ʻI he Malumalu ʻo Hono Kapakaú.
Hili ʻeku lavaʻi ʻa e ngaahi tefitoʻi fakahinohino fekauʻaki mo e puna vakapuná ʻi Fīniki, ʻi ʻAlesoná, naʻe maʻu ai haʻaku laiseni hili pē ʻeku puna tokotaha ʻi ha ngaahi houa siʻi kae lava ke u puna tokotaha fakavahaʻa-siteiti. ʻE kau foki heni ha puna houa ʻe ua mei Fīniki ki Tūsoni pea toe foki pē ki Fīniki.
ʻI heʻeku fiefia ke puna tokotaha ʻi he māʻolunga ko e fute 10,000 (3,000 m) mei he funga māmaní pea vakai hifo ki he fakaʻofoʻofa e ngaahi ʻaó, moʻungá, teleʻá mo e toafá, naʻe siʻisiʻi ke u fakakaukau ki he siʻi e taukei ne u maʻú, pehē ki ha ngaahi fakatamaki ʻe ala hoko.
Naʻá ku vakaiʻi e tuʻu ʻa e ʻeá, fakafonu mo ʻeku palani puná pea teuteu mo ha lētiō, kāpasa mo e ngaahi meʻangāue puna anga mahení. Hangē pē ko ia ʻoku anga maheniʻaki ʻi he akoako puná, naʻe kei siʻi ʻeku ʻilo ki hono ngāueʻaki e ngaahi meʻangāue fakaonopōní. Ka ko e vakapuna motuʻa naʻe ʻai ke u puna aí, naʻe ʻikai ha meʻangāue ia ai ʻe lava e pailaté ʻo puna taʻe te ne sio takai ki he funga ʻo e fonuá.
Naʻá ku kiʻi manavasiʻi he ʻai ke u mavahe tokotaha hake ʻi he kiʻi vakapuna engeenga mīsini taha mo tapili taha ko ʻení, ka naʻe lelei ʻaupito e puna ia mei Fīniki ki Tūsoní. Naʻá ku fiefia ʻaupito ʻi he taukei foʻou ne u aʻusiá.
Naʻá ku fiefia pea mo ongoʻi nonga he naʻe toe pē ha maile ʻe 120 (kilomita 190) peá u aʻu, he naʻá ku mavahe mei Tūsoni ki Fīnikí kuo malu efiafi. ʻI heʻeku mavahe siʻí pē, ne hoko mai ha matangi mālohi ʻo faingataʻa ai ke u puleʻi ʻa e māʻolunga ne ʻi ai e vakapuná. Naʻe kāpui au ʻe ha tuʻoni matangi efu, pea naʻe ʻikai te u lava ke sio. Naʻe liaki takai holo au pea ʻikai te u kei lava ke mapuleʻi e vakapuná pea naʻe kamata ke u manavasiʻi pea mole mo e fakakaukau leleí, ʻi he mahino kiate au kuó u ʻi ha tuʻunga fakatuʻutāmaki he kuó u ofi ki he ʻotu moʻunga Kataliná.
ʻI heʻeku manavaheé, naʻá ku fakakaukau ai ki heʻeku moʻuí. Naʻá ku ʻosi fakamaʻu ke mali ʻi he māhina hokó ʻi he Temipale Mesa ʻi ʻAlesoná. Ne u lavaʻi lelei e ngāue fakafaifekaú. Naʻá ku feinga maʻu pē ke u tauhi e ngaahi fekaú pea fakafanongo ki he ngaahi ueʻi ʻa e Laumālie Māʻoniʻoní. Kapau naʻe ʻi ai ha taimi ne u fie maʻu ai ha tataki fakalangi, ko e taimí ʻeni. ʻI he meimei mole e ʻamanakí, naʻá ku lotu fakalongolongo pē. Naʻe vave e fanafana mai ʻa e Laumālié, “Falala ki hoʻo lētioó, kāpasá pea mo hoʻo ngaahi nāunau puná peá ke hifo ke maʻulalo ange.”
Naʻe tuai-e-kemo ʻeku hifo ʻaki ha ngaahi fute ʻe laui ngeau. Naʻe ʻikai pē te u lava ʻo sio lelei, ka naʻe lava ke u fakatokangaʻi hifo ha hala lahi mo ha halanga lēlue. ʻI heʻeku fakaʻaongaʻi ʻeku ngaahi meʻa ngāué pea muimui ki he fakaʻilonga naʻe ʻasi hake mei he fonuá, naʻá ku malava ʻo tūʻuta ki he malaʻe vakapuna ʻi Fīnikí hili ia haʻaku faingataʻaʻia moʻoni ha houa ʻe ua.
Te u houngaʻia maʻu pē ʻi he ngaahi ueʻi ʻa e Laumālie Māʻoniʻoní pea mo e talaʻofa ʻi he tohi Sāmé: “Pea te u hūfanga ‘i he malu ‘o ho kapakaú” (Saame 57:1).