Pōpoaki ʻa e Faiako ʻAʻahí

ʻOku Faʻu ʻa e Tangata Kotoa pē ʻi he Tatau ʻo e ʻOtuá

Akoʻi ʻa e ngaahi potu folofola mo e ngaahi lea ʻokú ne feau lelei taha e fie maʻu ʻa e kau fefine ʻokú ke ʻaʻahi ki aí. Fakamoʻoni ʻo kau ki he tokāteliné. Fakaafeʻi e niʻihi ʻokú ke akoʻí ke nau vahevahe atu ʻa e ongo ʻoku nau maʻú mo e meʻa kuo nau akó.

Ko e Hā ʻOku Tau ʻIlo ʻo Kau ki hono “Fakatupu Kitautolu ʻi he Tatau ʻo e ʻOtuá?”

Mōsese 2:27: “Ko au ko e ʻOtuá naʻá ku ngaohi ʻa e tangatá ʻi hoku ʻīmisi ʻoʻokú, naʻá ku ngaohi ia ʻi he ʻīmisi ʻo hoku ʻAlo pē Taha naʻe Fakatupú; naʻá ku ngaohi ʻa kinaua ko e tangata mo e fefine.”

Palesiteni Kōtoni B. Hingikelī (1910–2008): “ʻOku toputapu hotau sinó. [Naʻe faʻu ia ʻi he tatau ʻo e ʻOtuá. ʻOku fakaofo ia pea ko e fakatupu fungani taha ia ʻa e ʻOtuá. Kuo ʻikai ha meʻafaitā te ne lava ʻo fakatataua e fakaofo ʻo e mata ʻo e tangatá. Kuo ʻikai ha pamu kuo langa, ʻe lōloa ʻene lelé mo ne fai ha fatongia mamafa pehē ʻo hangē ko e mafu ʻo e tangatá. ʻOku hoko ha mana ʻi he telingá mo e ʻutó… . ʻI hono fakatahaʻi ʻo e ngaahi konga ko ʻení mo ha ngaahi konga kehekehe ʻo hotau sinó, ʻokú ne fakafofongaʻi mai ʻa e poto fakalangi mo fakaleveleva ʻo e ʻOtuá” (“Ke Mou Maʻa,” Tūhulu, Siulai 1996, 54).

Palesiteni Tōmasi S. Monisoni: “ʻOku maʻu ʻe he ʻOtua ko ʻetau Tamaí, ha telinga ke Ne fanongo ʻaki ki heʻetau ngaahi lotú. ʻOkú Ne maʻu ha fofonga ke Ne ʻafio mai ʻaki ki heʻetau ngaahi ngāué. ʻOkú Ne maʻu ha ngutu ke folofola mai ʻaki kiate kitautolu. ʻOkú Ne maʻu ha mafu ke Ne ongoʻi manavaʻofa mo ʻofa mai ai kiate kitautolu. ʻOkú Ne moʻui. Ko ʻEne fānau kitautolu naʻe faʻu ʻi hono tataú. ʻOku tau fōtunga tatau mo Ia pea ʻokú Ne fōtunga tatau mo kitautolu” (“I Know That My Redeemer Lives,” Tambuli, Apr. 1988, 6).

Ko e Hā ha Founga ʻOku Hanga ai Heʻeku ʻIloʻi Naʻe Fakatupu au ʻi he Tatau ʻo e ʻOtuá, ʻo Fakatupu ha Liliu ʻi Heʻeku Moʻuí?

ʻEletā Likuleni Lisiate (1886–1983) ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tokolahi ha kakai ʻoku nau fakakaukau ko honau sinó ko ha koloa pē ia ʻanautolu pea te nau faʻiteliha ki ai ʻo fakatatau mo honau lotó, ka ʻoku fakamahinoʻi lelei mai ʻe Paula ʻoku ʻikai ʻanautolu ia, he naʻe fakatau ʻa kinautolu ʻaki ha totongi, pea kapau ʻe maumauʻi ʻe ha taha ʻa e faletapu ʻo e ʻOtuá, ʻe maumauʻi ia ʻe he ʻOtuá; he ko e faletapu ʻo e ʻOtuá ʻoku māʻoniʻoni, pea ko e faletapu ko iá ʻa kimoutolu’ [1 Kolinitō 3:17]” (A Marvelous Work and a Wonder, rev. ed. [1966], 380).

ʻEletā Siosefa B. Uefilini ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku totonu ke tau feinga ke ‘ʻilo … [ʻa e] ʻOtua pē tahá mo Sīsū Kalaisi ʻa ia naʻá ke fekaú’ (Sione 17:3). ‘… ʻOku ʻuhinga ke ʻiloʻi ʻa e ʻOtuá, ke tau fakakaukau hangē ko Iá, ongoʻi ʻa e meʻa ʻokú Ne ongoʻí mo maʻu ʻa e mālohi ʻokú Ne maʻú, pea mahino kiate kitautolu ʻa e meʻa ʻoku mahino kiate Iá pea mo fai ʻa e meʻa ʻokú Ne fakahokó. Ko kinautolu ʻoku nau ʻiloʻi ʻa e ʻOtuá, ʻoku nau hoko ʻo hangē ko Iá pea nau maʻu e faʻahinga moʻui ʻokú Ne maʻú, ʻa ia ko e moʻui taʻengatá.’ … Naʻá Ne fakahinohinoʻi ʻEne kau ākonga Nīfaí ʻo pehē: ʻKo e hā ʻa e anga ʻoku taau mo kimoutolú? Ko e moʻoni ʻoku ou pehē kiate kimoutolu, ke mou hangē pē ko aú’ (3 Nīfai 27:27)” (“Our Lord and Savior,” Ensign, Nov. 1993, 7).

Sūsana W. Tena, palesiteni lahi kimuʻa ʻo e Kau Finemuí: “Kuo ʻi ai nai ha taimi naʻe fakamanatu ai ai ʻe hoʻo faʻeé pe tamaí kiate koe ke ke ‘manatuʻi … ko e fānau koe ʻa e ʻOtuá pea kuo pau ke ke ngāue ʻo fakatatau ki ai’ ʻOku tui ʻe he kau faifekaú ha pine, ke fakamanatu ange kiate kinautolu ke … nau teunga taau mo molumalu, anga fakaʻapaʻapa ki he kakaí pea faifeinga ke maʻu e ʻīmisi ʻo Kalaisí ʻi honau fofongá… . Kuo tau fai foki ha fuakava ʻo toʻo kiate kitautolu e huafa ʻo Kalaisí. ʻOku totonu ke tohitongi ʻi hotau lotó Hono huafá. Ko ia, ʻoku fie maʻu ai ke taau ʻetau tōʻongá mo e fānau ʻa e Tamai Hēvaní, ʻa ia kuó Ne ʻomi kitautolu ki he māmaní mo ha akonaki, ʻManatuʻi ko hai koe!’” (“Ngaahi ʻOfefine ʻo e Tamai Hēvaní,” Liahona, Mē 2007, 107).

Ke ako lahi ange, vakai ki he Siope 7:17; T&F 110:2–3; Siosefa Sāmita—Hisitōliá 1:17.