Ko e Fē Taimi ʻOku Totonu Ke u Maʻu ai Hoku Tāpuaki Fakapēteliaké?
Ne taʻu 17 ʻa Sēneti ʻi he taimi naʻá ne haʻu ai ki hoku ʻapí ke maʻu hono tāpuaki fakapēteliaké. Ki muʻa ke ʻoange hono tāpuakí, ne ma talanoa ʻo u ʻilo ai ne ʻosi maʻu ʻene lekomení mei heʻene pīsopé ʻi ha ngaahi māhina siʻi ki muʻa peá ne toki telefoni mai ke fokotuʻu hano taimí. Naʻá ne fakatatali koeʻuhí naʻá ne manavasiʻi naʻa fie maʻu ʻe hono tāpuakí ke ne fai ha ngaahi meʻa ʻe fuʻu faingataʻa kiate ia ke ne lavaʻi. Naʻá ne hohaʻa foki naʻa ʻoku teʻeki ke ne mateuteu.
Ne u fakahā ange kiate ia, “ ʻOku ʻikai ko ha fekau ʻa e talaʻofa mei he Tamai Hēvaní. Ko e ngaahi talaʻofa ʻi ho tāpuakí ʻe fakakakato pē ia kapau ʻokú ke fie maʻu pea ngāueʻi ke hoko.” Ne u fakapapauʻi ange foki ki ai ʻi heʻeku hoko ko e pēteliaké, he ʻikai te u fakamāuʻi pe valokiʻi ia. Te u ʻoange hano tāpuaki.
Ko e hā ʻa e Pēteliake?
Ne fakamatala ʻe he Palōfita ko Siosefa Sāmitá ʻo pehē, “Ko e fē pē ha potu ʻe fokotuʻu ai ʻa e Siasi ʻo Kalaisí ʻi māmani, ʻoku totonu ke ʻi ai ha Pēteliake ke ʻaonga ki he hako ʻo e Kāingalotú, ʻo hangē ko ia ne fai ʻe Sēkope ʻi heʻene foaki e tāpuaki fakapēteliake ki hono ngaahi fohá.”1
Ko hoʻo pēteliake fakasiteikí ko ha tamaioʻeiki ngāue mateaki ia ʻa e Tamai Hēvaní. Kuo fakanofo ia ki he lakanga ʻo e pēteliaké pea te ne maʻu e lakanga ko iá ʻi he toenga ʻo ʻene moʻuí. ʻOkú ne matuʻotuʻa ange mo ʻiloʻi e ngaahi meʻa lahi te ke fehangahangai mo ia ʻi hoʻo hoholo ke motuʻá.
Ko hono uiuiʻí ke foaki e ngaahi tāpuakí. ʻOku ʻikai ko ha taha fai faleʻi ia, ko ia ʻoku ʻikai te ne fai ha faleʻi. ʻOku ʻikai ko ha pīsope ia, ko ia ʻoku ʻikai te ne fai fakamaau. ʻI he taimi pē ʻokú ne hilifaki ai hono ongo nimá ʻi ho ʻulú ke foaki atu hao tāpuakí, ʻoku foaki leva ʻe he Tamai Hēvaní ki he pēteliaké ha ngaahi fakakaukau, pea ʻoatu he taimi ʻe niʻihi mo ha ngaahi lea ʻo fakatefito pē kiate koe, ʻo fakafou ʻi he ngaahi ueʻi ʻa e Laumālie Māʻoniʻoní. ʻOku fakakau leva ʻe he pēteliaké ʻa e ngaahi fakakaukau ko iá ʻi ho tāpuakí.
Ko e hā ʻa e Tāpuaki Fakapēteliake?
Naʻe fakamatalaʻi ʻe Palesiteni Hāloti B. Lī (1899–1973) ko e tāpuaki fakapēteliaké ko ha “[palakalafi] ia ʻe taha mei he tohi ʻo ho ngaahi faingamālié.”2 ʻI he hilifaki ʻe he pēteliaké hono ongo nimá ki ho ʻulú, te ke ʻiloʻi ʻe fakakau ʻi ho tāpuakí ʻa e:
Fakamatalaʻi ʻo e mafai ʻo e pēteliaké. ʻOku foaki ʻa e ngaahi tāpuakí ʻi he mafai ʻo e Lakanga Taulaʻeiki Faka-Melekisētekí pea ʻi he ueʻi ʻa e Laumālie Māʻoniʻoní.
