Fakahā ‘o e Ngaahi Polokalama Fekau‘aki mo e Temipale Panamā Sití

Kuo fakahā ʻe he Kau Palesitenisī ʻUluakí ʻa e ngaahi ʻaho ke fakahoko ai ʻa e ʻoupeni hausi mo hono fakatapui ʻo e Temipale Panamā Sití, ʻa ia ko e temipale ʻaki ia hono 127 ʻoku lolotonga ngāueʻaki ʻi māmani kātoá.

Ko e ʻuluaki temipale ʻeni ke tuʻu ʻi Panamā, pea ʻe fakaʻatā ia ki he kakaí ʻi he ʻaho 11 ʻo Siulai 2008, pea ʻe kei ʻatā ai pē ʻo aʻu ki he ʻaho 26 ʻo Siulaí, tuku kehe ʻa e ngaahi ʻaho Sāpaté. ʻE fai ʻa e polokalama fakafonua ʻi he ʻaho 9 ʻo ʻAokosí ki muʻa pea fakahoko e ngaahi sēsini fakatapui ʻe fā kuo fakataimi-tēpileʻi ki he ʻaho Sāpate, ko hono 10 ʻo ʻAokosí. ʻE fakaava e temipalé ki hono fakahoko ʻo e ngaahi ouaú ʻi he ʻaho Mōnite ko hono 11 ʻo ʻAokosí.

Naʻe kamata e langá ʻi ʻOkatopa ʻo e 2005 hili hono tāpuakiʻi ʻo e kelekelé ʻe ʻEletā Sipenisā V. Sōnasi ʻo e Kau Fitungofulú ʻi heʻene kei hoko ko e Palesiteni ʻo e ʻĒlia ʻAmelika Lotolotó. Naʻe fakahā hono langa ʻo e temipalé ʻi ʻAokosi ʻo e 2002. ʻOku feʻunga mo e kāingalotu ʻe toko 22,000 ʻi he ngaahi siteiki ʻe fitu mo e ngaahi vahefonua ko ia ʻe tolu ʻi Panamaá.