Ko e Fakapulipuli ki ha ʻApi Fiefiá
Uouangatahá, ongoongoleleí mo e fiefia fakafāmilí—ko e fanga kiʻi fakapulipuli ia ʻoku fakaʻaongaʻi ʻe he fāmili Suēteni ko ʻení ke hoko ko ha tuʻunga moʻui ʻo e ʻofá.
ʻOkú ke ʻā hake ki ha hiva leʻolahi mo fakafiefia ʻoku ongo mai mei he loki kaí. ʻOku fakanatula pē hoʻo ongoʻi puputuʻu pea mahalo pē ko ha taha he ongo meʻá ni ʻoku hokó: (1) “Ko hoku kiʻi tuofefiné ʻokú ne kumi kūkisi he loki kaí” pe (2) “Ko e fale hala ʻeni ʻoku ou ʻi aí.” Ka ʻo kapau ko ha mēmipa koe ʻo e fāmili Lonitelí mei Kavilini ʻi Suetení, ta ʻoku ʻikai ko haʻo puputuʻu. Ko hono moʻoní, ʻokú ke ʻamanaki fiefia mai ki ai he uike taki taha—ʻo ʻikai ki he hivá, ka ko e meʻa ʻoku ui ʻe he fāmilí ko e “maʻu meʻatokoni pongipongi ʻa e hōtelé.”
“ʻOku ou saiʻia he kai pongipongi he ʻaho Tokonakí,” ko ʻIsapela Loniteli taʻu 14 ia, ʻi hono fehuʻi ange pe ko e hā ha niʻihi ʻo e ngaahi meʻa fakafiefia taha fekauʻaki mo hono fāmilí. “ʻOku teuteuʻi maʻu pē ia ʻe he tangataʻeikí, pea ʻokú ne ʻai ke tōtōatu ia.” ʻOku tali ʻio loto vekeveke kotoa ki ai ʻa e toenga ʻo e fānau Lonitelí, he ʻoku tui pehē monautolu.
Naʻe pehē ʻe ʻEnitulia taʻu 16, “ʻOku mau ʻā hake ki he hiva ʻa e tangataʻeikí.” ʻOku loto fiemālie ha niʻihi hono ngaahi tuongaʻané mo e tokouá ke nau fakatātaaʻi ia pea ʻoku nau kakato kotoa ai, ʻo kau ai mo e ongo mātuʻá, ko Pelenofi mo Kilisitina. ʻOku lahi ʻaupito e kakatá ʻi he ʻapi ʻo e fāmili Lonitelí. ʻOku hoko atu leva ʻenau fakamatalá ki he hili ko ia e hivá, ʻoku hanga ʻe he namulelei ʻo e pēkaní mo e foʻi moá ʻo tohoakiʻi mai kinautolu mei honau mohengá he pongipongi Tokonaki kotoa pē. Makehe mei heʻenau vahevahe ʻa e meʻakaí, ʻoku nau fiefia pē kinautolu he feohi fakatahá.
ʻOku nau talanoa foki ki ha founga kehe ʻi heʻenau fakapulipuli ki ha ʻapi fiefiá—ʻa e efiafi fakafāmili ʻi ʻapí. Ka naʻe ʻikai ke pehē maʻu pē. Naʻe lea pē ʻa Kulisitofā taʻu 18, mo ne toutou fakasio ki heʻene faʻeé, ʻo ne pehē, “ʻOku ou manatuʻi e taimi naʻe faʻa hoko ai ʻemau efiafi fakafāmilí ko ha lēsoni lōloa peé.”
Naʻe tānaki mai ʻe ʻEnitulia, ʻa ia ne kei taʻu nima he taimi ko iá, “Taimi ʻe niʻihi kuó u taʻeoliʻia au peá u tō hifo au ʻo mohe. Ka te u ʻā hake pē mo e taimi ke fai ai e sapa maʻamaʻá.”
Naʻe fakamatala ʻa Misa Loniteli ʻo pehē ko e taimi naʻe kei siʻi ai ʻa e fānaú, naʻe faʻa teuteu maʻu pē ʻe Sisitā Loniteli ʻa e lēsoni naʻe laka hake he houa ʻe tahá hono lōloá. Naʻe faingataʻa pea fuʻu māʻuloloa ʻa e lēsoní ki he fānau īkí. ʻOku ʻi ai ha fānau ʻe toko valu he taimí ni ʻa e ongomātuʻa Lonitelí, ʻo kamata mei he taʻu 8 ki he taʻu 23—ko e lahi tahá ko Lepeka, kuó ne ngāue fakafaifekau pea ʻoku lolotonga ako ʻunivēsiti ʻi he ʻIunaiteti Siteití.
