Ngaahi Fakakaukau Maʻá E Efiafi Fakafāmili ʻi ʻApí

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki.Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Fakaava ʻo e Langí,” p. 16: Hili hono fakanounouʻi e fakamatalá ki ho fāmilí, fakafehuʻi pe ʻe anga fēfē ha fakatupu ʻe ho fāmilí ha ʻātakai toputapu ʻi homou ʻapí. Kapau ʻoku teʻeki ai ke fai pehē ho fāmilí, feinga ke fakahoko e faleʻi ne fai ʻe ʻEletā Iosihiko Kikusí. Vahevahe e ngaahi meʻa ne mou aʻusiá he uike hokó.

“Maluʻi mei he Fakatuʻutāmaki mei Lotó,” p. 22: ʻOange ha ngaahi kongokonga papa ki he kau mēmipa ʻo e fāmilí. ʻI hoʻo fai e talanoá, ʻai ke nau faʻu ha holisi ke ne fakafofongaʻi e maluʻi ʻo e fāmilí. Aleaʻi ʻa e meʻa te ke lava ʻo fai ke fakamālohia ai ʻa e ngaahi holisi fakalaumālie ʻo homou ʻapí. Hiki ha lisi ʻo e “ngaahi hūʻanga fakapulipuli” ʻe feinga e filí ke ne ngāue ʻakí, pea aleaʻi e founga ke maluʻi ʻaki homou ʻapí mei hono ʻohofí. Lau e konga ko e “Maluʻi Hotau Ngaahi Fāmilí,” pea fakaʻosi ʻaki hano lau e lea ʻa ʻEletā L. Tomu Peulí.

“Fuʻu Māʻoniʻoni Nai?” p. 37: Fakanounouʻi e fakamatalá, pea ʻai ke fakamahinoʻi ʻe he kau mēmipa ʻo e fāmilí ʻa e founga ne liliu ai ʻa ʻIeni ke tauhi ʻene tuí ke mālohí. Vakai ki he palakalafi hono ua ki he fakaʻosí, aleaʻi e founga ʻe tokoni ai e faleʻi ʻa ʻIení ki ho fāmilí ke “tau hoko ʻo hangē ko e finangalo ʻo Sīsū maʻatautolú—ʻo tau māʻoniʻoni.”

“Ko e Kau Tā Sīpinga Leleí,” p. 38: Kamata ʻaki haʻo fakafehuʻi e kau mēmipa ʻo e fāmilí ke nau talaatu ʻa e kakai ʻoku hoko ko ʻenau kau tā sīpinga leleí pe tā ha fakatātā ʻo ha taha ʻoku nau saiʻia ai. Vahevahe ha ngaahi faʻifaʻitakiʻanga ʻo e kakai tā sīpinga leleí mei he fakamatala ʻa ʻEletā Penisoni E. Misalusá, pea aleaʻi e ngaahi ʻulungāanga ʻoku totonu ke maʻu ʻe ha taha tā sīpinga leleí. Fakaʻosi ʻaki hano lau e ngaahi palakalafi fakaʻosi ʻe tolu ʻo e fakamatalá.

“Ko e Hola ʻa Seisoní,” p. K10: Fai ha ako mo ho fāmilí ki he meʻa ʻe fai ka hoko ha vela, fakataha ki ha feituʻu kuo vaheʻi ʻi tuʻa (te ke ifi ha meʻaifi pe tā ha fafangu ke fakafofongaʻi e fakatokangá). Hili iá, fehuʻi ange pe naʻe anga fēfē e tokoni ʻa e fakatokangá ke ʻilo ʻe ho fāmilí ʻa e taimi ke nau hola aí. Lau e talanoá. Fehuʻi ange pe ko e hā e faʻahinga tuʻunga fakatuʻutāmaki fakalaumālie ʻe ala fepaki mo e kau mēmipa ʻo e fāmilí. Lau e lea ʻa Palesiteni Henelī B. ʻAealingí, pea aleaʻi ʻa e founga ʻe tokoniʻi ai kitautolu ʻe he tuí mo e Laumālie Māʻoniʻoní ke tau ʻilo e taimi ke tau hola aí.