NGAAHI ONGOONGO NOUNOU MEI MĀMANI

Tuʻasila he ʻInitanetí ʻOku Fakatefito ʻAtaʻatā Pē ki he Fakamoʻuí

Naʻe kamata hā ʻi he ʻaho 25 ʻo Fēpuelí, 2008, ha Uepisaiti foʻou ko e JesusChrist.lds.org, maʻanautolu ʻoku lea faka-Pilitāniá, pea ʻoku ʻi ai e palani ke maʻu ʻeni ʻi ha ngaahi lea fakafonua kehe ʻi he kahaʻú.

Ko kinautolu ʻe hū ki he tuʻasila ko ʻení te nau maʻu ai ha ngaahi fakamatala mo ha ngaahi fakatātā kau ki he Fakamoʻuí, pea ʻe fakatefito ia ʻi ha kaveinga ʻe tolu: ko e tui kia Sīsū Kalaisí, ʻEne moʻuí mo ʻEne ngāué, mo e ngaahi fakamoʻoni kau kiate Iá.

ʻE ʻilo ʻe kinautolu ʻe hū ki he tuʻasilá ʻa e ngaahi nāunau hangē ko e mūsika, ʻata mei ha ngaahi vitiō pea te nau lava foki ke maʻu ai mo ha fakahinohino ki ha ngaahi maʻuʻanga tokoni kehe fekauʻaki mo ia.

Pekia ʻa Lute Fausi

Naʻe pekia ʻa Lute Laiti Fausi, taʻu 86, ʻi he ʻaho 10 ʻo Fēpueli 2008 ko e taʻu motuʻa pē, hili ia ha māhina ʻe ono mei he pekia ʻa hono husepānití, Palesiteni Sēmisi E. Fausi (1920–2007), ʻa ē naʻe kau ʻi he Kau Palesitenisī ʻUluakí, pea naʻe ʻi ai pē mo hono fāmilí. Naʻe mali e ongomātuʻá ʻi he ʻaho 21 ʻo ʻEpeleli 1943, ʻi ai ʻena fānau ʻe toko 5, makapuna ʻe toko 25, mo e makapuna ua ʻe toko 28. Naʻe uiuiʻi ʻa Sisitā Fausi ki ha ngaahi fatongia lahi, kau ai ʻene hoko ko ha palesiteni Fineʻofa ʻi he uōtí mo e siteikí, pea naʻá ne fononga takai ʻi māmani mo hono husepānití ʻo tupu ai ʻena ʻofa ʻi he kāingalotu mei he ngaahi fonua lahi.

Maʻu e Ngaahi Tohitufa Fekauʻaki mo e Mateuteú ʻi he Lea Fakafonua ʻe 33

ʻOku lava ke maʻu atu he taimí ni ha ngaahi tohitufa ko e All is Safely Gathered In ʻi ha lea fakafonua ʻe 33, pea ʻoku ʻi ai ha ngaahi pōpoaki fekauʻaki mo hono tauhi ʻo e meʻakaí ʻi ʻapí mo e ngaahi meʻa fakapaʻanga ʻa e fāmilí. ʻE lava ke maʻu atu ʻa e ngaahi tohitufá mei he kau taki lakanga fakataulaʻeiki fakalotofonuá, pea ʻoku lava foki ke maʻu ia ʻi ha lea fakafonua ʻe 24 ʻi he tuʻasila ʻInitaneti ko e ProvidentLiving.org. Lomiʻi he Family Home Storage pe Family Finances ʻi he tafaʻaki toʻohema ʻo e pēsí. Hili ko iá pea lomiʻi ʻi he Family Home Storage Pamphlet pe Family Finances Pamphlet ʻi he tafaʻaki fakatoʻomataʻu ʻo e pēsí. ʻOsi ko iá peá ke fili leva ʻa e lea fakafonua ʻokú ke fie maʻú.

Kamata ʻe he Siasí ʻa e Tuʻasila ʻInitaneti maʻa Lativia

Kuo kamata ʻe he Siasí ha tuʻasila ʻInitaneti pe Uepisaiti maʻanautolu ʻi Lativiá. ʻE maʻu ʻi he tuʻasila ko ʻení ʻa e ngaahi ongoongo ʻo e Siasí mo e ngaahi fakamatala ʻoku fakatefito pē maʻa Lativia pea ʻe hoko ia ko e Tuʻasila ʻInitaneti ʻo e Siasí ʻi he fonuá. ʻE ʻomi ʻe he tuʻasila ʻInitaneti maʻa Lativiá ʻa hono fakakātoa ʻo e ngaahi tuʻasila ʻInitaneti ʻa e Siasí ʻi he ngaahi lea fakafonua kehekehé ki he 63. ʻOku maʻu ʻa e lea fakafonua takitaha ʻi he tuʻasila ʻInitaneti ko e LDS.org (lomiʻi ʻi he Languages, hili ko iá pea lomiʻi ʻi he Country Sites).