Naʻe pehē leva ʻe Misa mo Sisitā Loniteli ke liliu ʻena founga efiafi fakafāmili ʻi ʻapí. Naʻe pehē ʻe Sisitā Loniteli, “Ne ma fakatahaʻi mai homa fāmilí peá ma pehē ange, ʻKo e hā e meʻa ʻoku mou loto ke faí?’” Naʻe ʻikai ʻohovale ʻa e ongomātuʻá ia ʻi hono ʻiloʻi naʻe saiʻia e fānaú he kaí, vaʻingá mo e hivaʻi ʻo ha ngaahi himí—ne nau saiʻia foki he lēsoní, kae ʻai pē ke toe nounou ange. Naʻe fakaʻosi lelei ʻaki ia ʻe Misa Loniteli ʻi heʻene pehē naʻe ʻi ai pē ʻa e fanga kiʻi fakapulipuli totonú, ka naʻe ʻikai lahi feʻunga. Naʻá ne pehē, “Ne mau ʻiloʻi te mau lava foki ʻo tokanga ki he tafaʻaki ʻoku fakalata angé.”
Naʻe pehē leva ʻe Sisitā Loniteli te ne ngaohi ha maʻumeʻatokoni efiafi ʻoku toe makehe angé ke lava ʻo kamata ʻa e Mōnité ʻaki ha pō makehe. Pea ʻi he efiafi fakafāmilí ne nau tānaki atu leva ki ai ʻa e vaʻingá mo e hivá. Ne nau fakanounou foki ʻa e lēsoní ke miniti pē ʻe 10. Naʻe ngāue lelei e foungá ni. Naʻe pehē ʻe Kilisitina, “Naʻe ʻamanaki fiefia mai e fānaú ki he pō Mōnité. Naʻe saiʻia ai e tokotaha kotoa pē.”
Ko ʻeni kuo toe lalahi ange ʻa e fānaú, ko ia kuo toe lōloa mo loloto ange ʻa e lēsoní. Naʻe pehē ʻe Lōsana taʻu 20, “ʻOku mau fai he taimí ni ha ngaahi lēsoni lelei. ʻOku mau saiʻia ʻi hono aleaʻi ʻo e ongoongoleleí mo ha ngaahi meʻa kehe pē. ʻOku fakalatá he ʻoku lahi fau ʻemau ngaahi fakakaukaú. ʻOku toe mālie ange he taimí ni koeʻuhí ʻoku mau talanoaʻi e ngaahi meʻa lahi ʻoku mau fie talanoa ki aí.” Ka ʻoku kei kau atu pē ki ai ʻa e hivá, vaʻingá mo e kai maʻamaʻá.
Naʻe pehē ʻe Sosefina taʻu 12, “Ko e meʻa ʻoku ou manako taha aí ko e kaí mo e vaʻingá.”
Naʻe toe fakaongo mai ʻe Kulisitofā, “ʻIo, ko e kaí mo e vaʻingá.”
Naʻe pehē ʻe Lōsana, “ʻOku ou tui ko e tōtōatu tahá ʻa e hivá mo e mūsiká.”
Naʻe lea fiefia mai ʻa ʻIsapela, “Ko e lēsoní.” Naʻe kiʻi tukuhua fakamatalili ange hono ngaahi tuongaʻané mo e tokouá. Ka naʻe toe tānaki fakamātoatoato mai ʻa ʻIsapela, “Ko ʻeku moʻoni.”
Naʻe pehē ʻe ʻEnitulia, “ʻOku ou tui ko e meʻa ʻoku ou saiʻia taha aí ko e efiafi fakafāmili ʻi ʻapí. ʻOku hanga ʻe he lēsoní, hivá mo e kai maʻamaʻá—ʻo hono fakatahaʻi kotoa kinautolú, ʻo ʻai ke fakalata ʻaupito. Kapau naʻa mau efiafi fakafāmili taʻe kau ai ʻa e lēsoní, vaʻingá pe hivá, ne mau mei ongoʻi ʻoku ʻikai kakato.”
Naʻe pehē ʻe Sisitā Loniteli, “ʻOku ou saiʻia ʻaupito he taimi ʻoku ʻikai haʻaku meʻa mo Pelenofi ʻe fai he efiafi fakafāmilí. Te ma tangutu pē kae tuku ki he fānaú ke nau tataki, fai ʻa e lēsoní, pea teuteuʻi mo e sapa maʻamaʻá. ʻOku nau fai ʻa e meʻa kotoa pē. Ko e meʻa ia ʻoku saiʻia taha aí.”
