Fakatauange Ke ke Maʻu ha Aho Fāʻeleʻi Fiefia, Palesiteni Monisoni!

ʻI ʻAokosi kuo ʻosí, ʻi he ʻeke atu kia Palesiteni Tōmasi S. Monisoni pe ko e hā e meʻaʻofa lelei ki hono ʻaho fāʻeleʻí, naʻá ne poupou mai ke tau “kumi ha taha ʻoku faingataʻaʻiá, … pea fai ha meʻa maʻa nautolu.”¹ Ko e taʻu ní kuo tokoni e fānau he māmaní ki ha niʻihi kehe ke foaki kia Palesiteni Tōmasi S. Monisoni ʻa e meʻa naʻá ne fie maʻu lahi tahá.

Ne tali ʻe ha fānau tokolahi ʻaupito ki he fakalotolahi ʻa Palesiteni Monisoní ke fai ha ngāue tokoni ki ha taha kehe. Te mau lava ʻo paaki atu ha niʻihi pē ʻo e ngaahi tohi ne mau maʻú. Ka kuo mou vahevahe mo hoʻomou palōfita ʻofeiná ha meʻaʻofa ʻo e ngāue tokoní, ʻa kimoutolu hono kotoa ko e fānau angaʻofa, pea ʻoku tau talamonū kiate ia ke ne maʻu ha ʻaho fāʻeleʻi fiefia he māhiná ni!

Ne u tokoni ki ha fāmili ʻaki ʻeku foaki ange kiate kinautolu ʻa e ngaahi meʻa ne teʻeki ke u fakaʻaongaʻí mo e ngaahi meʻa vaʻinga ne kei fakaʻofoʻofa. Ne u ongoʻi lelei heʻeku fai ʻení. ʻOku hangē tofu pē ia ko e meʻa ʻoku fai ʻe he Tamai ʻi Hēvaní mo Sīsū Kalaisi maʻatautolú. ʻOkú Na tokoniʻi kitautolu ʻi hotau ngaahi faingataʻaʻiá pea foaki mai ha ngaahi tāpuaki lahi.

ʻAlamā V., taʻu 11, Vahefonua Kolomuʻá, Kolomupia

Ne fakataha mai ʻa e fānau ʻo e Uooti ʻOkelisi Fāmá, ʻo e Siteiki Fāmingitoni ʻIutā ʻOkelisí ki ha ʻekitivitī ʻo nau noʻonoʻo ai ha ngaahi monomono. Ne foaki ʻa e ngaahi monomono ko iá ki he Senitā Tokoni ʻOfa Fakaetangata ʻa e Siasí.

Naʻe tokoni ʻeku tamaí kiate au mo hoku tokoua ko Makisiamó, ke ngaohi ha ngaahi vaʻakau taumātaʻu maʻa hoku ngaahi kaungāmeʻa mei he Palaimelí. ʻOku mau manako maʻu pē ke ō fakafāmili ʻo taumātaʻu. Ko e taimi kotoa pē ʻoku ou fakaafeʻi ai ha niʻihi hoku ngaahi kaungāmeʻá ke mau ō ʻo taumātaʻu, ne ʻikai ha meʻa ke nau taumātaʻu ʻaki. ʻI heʻeku sio ki he fiefia honau tokolahi he ʻi ai ʻenau vaʻakau taumātaʻu he taimi ní, ʻoku ou toe fiefia foki mo au.

Lusiano N., taʻu 9, ʻAnitelē Liosi, ʻĀsenitina

ʻOku ou nofo ʻi ha kolo ʻoku fuʻu momoko. Ne ma lalanga mo ʻeku faʻeé ha sikaafi māfana ke tokoniʻi e kau faifekaú ke nau māfana.

Milai H., taʻu 10, Hokaitō, Siapani

Ne u ako laukonga heʻeku taʻu nimá. ʻOku ou fai ʻa e meʻa tatau he taimí ni ki hoku kiʻi tokouá mo ia naʻe fai ʻe heʻeku ongomātuʻá kiate aú—akoʻi ia ke laukonga ʻaki hono fakaʻaongaʻi e folofolá.

Nikolasi N., taʻu 7, Sao Paulo, Palāsila

Ko hoku kaungāmeʻá mei Pelū, ka kuó ne nofo ʻi ʻĪtali ʻi ha ngaahi taʻu. Ne papitaiso ha toko fā ʻo hono ngaahi tuongaʻané mo e ngaahi tokouá, pea naʻe kau foki mo ʻene faʻeé ki he Siasí ʻi ʻOkatopa kuo ʻosí. ʻOku fie papitaiso hoku kaungāmeʻá he taimí ni. Ne kole mai e kau faifekaú ke u tokoni ange ke teuteuʻi ia ki hono papitaisó. Ko ia ne u ʻi ai he taimi kotoa pē ne nau talanoa ai ʻo kau ki he ongoongoleleí. ʻOku ou ʻamanaki pē ʻe vavé ni haʻane papitaiso.

ʻElenoa A., taʻu 11, Pietimoni, ʻĪtali

Lolotonga ʻemau ʻeveʻeva mālōloó, ne mau fieinua. Ne u kole ki heʻeku faʻeé ha paʻanga ke fakatau mai ʻaki ha vai. ʻI heʻeku hū mai ki tuʻa mei he fale koloá, ne u sio ki ha tangata ʻokú ne kumi holo ha vai ʻi he vevé. Ne u sio ki hoku nimá. Ne u kei pukepuke e fetongí, ko ia ne u fakatau mai ha hina vai maʻana.

ʻOasoni B., taʻu 10, Sonola, Mekisikou

Ne fasi e vaʻe hoku kaungāmeʻa ko Sioná. Ne ʻalu saliote teketeke pē he taimi lōloa. Ne u tokoni kiate ia he ʻaho kotoa pē hono teke ʻene salioté he taimi kai hoʻataá, taimi mālōloó, pe ko ha feituʻu pē ne fie ʻalu ki ai. Ne u fuʻu ongoʻi fiefia ʻaupito ke tokoni ki hoku kaumeʻá.

ʻEma S., taʻu 8, ʻAlesona, USA

Ko ha kiʻi tamasiʻi siʻisiʻi pē au ʻoku ou manako he ngāue tokoní. ʻOku ou saiʻia he feimeʻatokoní, pea ʻoku ou saiʻia he taʻo pisiketé mo ʻeku kui fefiné. ʻOku ou saiʻia foki ke foaki e pisiketé ki hoku kaungāʻapí.

Sōnasi V., taʻu 5, Ualonia, Pelisiume; mo e tokoni mei heʻene faʻeé