeli ʻi he Kolo ko Koniseilo Lafaieté ʻa e ngaahi tāpuaki ko ia ʻoku maʻu mei hono tui honau teunga lelei taha ki he Sāpaté, neongo ʻene fuʻu vela ʻa e ʻeá.
Naʻe palesiteni ʻa Sisitā Petulisa ta Kositā ʻi he Palaimelí pea kamata ke ne hohaʻa koeʻuhi ko e teunga naʻe tui ange ki he Palaimelí. ʻOkú ne pehē, “ʻOku faingataʻa ke tui ʻe he fānaú honau vala lelei taha ki he Sāpaté koeʻuhí ko ʻene fuʻu velá. ʻIkai ko ia pē, ka naʻe ʻikai ke mahuʻinga ia ki ha taha ki muʻa. Neongo naʻe hangē ʻoku ʻikai mahuʻinga ʻa e teunga lelei ia ki he lotú, ka naʻe ʻiloʻi ʻe Sisitā Kositā ʻe tokoni ia ke fakahā ʻe he fānau Palaimelí ʻa ʻenau fakaʻapaʻapa ki he Tamai Hēvaní. ʻE fokotuʻu ai ʻe he fānaú ha ngaahi ʻulungāanga lelei ki he kahaʻú.
Naʻe fokotuʻu ʻe he Palaimelí haʻanau ngaahi taumuʻa. Naʻe ʻave ʻe he ngaahi fāmilí ha ngaahi vala lelei ki he Sāpaté maʻá e fānau ko ia naʻe ʻikai te nau maʻu iá. Naʻe aʻu ki heʻenau fai ha “fakaʻaliʻali” ʻi he Palaimelí ke fakaʻaliʻali ʻa e teunga naʻe totonu ke tui ʻi he ʻaho Sāpaté.
Naʻe ʻikai ke faingofua ka naʻa nau aʻusia ʻenau taumuʻá. ʻOku pehē ʻe Sisitā Kositā, “ʻI he ʻaho naʻe fai ai e polokalama sākalamēniti ʻa e Palaimelí, naʻe teunga taau ʻa e tokotaha kotoa pē. Ko ha meʻa fakaʻofoʻofa moʻoni ia!”
Kuo fakatokangaʻi ʻe ha kāingalotu tokolahi ʻo e koló ʻa e liliu ko ʻení. ʻOku loto-ʻapasia ange ʻa e fānaú, pea ko e taimi ní ʻoku nau tui pē ʻe kinautolu ʻa e teunga lelei ʻi he ʻaho Sāpaté taʻe toe talaange ʻe heʻenau mātuʻá. Pea naʻe maʻu foki mo ha tāpuaki taʻe ʻamanekina ʻe taha ʻi he toe foki mai ha ngaahi mātuʻa māmālohi ki he lotú ko e tupu mei he ngaahi tā sīpinga ʻa ʻenau fānaú.