Taimi Feʻinasiʻakí
Te u Lava ʻo Hoko Ko ha Faifekau ʻi he Taimí ni
“Pea kapau te mo … ‘omi, ‘a e foʻi laumālie ʻe toko taha pē kiate au, hono ʻikai ke lahi pehē fau ʻa hoʻomo fiefia” (T&F 18:15).
Ko ha faifekau maʻongoʻonga e ʻAposetolo ko Paulá. Naʻá ne pehē, “He ʻoku ʻikai te u mā ʻi he ongoongolelei ʻo Kalaisí” (Loma 1:16). Naʻe fononga ʻa Paula ki ha ngaahi feituʻu lahi ke vahevahe atu e ongoongoleleí. Naʻá ne fiefia ʻi hono vahevahe ʻo e ongoongoleleí mo hono tokoniʻi e kakaí ke nau fiefiá.
Ko e tehina ko ia ʻo Siosefa Sāmita ko Samuelá, ko e fuofua faifekau ia ʻi he ngaahi ʻaho kimui ní. Talu mei ai kuo laka hake ʻi he toko taha milioná ha kau tangata mo e kau fefine kuo nau ngāue fakafaifekau. Ko e faifekau kotoa pē, hangē pē ko Samuela Sāmita mo Paulá, ʻokú ne maʻu ha fakamoʻoni ki he ongoongoleleí peá ne fie vahevahe ia mo e niʻihi kehé.
Naʻe pehē ʻe Palesiteni Tevita O. Makei (1873–1970), “Ko e mēmipa kotoa pē ko e faifekau.”1 ʻOku ʻuhinga iá te ke lava ʻo hoko ko e faifekau ʻi he taimí ni! ʻI hoʻo vahevahe atu ʻa e ongoongolelei ki he niʻihi kehé, te ne fakamanatu kiate koe ʻa hoʻo fuakava ʻi he papitaisó ke ke manatu maʻu ai pē kia Sīsū Kalaisi. Manatuʻi e ngaahi lea ko ʻení:
ʻOku ou fie hoko ko ha faifekau.
He ʻikai ke u tali pē ke u fuʻu lahi.
Te u moʻui ʻi he ʻaho takitaha ki he lelei taha ʻeku ʻiló,
Pea te nau vakai ʻoku ʻi ai haʻaku fakamoʻoni pē ʻaʻaku
Haʻaku fakamoʻoni pē ʻaʻaku.2
ʻEkitivitī
Toʻo ʻa e peesi K4. Kosi ʻa e falé mo e matapā sioʻata ʻe nimá. Fakapipiki ʻa e matapā sioʻata takitaha ki he ngaahi laine ʻo e matapā sioʻata ʻi he ʻapi ʻoku vahevahe ai e ongoongoleleí. Talanoa mo ho fāmilí ki he ngaahi fakakaukau ʻi he ʻapí. Fakapapauʻi fakataha ko e hā te mou lava ʻo fai ke mou hoko ko e kau faifekau ʻi he taimi ní. Fokotuʻu ʻa e ʻapi ʻoku vahevahe ai e ongoongoleleí ʻi ha feituʻu ʻe lava ke sio kotoa ki ai e fāmilí.
