Ko e Meʻa ʻOku ou Saiʻia Taha Ai ʻi he ʻAlu ki he Lotú
Ne u maʻu meʻatokoni efiafi mo hoku husepānití mo homa ngaahi kaungāmeʻa ki muí ni mai pē. Ne mafuli ʻemau talanoá ki he meʻa fakalotú pea naʻe kamata leva ke talamai ʻe ha tokotaha māmālohi ʻi he Siasí ʻa hono ʻuhinga ʻoku ʻikai moʻoni ai e Siasí.
Lolotonga e fakamatala ʻa e tangatá ni naʻe kamata ke ne lea mālohi, fakafili mo ʻita. Ne u tangatu pē ʻo fakafanongo lolotonga e taimi kotoa ko ʻení. Ne u ongoʻi te u tangi he kamatá, ka ne faifai peá u ʻita ʻo u loto ke u lau ki ai. Neongo ia, ne fakahā kiate au ʻe he kihiʻi leʻo siʻí ke u fakalongolongo pē.
Ne toki tuku pē lauʻikovi ʻa homa kaumeʻá ʻi he ʻosi ʻemau maʻu meʻatokoní pea totongí. Naʻá ne kiʻi fakalongolongo leva ʻo hangē haʻane tatali ke u fakafepakiʻi ʻene fakamatalá. Ne u kiʻi tangutu taimi siʻi ʻo lotulotu fakalongolongo pē. Hili iá ne u pehē ange ʻi ha leʻo vaivai, “ʻOkú ke ʻiloʻi e meʻa ʻoku ou saiʻia taha ai ʻi he ʻalu ki he lotú he ʻaho Sāpaté? Ko e sākalamēnití. ʻOku ou maʻu ai ʻa e faingamālie ke punou fakalongolongo hoku ʻulú ʻo lotu ki he Tamai Hēvaní. ʻOku ou fakahā kiate Ia ʻa e ngaahi founga ne mei lava ke kehe ai ʻeku fakahoko e ngaahi meʻa ʻo e uike kuo ʻosí peá u feinga ke ʻiloʻi ha founga ke fakaleleiʻi ʻaki ia.”
Hili iá ne u toe pehē ange, “ʻOku ou fakakaukau ki he kakai kotoa pē ne u feinga ke tokoni ki ai he uike kuo hilí, peá u kole ki he Tamai Hēvaní ke tokoniʻi au ke u ʻilo mo ha toe kakai tokolahi ange ke u tokoniʻi he uike hoko maí. ʻOku ou fakamālō ʻi heʻeku maʻu ha taimi lolotonga ʻa e sākalamēnití ʻi he uike taki taha ke fai ai ʻeni peá u moʻuiʻaki ʻa e lelei taha te u ala lavá.”
Ne sio fakalongolongo mai pē homa kaumeʻá kiate au. Ne mau hū ki tuʻa mei he falekaí ʻo lue ki he kaá. Ne u ʻeke ange leva ki ai pe naʻá ne manatuʻi e ʻū tohi maʻuʻanga tokoni ʻi he funga laupapa hoku ʻapí. Naʻá ne manatuʻi. Naʻá ku talaange naʻe ʻikai te u toe lau ʻe au ha tohi pehē ʻe taha talu ʻeku kau ki he Siasí. Ne u talaange ko e tohi pē ʻe taha naʻá ku maʻu mei ai ʻeku ngaahi talí ko e Tohi ʻa Molomoná.
Hili ha ngaahi ʻaho mei ai naʻá ne telefoni mai ʻo kole fakamolemole.
Ko e faleʻi ʻeni ʻa Molonai kiate kitautolú, “Haʻu kia Kalaisi … pea ʻofa ki he ʻOtuá ʻaki homou iví, ʻatamaí, mo e mālohi kotoa pē” (Molonai 10:32). ʻI heʻeku feinga ke muimui ʻi he faleʻi ko iá, ne toe lahi ange ʻeku ʻofa ki he fānau ʻa e ʻOtuá—pea aʻu pē kiate kinautolu ʻoku nau feinga ke hoko ko hoku filí.