Ko e Paʻanga ʻa ha Kiʻi Tamasiʻi
Naʻá ku kei fakakaukau mo hoku hoa faifekaú ki he feituʻu te ma ʻaʻahi ki aí mo ʻema fakatokangaʻi atu ha fefine ʻoku hū ki ha ʻapi. Naʻá ma fakapapauʻi ko ʻene foki mai ki ʻapi ke teuteuʻi e kai hoʻataá he kuo kamata tuku ngāue ʻa e kakai he tukui kolo ofi ki Puenosi ʻAealisi ʻi ʻAsenitiná ki he maʻu meʻatokoní mo mālōlō hoʻatā. Taimi siʻi pē mei ai naʻe akoʻi ʻe hoku hoá ki he fefiné ni ʻa e tefitoʻi moʻoni ʻo e ongoongoleleí, peá u fakamoʻoni ki hono moʻoní. Naʻe fiefia lahi ʻa Naite ʻi heʻema pōpoakí, peá ne fakaafeʻi kimaua ke ma foki ange ʻi he uike hono hokó.
ʻI heʻema aʻu atu ki he ʻapi ʻo Naité, ne ʻosi tangutu pē ʻene fānau ʻe toko nimá he veʻe tēpilé ʻo talitali mai. Naʻe ʻikai ha ngāue maʻuʻanga moʻui pau ʻa ha taha ʻi he ongo mātuʻá, pea naʻe ongo moʻoni ia ki homa lotó ʻi heʻema ʻilo ko e mālō pē siʻenau moʻui. Naʻe ʻikai ha faliki ʻo e fale masivá ni pe paipa vai pea naʻe avaava e papa ne tukiʻaki e holisi ʻo e falé. Naʻa nau mūmū pē mei ha kiʻi sitou mata taha.
Neongo e tuʻunga masivesiva naʻe ʻi ai e fāmilí, naʻa nau koloaʻia ʻi heʻenau feinga ke ʻilo ʻo lahiange ki he ʻOtuá. Naʻe saiʻia ʻa Naite ʻi he Tohi Tapú pea naʻá ne ako ia peá ne fakaʻamu ke maʻu ʻe heʻene fānaú e fakavaʻe tatau. Ne saiʻia ʻaupito e tamasiʻi taʻu 12 ko Kilisitiení, he fanongo ki he ngaahi lēsoni ʻa e kau faifekaú. Hili ʻema foaki atu ha tatau ʻo e Tohi ʻa Molomoná maʻá e fāmilí, naʻá ne lau loto vēkeveke e ngaahi ʻuluaki tohí. Naʻe fie ʻilo foki mo e husepāniti ʻo Naité ka naʻá ne ongoʻi mā pea naʻá ne fakafanongo mai pē mei he loki mohé.
Koeʻuhí ko e tuʻunga fakapaʻanga naʻa nau ʻi aí, naʻá ma momou ke akoʻi kiate kinautolu e fono ʻo e ʻaukaí mo e vahehongofulú. Naʻá ma fakaʻamu ke nau maʻu ha fakamoʻoni mālohi kia Sīsū Kalaisi mo e ongoongolelei kuo toe Fakafoki maí, kimuʻa peá ma toki fakahokoange e ngaahi tefitoʻi moʻoni ʻe fie maʻu ai ha tui ʻoku lahi angé. Ka koeʻuhí ne ʻosi kamata lau ʻe he fānau matuʻotuʻá e Tohi ʻa Molomoná mo maʻu lotu, naʻe ʻi ai haʻanau ngaahi fehuʻi naʻe fie maʻu ke ma tali.
Naʻe pehē ʻe Kalisitiane, “Sisitā, ʻoku talanoa e tokotaha kotoa pē ʻi he lotú pea ʻi he Tohi ʻa Molomoná ʻo fekaʻuaki mo e ʻaukaí. Ko e hā e ʻuhinga ʻo e ʻaukaí?” Naʻá ma akoʻi peá ma fakamoʻoni ki he mahuʻinga ʻo e ʻaukaí mo lotu loto fakalongolongo pē ke tali ʻe he fāmilí ʻa e fekaú ni.
Naʻe toki vahevahe mai ki mui ʻe Kalisitiane ʻene fakamoʻoní kiate kimaua ʻo pehē: “ʻI ha ʻaho ʻe taha naʻe ʻomai ʻe heʻeku faʻeé ha sēniti ke fakatau ʻaki ha lole. Lolotonga ʻeku ʻalu ki he falekoloá naʻá ku manatuʻi hoʻomo lēsoni fekauʻaki mo e ʻaukaí pea naʻá ku fie maʻu ke ʻahiʻahiʻi ia. Ka naʻá ku maʻu pē ha sēniti ʻe 20. Naʻá ku pehē ke u ʻaukai pē pea fakaʻaongaʻi ʻa e sēniti ʻe 20 ko ʻeku foaki ʻaukai.”
Naʻe ʻikai poupouʻi ʻe Naite ʻa Kalisitiane ke ne totongi ha kiʻi sēniti siʻisiʻi, ka naʻá ne kei loto lahi pe ke totongi ia. Naʻá ne fie maʻu ke talangofua ki he ngaahi fekau kotoa pē ʻa e ʻOtuá pea foaki ha meʻa pē te ne malavá. Hili ha ngaahi uike siʻi mei ai, naʻá ne papitaiso mo ha toko ua kehe ʻi he fānaú. Naʻe kau mai ʻene ongomātuʻá ki he Siasí ʻi he taʻu hono hokó.
Ko e taimi pē ʻoku ou fakakaukau ai he ʻikai ke u lava ʻo totongi ʻeku foaki ʻaukaí, ʻoku ou manatuʻi ʻa Kalisitiane mo ʻene tui mateakí peá u ʻiloʻi ʻoku huluʻānoa e meʻa te u lava ʻo foakí. ʻOku fakamanatu mai ʻe heʻene foakí, ʻa e kiʻi paʻanga siʻi ʻa e uītoú (vakai, Maʻake 12:42–44). Naʻe hā ko ha kiʻi meʻa siʻi ka naʻe foaki ia ʻe Kalisitiane koeʻuhí ko ʻene ʻofa moʻoni ʻi he ʻOtuá mo ʻene fie talangofua.