Fakahā ʻa e hakó. ʻOku tukufakaholo ʻi he kāingalotu takitaha ʻo e Siasí ha ngaahi tāpuaki fakalaumālie mo e ngaahi fatongia ʻi ha taha ʻo e ngaahi faʻahinga ʻe hongofulu mā ua ʻo ʻIsilelí. ʻOku fakahā ʻe he pēteliaké, ʻi he ueʻi mei he Laumālié, ʻa e haʻa ʻokú ke maʻu ai e ngaahi tāpuaki ko ʻení. ʻOku ʻikai hanga ʻe he matakali pe fonua ʻokú ke kau ki aí ʻo fakapapauʻi e hako ko ʻení. ʻE lava pē ke kehekehe e ngaahi matakali ʻo ʻIsileli ʻoku kau ki ai ha fāmili tatau. Ko e hako ko ʻení ʻoku kaunga ia ki ho ngaahi fatongia ʻi he puleʻanga ʻo e ʻEikí. Ko e tokolahi ʻo e kāingalotu ʻo e Saisí ʻoku ʻi he hako ia ʻo ʻIfalemí, Manase, pe Siuta, ʻa ia ko e ngaahi faʻahinga ʻiloa ia ʻo ʻIsilelí ʻi he taimi ko ʻeni ʻo ʻetau fakalakalaka ʻi he malangaʻi ʻo e ongoongoleleí ki he puleʻanga kotoa pē, mo e faʻahinga, mo e lea, mo e kakai.3
Ko ha tāpuaki fakatāutaha. Te ke maʻu ha ngaahi fakamatala fakalaumālie mo fakakikite ki hoʻo moʻuí ʻi he konga ko ʻeni ho tāpuakí. Mahalo pē ʻe fakakau ʻi ho tāpuakí ha ngaahi lavameʻa ke fakatokangaʻi, ngaahi talaʻofa ʻa e ʻEikí kiate koe, mo ha ngaahi valoki mo ha ngaahi fakatokanga ke tokoni ke maluʻi koe mei he koví mo e faingataʻá. ʻE ʻikai ke fakakau e meʻa kotoa pē ʻe hoko kiate koé ʻi ho tāpuakí, ka ʻe fakakau e ngaahi meʻa ʻoku fie maʻu ke ke tokanga ki aí. Kapau ʻoku ʻikai te ne lea ʻaki hano fakahoko ʻo ha ngāue fakafaifekau, ʻoku ʻikai ʻuhinga ia he ʻikai te ke lava ʻo fakahoko ha ngāue fakafaifekau. Mahalo ko hano talaatu pe ko hono fakahoko ʻo ha ngāue fakafaifekaú ko e meʻa ia ʻoku ongoʻi ʻe he ʻOtuá te ke lava ʻo fakahoko ʻo ʻikai fai hano fakamamafaʻi makehe ʻi ho tāpuaki fakapēteliaké.
ʻE lava pē ke lōloa pe nounou ho tāpuaki fakapēteliaké. Ko e lōloa ho tāpuakí ʻoku ʻikai ko ha meʻafua ia hoʻo moʻui tāú.
ʻOku hangē pē e lau ho tāpuakí ko e lau ʻo e folofolá. ʻE haʻu kiate koe ha ngaahi fakakaukau ki he meʻa ʻoku totonu ke ke faí mo e ngaahi ongo ʻoku lelei ki hoʻo moʻuí ʻi hoʻo lau iá. Ko e lahi ange hoʻo lau ho tāpuakí, ko e lahi ange ia ʻa e mahino hono ʻuhingá kiate koé.
Ko ho tāpuaki fakapēteliaké ko ha fakahā ia kuo foaki kiate koe. ʻOku fakatāutaha, toputapu, pea ʻoua ʻe toe fakahāhāholo. ʻOku ʻikai totonu ke ke vahevahe ia koeʻuhí pē ke fakafiemālieʻi ha fie ʻilo ʻa ha taha. “ ʻOku foaki atu ia ʻi he ueʻi ʻa e Laumālie Māʻoniʻoní pea ʻoku totonu ke lau ia mo fakaʻuhingaʻi ʻi he tākiekina ʻo e Laumālie tatau pē ko iá.”4
Ko e fē Taimi ʻOku Totonu Ke u Maʻu ai Hoku Tāpuaki Fakapēteliaké?
