Ne u Manatuʻi e Fakamoʻuí

Iris Adriana Leal Castilla, Kolomupia

Kimuʻa siʻi atú ne u foua ha vahaʻataimi ne taulōfuʻu mai kiate au e ngaahi palopalema fakaeau pē peá u ongoʻi ne ʻikai ha taha ke tokoni mai ke veteki kinautolu. Ne u ʻalu maʻu pē ki he lotú ka ne teʻeki ai ke u maʻu ha founga ke veteki ʻaki hoku ngaahi faingataʻaʻiá. Ne faʻa ikunaʻi maʻu pē au ʻe he tailiilí, tautefito ki he poʻulí. Ne u fuʻu loto mamahi.

ʻI he ʻaho ʻe taha ʻi he taimi ne u ongoʻi kuó u fuʻu loto moʻua aí, ne u feinga ke fetuʻutaki mo e palesiteni fakamisioná. ʻI he ʻaho kehe ia ʻe taha ne u maʻu ha holi mālohi ke fetuʻutaki ki he Palesiteni ʻo e Siasí. Ne u fakakaukau kapau te u lea pe faitohi kiate ia, te ne ʻomi kiate au ʻa e ngaahi tali ne u fekumi ki aí.

Lolotonga e puputuʻu hoku ʻatamaí, ne u kau atu ki ha konifelenisi fakavahe ʻi Kukuta, ʻi Kolomupia. Ne u maʻu e tali ne u fie maʻú lolotonga e lea ʻa e palesiteni fakamisioná. ʻI he taimi ne fehuʻi ai ʻe Palesiteni Kanalí, “Ko e fē taimi ne ke aʻusia fakamuimui taha ai ha faʻahinga meʻa fakalaumālie?” Ne u fakatokangaʻi ne u fuʻu femoʻuekina he feinga ke maʻu ha taha ke tokoniʻi au ke veteki ʻeku ngaahi palopalemá pea ngalo ʻa e ui ʻa e Fakamoʻuí ke ʻunuʻunu ke ofi kiate Iá (vakai, T&F 88:63). ʻI heʻeku fakatovave ke maʻu ha vetekiʻangá, ne ngalo ʻiate au ʻa e Tokotaha ʻokú Ne maʻu e mālohi ke foaki mai kiate au ʻa e nonga ʻi hoku ngaahi faingataʻaʻiá mo tali ʻeku ngaahi lotú.

ʻI he ʻaho ko iá ne kamata ʻeku ʻunu ke ofi ange ki heʻeku Tamai Hēvaní mo Hono ʻAlo ko Sīsū Kalaisí. Ne u fakahā ki he Tamai Hēvaní ʻeku tailiilí mo ʻeku loto mamahí, pea ne u lotu ʻi he huafa ʻo Sīsū Kalaisí ke u maʻu Hono laumālié ke ma feʻao. Ne u tuku kotoa ʻeku ngaahi kavengá ʻi he toʻukupu ʻo e Fakamoʻuí, mo manatu ki Heʻene palōmesí: “Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu” (Mātiu 11:28).

ʻOku teʻeki ai ke u maʻu ʻa e ngaahi tali kotoa ki heʻeku ngaahi palopalema fakaeaú, ka kuó u maʻu ʻa e mālohi mo e fakafiemālie. Kuó u maʻu foki mo e ngaahi ongo kapau te u moʻui angatonu, tauhi e ngaahi fekaú, pea tauhi ki he ʻEikí ʻaki e kotoa ʻo hoku lotó, te Ne tokoniʻi au ke veteki ʻeku ngaahi palopalemá pe foaki mai ha mālohi ke kātakiʻi kinautolu (vakai, Mōsaia 24:14).