Ko e Feinga ke Hangē ko Sīsuú
ʻAukai Fakafāmili
“Ko ia ʻoku muimui ʻiate aú, ʻe ʻikai ʻalu ia ʻi he poʻulí, ka ʻe ʻiate ia ʻa e māma ʻo e moʻuí” (Sione 8:12).
ʻI he ngaahi taʻu siʻi kuo hilí, naʻe fili ai homau fāmilí ke fakahoko ha ʻaukai makehe maʻá e niʻihi ne uesia ʻe ha fakatamaki ʻi ha fonua mamaʻo. Naʻá ku fokotuʻu ko e taimi ʻe vete ai e ʻaukaí, pea ʻave ʻemau sēniti naʻe tānaki ʻi he foʻi hiná, ki he paʻanga tokoni ʻofa fakaetangata ʻa e Siasí. Naʻe ʻi ai ha ongo foʻi hina naʻe tānaki ki ai ʻemau sēniti maká. Ko e tahá, ko e hina ʻo e anga fakaʻapaʻapá, pea ko e taimi kotoa pē ʻoku fai ai ha ngāue tokoni pe ngāue lelei ʻe ha taha ʻoku ou faʻo ha sēniti ki he foʻi hina ko iá. ʻI he ʻosi ʻa e taʻú, ʻoku mau angaʻaki hono fakaʻaongaʻi e sēniti he foʻi hina ko ʻení, ki ha ʻekitivitī fakafiefia ʻa e fāmilí. Ko e foʻi hina leva hono uá, ko e hina anga taʻe fakaʻapaʻapá ia, pea ko e taimi kotoa pē ʻoku ʻita pe fakatupu kē ai ha taha, ʻoku faʻo ʻe he tokotaha ko iá ha sēniti ki he hina ʻo e anga taʻe fakaʻapaʻapá. Ko e sēniti ʻi he hina ko ʻení ʻoku foaki ia ki he fānau faingataʻaʻiá.
ʻI he taimi naʻe kamata ai ʻemau ʻaukaí, naʻe kamata ai pē ʻemau lau ʻemau sēniti maká. Naʻe ʻalu ʻa Lēnati, taʻu 9, ʻo ʻomai ʻene sēniti pē ʻaʻana mei heʻene meʻa tānakiʻanga sēnití. Naʻá ne ʻomai kotoa ʻene sēnití mo e niʻihi ʻo ʻene ngaahi meʻa vaʻingá peá ne pehē ʻokú ne loto ke foaki kotoa ia. Naʻe ʻomai foki ʻe Maliana, taʻu 12, ʻene sēnití ʻo tānaki atu ki ai. Neongo naʻe siʻi e sēniti ne maʻu ʻe he fānaú ka ko e meʻa pē ia ne nau maʻú.
Ko e ʻaukaí mo hono foaki ʻena hina sēnití, ko ha feilaulau ia kia Lēnati mo Maliana. Ka ʻi heʻena foaki ʻena sēniti naʻe fakahaofí, naʻá ku ʻiloʻi ʻokú na ʻofa moʻoni ki he fānau faingataʻaʻia ʻa e Tamai Hēvaní ʻoku ʻi he ngaahi feituʻu kehe ʻo e māmaní.