ʻI hono fakalea mahinongofuá, ko e taimi lelei taha kiate koe ke maʻu ai ho tāpuaki fakapēteliaké ko e taimi ko ē kuó ke mateuteu aí. ʻOku ʻuhinga ia ki he “mateuteu” fakaeloto mo e fakalaumālie. ʻE meimei ke hoko ʻeni ʻi ho taʻu hongofulu tupú. ʻE hoko ʻeni ʻi he taimi ʻoku kamata ke ke tauʻatāina aí mo kamata ke ke fifili ki he moʻuí mo e meʻa ʻe hoko kiate koé.
Te ke aʻu ki he tuʻunga te ke fuʻu fie maʻu moʻoni ai ha tāpuaki—ʻo ʻikai koeʻuhí kuo maʻu ʻe ho ngaahi kaungāmeʻá honau ngaahi tāpuakí ka koeʻuhí ʻokú ke holi ki ai maʻau. ʻE lava ke hoko ʻeni ʻi he taimi ʻokú ke sio ai ki ha niʻihi ʻoku nau fai e meʻa ʻokú ke ʻiloʻi ʻoku halá. ʻE lava ke hoko ia ʻi he taimi ʻe mate ai hao kaungāmeʻa pe kāinga. ʻE lava ke hoko ia ʻi haʻo fanongo ki ha lea ʻi he lotú ʻoku ongo ki ho lotó. ʻE lava ke hoko ia ʻi hoʻo lau e folofolá mo ako lahi ange ki he Fakamoʻuí. ʻE lava ke hoko ia ʻi he taimi ʻokú ke nofo toko taha ai mo kamata ke ke ongoʻi e ʻofa ʻa e ʻOtuá kiate koé. ʻE lava ke hoko ia ʻi hoʻo ofi ki he taʻu motuʻa ke ke ngāue fakafaifekau aí, mavahe atu ki he kolisí, hū ki he ngāue fakakautaú, pe mali ʻi he temipalé.
ʻE Anga Fēfē Haʻaku Maʻu ha Tāpuaki Fakapēteliake?
ʻI hoʻo mateuteu pē ke maʻu ho tāpuaki fakapēteliaké, ʻe ʻinitaviu koe ʻe hoʻo pīsopé pe palesiteni fakakoló. Te ne fakafehuʻi koe ʻo kau ki hoʻo moʻui tāú, hangē ko ʻení, pe ʻokú ke moʻui ʻaki e Lea ʻo e Potó, totongi vahehongofulu kakato, moʻui angamaʻa, mo mālohi ʻi he Siasí. Neongo ia , ʻoku ʻikai fie maʻu ke ke haohaoa ka ke toki taau. ʻOku fuʻu mahuʻinga tatau pē ʻa e holi ki ha tāpuakí mo e fie maʻu ke ke ʻilo ʻa e founga te ke ofi ange ai ki hoʻo Tamai Hēvaní mo e moʻui tāú. ʻE lava ʻo fakautuutu hoʻo holi ki ha tāpuakí ʻi hoʻo lotu fakatāutahá, ako e folofolá, mo e feinga ke fakafanongo ki he Laumālié.
Hili e maʻu ho tāpuakí, ʻe teuteu ʻe he pēteliaké ha tatau maʻau. Tauhi e tatau ko ʻení ʻi ha feituʻu malu. ʻOua ʻe fakamoleki ia. Neongo ia, kapau ʻe ʻi ai ha taimi te ke fie maʻu ai ha tatau, te ke lava ʻo fetuʻutaki ki he hetikuota ʻo e Siasí ʻi Sōleki Sití.
ʻOku ʻatā ke maʻu ha tāpuaki fakapēteliake ʻe he mēmipa moʻui taau kotoa pē ʻo e Siasí. Ko ha meʻaʻofa fakatāutaha ia kiate koe mei hoʻo Tamai Hēvani ʻofá, ʻa ia ʻokú Ne holi ke fakalahi mo tataki hoʻo moʻuí mo tokoniʻi koe ke ke foki ange ʻo nofo mo Ia.
Faitaaʻi ʻe Christina Smith; Tāpuakiʻi ʻe Sēkope ʻa Siosefá, tā ʻe Harry Anderson; tā ʻo Palesiteni Fausí naʻe fai ʻe he Busath Photography