Ko ha meʻa mahuʻinga ʻe taha ʻi he fakapulipuli ʻa e fāmili Lonitelí ki ha ʻapi fiefiá, ko ʻenau fakataha alēlea fakafāmili ʻi he Sāpate kotoa pē hili ʻa e lotú. ʻOku nau vakaiʻi e ngāue ʻa e tokotaha kotoa pē ki he efiafi fakafāmili ka hokó. Pea koeʻuhí ʻoku nau taufetongi he ngaahi ngāue ʻoku faí, ʻoku maʻu ai ʻe he tokotaha kotoa pē ha faingamālie ki he ngāue takitaha—mei he failēsoní ki he sapa maʻamaʻá pea pehē ki he folofolá. ʻOku nau talanoa foki ʻo kau ki heʻenau ngaahi ngāue fakaʻapí pea mo e meʻa ʻoku hoko ki he mēmipa takitaha ʻo e fāmilí.
Ka ʻoku ʻikai ko e Sāpaté pē mo e Mōnité ʻoku fai ai e fakataha fakafāmilí. Naʻe pehē ʻe Samuela taʻu 10 pea mo Sōnasi taʻu 8, ko e iiki taha ia ʻi he fānaú, ʻokú na saiʻia kinaua he ʻevá mo e kai meʻakai ʻoku fai fakataha ʻe he fāmilí. Naʻe tui pehē mo ʻena tamaí. Naʻe pehē ʻe Misa Loniteli, “ʻOku mau saiʻia kotoa he ō ʻo kaukau tahí, ʻi ha feituʻu pē—ʻi he anovaí, tahí mo e vaitafé.” ʻOku nau fakataha foki ʻo hiva mo tā ha ngaahi fasi ʻo hangē ha tāmeʻá he ʻoku meimei ke poto e taha kotoa he tā meʻaleá.
ʻOku hanga ʻe he feohi fakafāmili ko ʻení ʻo ʻai ʻa e fāmili Lonitelí ke nau hoko ko ha kaungāmeʻa lelei mo ha fāmili. ʻOku nau feʻofoʻofani mo fefalalaʻaki. ʻOku takitaha fefakamālohia ʻaki. Mahalo ko e ʻuhinga ia ʻoku nau saiʻia ai ke fakamoleki ha taimi lahi he feohi fakatahá.
Pea ʻi he lolotonga e fefakamālohiaʻaki ʻa e fāmili Lonitelí, ʻoku nau toe fakamālohia foki honau uōtí mo e siteikí. Naʻe pehē ʻe Misa Loniteli, “ʻOku mau ō kotoa pē ki he ngaahi ʻekitivitī ʻa e siteikí pea pehē ki he ngaahi nofokemi mo e konifelenisi ʻa e toʻu tupú. ʻOkú ma poupouʻi ʻema fānaú ke nau kau ki he meʻa kotoa pē ʻoku hoko ʻi he siteikí mo e uōtí. ʻOku ʻikai fuʻu lalahi e ngaahi uōtí heni, ko ia ʻoku lahi e ngaahi ʻekitivitī fakasiteiki ʻoku fakahoko ke feohi fakataha ai ʻa e toʻu tupú.” ʻOku kau foki e fānau lalahi angé ki he seminelí. Naʻe ʻi ai ha taimi naʻe fakatou hoko ai ʻenau mātuʻá ko ha faiako semineli. ʻOkú na fakatou kau atu foki ki heʻena ngaahi kalasí mo e kōlomú ʻi he lotú.
Ko e fanga kiʻi fakapulipuli ko iá, ʻi he taimi ʻoku tuifio fakatahaʻi aí, ʻoku tokoni ia ki he fāmilí ni ke nau feʻofoʻofani. Mei he siʻi tahá ki he lahi tahá, mei he mātuʻá ki he fānaú, ʻoku nau saiʻia ke feohi fakataha he ʻoku nau feʻofaʻaki. Pea ʻoku lahi ha ngaahi meʻa lelei ke nau fai fakataha, ʻo tatau pē pe ko e kaukau tahi, pe vaʻinga taki kui, lolotonga ʻa e efiafi fakafāmili ʻi ʻapí (vakai ki he tafaʻakí). Naʻe pehē ʻe Sisitā Loniteli, “Ko e taha ʻo e ngaahi meʻa ʻoku ou manako taha ai ʻi homau fāmilí ko e hivá. Ko ha fāmili hiva kimautolu. ʻOku mau saiʻia ʻaupito ke hiva.”
ʻIo, ʻoku saiʻia e fāmili Lonitelí ke hiva. ʻOku nau saiʻia foki he fanongo ki he hivá—tautautefito ki he foʻi hiva solo ʻoku faʻa haʻu mei he lokikaí he pongipongi Tokonakí.