Haʻu ʻo Fanongo ki he Leʻo ʻo e Palōfitá

Tokoniʻi e Niʻihi Kehé

Fai ʻe Palesiteni Thomas S. Monson

Mei ha lea ʻi ha fakatahaʻanga lotu ʻi he ʻUnivēsiti Pilikihami ʻIongí ʻi he ʻaho 13 ʻo Nōvema, 2007.

ʻOku akoʻi mai ʻe Palesiteni Monisoni te tau lava ʻo fiefia ʻi he taimi ʻoku tau tokoniʻi ai e niʻihi kehé.

President Thomas S. Monson

Ke maʻu ʻa e fiefia moʻoní, kuo pau ke tau tokanga ki he kakai kehé. Kuo tokolahi ha faʻahinga kuo omi ki he Siasí—pe kamata ke ʻilo mo fakaʻapaʻapaʻi ʻa e Siasí—koeʻuhí he ne maʻu ʻe ha taha ha mālohi ke aʻu atu ʻo tokoni. Te u vahevahe mo kimoutolu ha meʻa naʻe aʻusia pea tuku lotoʻi ʻe ha kiʻi fāmili ʻa ia ne kamata ʻi he 1959, ʻi he taimi ne uiuiʻi ai au ke tokangaʻi e Misiona Kānata ʻi Tolonitoó.

Ne hoko e taʻu nima homa ʻofefine ko Ané, hili pē ʻemau aʻu atu ki Kānatá. Naʻá ne sio ki he ʻalu ʻa e kau faifekaú ki heʻenau ngāué, pea naʻá ne fie hoko foki ko ha faifekau. Ne fakahaaʻi ʻe hoku uaifí ʻoku mahino kiate ia ʻaki ʻene fakangofua ʻa Ane ke ʻave ki heʻene kalasí ha ngaahi tatau ʻo e Childrenʻs Friend [ʻoku ui he taimí ni ko e Kaumeʻá]. Ne ʻikai feʻunga ʻeni kia Ane. Naʻá ne toe fie maʻu ʻe ia ke ʻave ha tatau ʻo e Tohi ʻa Molomoná koeʻuhí ke ne talanoa ki heʻene faiakó, Misi Pepa, ʻo kau ki he Siasí.

ʻI he ngaahi taʻu siʻi kuo hilí, ʻa ia ko ha ngaahi taʻu lahi ia mei heʻemau foki mei Tolonitoó, ne mau foki mai ki ʻapi mei haʻamau ʻeveʻeva mālōlō ʻo maʻu ʻi heʻemau puha meilí ha tohi meia Misi Pepa naʻe pehē:

ʻAlā siʻi Ane:

ʻOku foki ʻeku fakakaukaú ki he ngaahi taʻu lahi kuo hilí. Ko hoʻo faiako au ʻi Tolonitō, ʻi Kānatá. Naʻá ku saiʻia moʻoni ʻi he ngaahi tatau ʻo e Childrenʻs Friend ne ke ʻomi ki he akó. Ne ongo kiate au hoʻo nofo ʻaki ʻa e tohi naʻe ui Ko e Tohi ʻa Molomoná.

Ne u fai ha tukupā ʻe ʻi ai ha ʻaho te u ʻalu atu ai ki Sōleki Siti ʻo vakai pe ko e hā ne ke talanoa pehē aí mo e ʻuhinga ne ke fuʻu tui pehē aí. ʻOku ou monūʻia he ʻahó ni ke hū homou fale talitaliʻanga e kau ʻaʻahí ʻi he Temipale Sikueá. Fakamālō ki ha kiʻi taʻahine taʻu nima naʻá ne maʻu e mahino ki he meʻa naʻá ne tui ki aí, ʻo u maʻu ai he taimí ni ha mahino lelei ange ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi Aho Kimui Ní.

Ne mālōlō ʻa Misi Pepa hili ha ngaahi taʻu siʻi mei heʻene ʻaʻahi ki Sōleki Sití. Ko e meʻa fakafiefia kia Ane ʻa ʻene ʻi he Temipale Vaitafe Soatani ʻIutaá ʻo fakahoko ha ngāue fakatemipale maʻa ʻene faiako ʻofeina ʻa ia kuó ne tokoniʻi he ngaahi taʻu lahi kuo hilí.

