Ko ha Samēlia mo ha Sikulūtulaiva
Naʻá ku femoʻuekina ʻi hono fakamāʻopoʻopo ʻeku nāunaú hili haʻaku akoʻi ha kalasi Maeameiti pea ʻi mui ʻi he lokí ʻa hoku husepāniti, ko Keuli, ʻo fuofua ʻema kiʻi tamasiʻi taʻu tahá. Ne moulu atu homa kiʻi foha taʻu tolu ko Siakí ki he holo ne feʻefiʻefihi ai e kāingalotú, ʻo muimui ʻi ha tokotaha ki he ngaahi matapā ʻo e falelotú. Ne fuoloa peá ma toki fakatokangaʻi ʻene puliá he naʻá ku pehē ʻoku ʻi hoku husepānití peá ne pehē ʻokú ne ʻiate au.
ʻI heʻema fakatokangaʻi kuo puliá, naʻe ʻasi hake ʻa Siaki ʻi he tafaʻaki ʻe taha ʻo e holó. Ka naʻe ʻi ai ha meʻa naʻe ngali kehe. Naʻe kula hono ongo kouʻahé pea ʻalu noa pē mo hono loʻimatá peá ne kuku hono nima toʻomataʻú. Naʻe taki mai ia ʻe heʻemau pīsopé pea naʻá ne mataʻi taʻefiemālie. Ne u ongoʻi halaia. Naʻe lavea homa fohá pea naʻe ʻikai te u ofi ʻi ai ke u tokoni kiate ia.
Naʻe fanongo e pīsopé ki heʻene tangí peá ne fakavavevave atu ʻo tokoni ki ai. Naʻe mahino e meʻa ne hoko kia Siakí, ka naʻe ʻikai mahino ʻa e tokoni ʻe fakahokó. Naʻe mūsia hono nimá ʻi he vahaʻa ʻo e matapā lahi ki tuʻá. Naʻe tatau pē hono tāpuni pe fakaava e matapaá, he naʻe toe kovi ai e laveá ʻi hono fakaava lahi e matapaá, he naʻe toe fakangūsiaʻi lahiange ai hono kiʻi louhiʻi nimá pea toe fusi atu hono nimá ʻo toe lahi ange ai ʻene mamahiʻiá.
ʻI he feinga ko ia ʻa e pīsopé mo ha ongomātuʻa, ki ha founga ʻe lava ke homo mai e ngaahi louhiʻi nima ʻo Siakí, naʻe fakatokangaʻi mai ʻe ha tangata mei ha uooti ʻe taha ʻoku nau lotu ʻi he falelotu tatau, ʻa e meʻa naʻe hokó. Naʻá ne toʻo hake ha sikulutulaiva mei hono kató, ʻo ne fakahū ʻi he vahaʻa ʻo e matapaá mo e ʻesiá. Naʻá ne fakaʻaongaʻi ʻa e sikulūtulaivá ke faʻai ʻa e kiʻi foʻi avá ʻo lahi feʻunga ke homo mai ʻa e nima ʻo Siakí.
Lolotonga e ngaahi talanoa fiefiá, naʻe fakamatala mai kiate au ʻe he tangata ko ʻení ʻi heʻene teuteu ko ia ki he ngaahi fakatahaʻanga ʻo e pongipongi Sāpaté, naʻá ne ongoʻi ha ueʻi makehe ke ne haʻu ki he lotú mo ha sikulūtulaiva. Naʻe fuʻu mālohi mo mahino ʻa e ongo ko ʻení pea naʻá ne faʻo ʻa e sikulūtulaivá ʻi he kato hono talausese lotú.
Ko e faʻahinga ngāue ʻofa pehení ne tupu ia mei ha ueʻi fakalaumālie, pea naʻe ongo moʻoni ia ki hoku lotó peá ne fakafonu hoku lotó ʻaki e fakamālō. Naʻe maluʻi ʻe he Tamai Hēvaní hoku foha taʻu tolú, peá ne ueʻi ha tangata lelei ke ne fai ha tokoni.