Ngaahi Fakakaukau ki he Taimi Feʻinasiʻakí
-
Tātānaki mai ha ngaahi meʻa ki ha fanga kiʻi ngāue faingofua ʻa ia ʻe fie maʻu ki ai ha teuteu ke lava ʻo fakakakato. (Hangē ko ʻení, ngāué: fufulu ipu—ʻe lava ke kau ʻi he meʻa ko ʻení ʻa e koa mo e konga meʻa holo ipu; ngāué: feimeʻatokoni—ʻe lava ke kau heni ha fakahinohino mo ha ngaahi meʻa ke ngaohi ʻaki ha meʻatokoni.) Teuteu ha kiʻi tangai ʻoku faʻo ai ha fanga kiʻi ngāue kehekehe maʻá e kalasi takitaha. Kole ki he kalasí ke nau fakaava e tangaí, fakapapauʻi ʻa e ngāue ʻoku fie maʻu ke fakakakató, pea fakamatalaʻi ʻa e mahuʻinga ʻo e meʻa takitaha ki hono fakakakato e ngāué. Fakaafeʻi e kalasi takitaha ke nau vahevahe ia mo e Palaimelí. Fakamatalaʻi ange ʻoku hangē pē ʻetau fie maʻu ha ngaahi meʻa ke teuteu ke fai ha ngāué, mo hono fie maʻu ke tau fakahoko ha ngaahi meʻa pau ke tau mateuteu ai ke hoko ko ha faifekau leleí. Fokotuʻu ʻa e Ngaahi Fakatātā ʻo e Ongoongoleleí fika 605 (Ko ha Kiʻi Tamasiʻi ʻoku Lotu) mo e fika 617 (Fekumi ki he Ngaahi Folofolá) ki he palakipoé, pea tohi ʻi lalo ai, “Te u teuteu ke u hoko ko ha faifekau ʻaki haʻaku lotu mo lau fakaʻaho e folofolá.” Kole ange ki he fānaú ke nau vahevahe atu ʻa e founga ʻe lava ʻe hono moʻuiʻaki e tefitoʻi moʻoni ko ʻení, ʻo teuteuʻi kinautolu ke nau hoko ko ha kau faifekaú. Fakamatalaʻi fakanounou ʻa e talanoa kia ʻAlamā ko e Siʻí mo e ngaahi foha ʻo Mōsaiá. Tokoni ki he fānaú ke nau kumi hake e ʻAlamā 17:2–3, pea nau lau fakataha. Laineʻi ʻa e ngaahi foʻi lea “kuo nau fakatotolo faivelenga ʻi he ngaahi folofolá, koeʻuhí ke nau ʻiloʻi ʻa e folofola ʻa e ʻOtuá.” Fai ha fakamoʻoni ki he mālohi ʻo e lotú mo e ako fakaʻaho e folofolá mo e founga ʻe lava ke nau teuteuʻi ai kinautolu ke nau hoko ko ha kau faifekaú.
-
Tohi ʻi ha faʻoʻanga meʻa ʻa e “Faivelenga mo e Talangofua.” Teuteu ha fanga kiʻi talanoa kau ki he tuí mo e talangofuá maʻá e fānau īkí mo kinautolu ʻoku nau lalahi haké fakatouʻosi. (Vakai, ‘Oku ‘Ikai Ha Ui ‘e Mahuʻinga Ange ‘i he Faiakó [1999], 198). Kamata ʻa e taimi feʻinasiʻakí ʻaki hano tohi ʻi he palakipoé ʻa e “Te u teuteu ke u hoko ko ha faifekau ʻaki ʻeku faivelenga mo talangofua.” Lau fakataha ia mo e fānaú. Fakaafeʻi ha kiʻi tamasiʻi ke ne fili ha foʻi talanoa. Tuku ki he kiʻi tamasiʻí pe ko e kalasí ke ne fakahā ʻa e meʻa ke faí. Fakamahino kiate kinautolu ko ʻenau talí ʻe fie maʻu ki ai e tuí mo e talangofuá pea tuku ki he kiʻi tamasiʻí ke ne faʻo ha fanga kiʻi meʻa iiki (hangē ko e piini pe ko e makamaka) ki he faʻoʻanga meʻá. Hili hono fai e kiʻi talanoa takitaha, hivaʻi e veesi, “Te u faitotonu; Muimui ki ai mo tala ʻene moʻoní” mei he “Ko e Siasi ʻo Sīsū Kalaisí” (Tohi Hiva ʻa e Fānaú, 48). Ko e lea ko ia “Tala ʻene moʻoní” ʻoku ʻuhinga ia te tau hoko ko ha kau faifekau. Hokohoko atu kae ʻoua ke fonu e kiʻi kapá.