Tō e Ngaahi Tenga ʻo e Ongoongoleleí

Ko e founga ʻe taha te ke lava ai ʻo vahevahe fakaʻaho e ongoongoleleí ko hono tokoniʻi e niʻihi kehé. Ko e taimi kotoa pē ʻokú ke fakahā ai e moʻoní, tokoni mo angaʻofa ki ho ngaahi kaungāmeʻá, pe ko hoʻo moʻui ʻaki e ngaahi tuʻunga moʻui ʻo e ongoongoleleí, ko hoʻo vahevahe ia ʻa e ongoongoleleí. ʻI hoʻo fakahoko e ngaahi meʻa ko ʻení, ʻokú ke tō e fanga kiʻi tenga iiki ʻo e ongoongoleleí ʻi he loto ʻo e kakaí. Ko e niʻihi ʻo e fanga kiʻi tenga ko iá te nau tupu ha ʻaho ko e ngaahi fakamoʻoni fakaʻofoʻofa mo mālohi ʻo e ongoongoleleí.

Sio ki he fakatātā ʻi laló. Tohiʻi ʻi he foʻi tengaʻi ʻakau takitaha ha foʻi lea ʻokú ne fakahā ha founga ʻe taha ʻoku vahevahe ai ʻe he kiʻi tamasiʻí ʻa e ongoongoleleí. ʻOku ʻosi fai atu e taha maʻau. Valivali leva e ngaahi matalaʻiʻakau fakaʻofoʻofa ʻoku tupu mei he tengaʻi ʻakau takitaha.

Ko ha Kiʻi Taʻahine Kuo Tupu ʻo Lahi

Ann M. Dibb

Kuo tupu ʻa Ane Monisoni ʻo fuʻu lahi pea kuo mali he taimí ni, pea ko hono hingoá ko Ane M. Tipi. Naʻá ne taʻu fā pē he taimi naʻe palesiteni fakamisiona ai ʻene tamaí. ʻOkú ne kei manatuʻi pē ʻa e anga ʻo e kāpeti mo e nāunau fale naʻe ʻi he ʻapi fakamisioná. ʻOkú ne kei manatuʻi pē ʻene tūʻulutui ʻo lotu hono veʻe mohengá ʻi heʻene taʻu fitú mo ʻene ongoʻi e Laumālié ʻokú ne fakahā kiate ia naʻe ʻafioʻi ia ʻe he ʻEikí. ʻI heʻene taʻu hivá, naʻe hoko ʻene tamaí ko e mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku ʻi ai hono ongo tuongaʻane , pea ko ia pē ʻa e ʻofefine ʻe taha ʻi he fāmili ʻo Palesiteni mo Sisitā Monisoní.

Ko e taʻahine malimali fakaʻofoʻofa mo fakamāfana ʻa Sisitā Tipi, pea ʻokú ne kei manako pē ke tokoni ki he niʻihi kehé. ʻOkú ne manako he faitohí mo e taʻo keke mo e pai maʻá e kakaí. Naʻe hikinimaʻi ʻa Sisitā Tipi he konifelenisi lahi ʻi ʻEpeleli 2008 ko e tokoni ua ʻi he kau palesitenisī lahi ʻo e Kau Finemuí. ʻOkú ne fefolauʻaki he funga ʻo e māmaní, feʻiloaki mo e kau finemuí mo ueʻi kinautolu ke muimui ki he faʻifaʻitakiʻanga lelei ʻa e Fakamoʻuí pea tokoni ki he niʻihi kehé.

Ko Palesiteni mo Sisitā Monisoni ʻi he 1961 mo Ane mo hono ongo tuongaʻané, Tomu (toʻohemá) mo Kalake (ʻi lotomālié).

Ngaahi tā fakatātā ʻa Beth M. Whittaker; tā ʻo Sisitā Tipí naʻe fai ʻe he Busath Photography

Tokoní