O Tala ma Molimau [na Fai] i le Afi o le Tolauapiga
“O lea, ia talai atu ai mea ua oulua faalogo ai, ma talitonu lava i ai, ma iloa e moni” (MFF 80:4).
Tatagi! O le logo mulimuli lea o le aso aoga i le aoauli o le Aso Faraile. Sa ou oso ese mai lau kesi ma ou tamoe loa i le faitotoa. Sa valaaulia i matou ma isi alii e toalua e lau uo o Keni e tolauapi i fafo i lena po i tafatafa o lona fale. Sa ou tulimatai lava i ai mo le lua vaiaso.
Ina ua ou oo atu i le fale mai le aoga, sa ou aumaia lau taga moe, aluga, moli uila, tusi komi, ma se pepa o meaai mama. Ou te taunuu atu i le fale o Keni, na faatoa fofola lava e i laua ma lona tama le faleie. Sa matou auauai e tuitui taofi na faamau ai le fale ie i le eleele.
Ona tunu lea e le tama o Keni ia hamupeka, ae matou taaalo uma i le i-ga-vea i le togavao. O le taimi lava na goto ai le la, na faaola ai a matou moli uila ma o atu loa e fai se sailiiliga.
Ina ua mavae sina taimi, sa valaau mai le tina o Keni matou te foi uma atu ma fai mai ua oo i le taimi e sauni ai e momoe. Sa matou taufetuli i totonu o le faleie, fofola a matou taga moe, ma lagolelei ai. E lei pine ae fetufaai a matou meaai mamā ma faalogologo i nisi o tala ofoofogia ma le maoae a Keni. E masani lava ona fai e Keni i matou o tama autu i ana tala. E masani ona mafai ona matou felelei, ma matou faaiuina manuia le aso.
A o faasolo ina leva le po, sa lelavava tagata uma ma amata ona momoe. Sa mafai ona ou faalogoina le fetagisi o alisi i le pogisa ma se nofoaafi o alu ane mamao. Sa amata ona ou mafaufau i tala a Keni. Sa ou matauina e ui lava e tele tala maoae na faamatala mai e Keni ia te au, ae sa i ai se tala taua e tasi na te lei iloaina. O le tala moni ia Iosefa Samita ma le Toefuataiga o le talalelei. O le tele lava o lo’u mafaufau i ai, o le tele foi lea o lo’u lagona e tatau ona ou fetufaai atu lenei tala faapitoa i la’u ou.
“Keni, o e ala lava?”
“Ioe. O le a le mea ua tupu?”
Sa amata ona tatavale lo’u fatu ma sa ou lagonaina le popole, ae sa faaauau pea ona ou tautala.
“Sa ou mafaufau lava. E te talitonu i le Atua?”
“Ioe,” sa ia fai mai ai.
“E te talitonu i perofeta o loo i le Tusi Paia?”
“Ioe,” sa fai mai ai Keni ma nofo lava i luga i totonu o lana taga moe.
“Ae, faapefea pe a ou fai atu o loo i ai sa tatou perofeta soifua i luga o le fogaeleele i aso nei, e pei lava ona i ai i le Tusi Paia?”
“O le a le uiga o lau tala—o se perofeta e pei o Mose?”
“Ioe, o le uiga tonu lava lena o la’u tala.”
“Ia, o se mea fou lena mea,” na ia fai mai ai. “Faamatala mai ia te au.”
Na amata ona mou ese ou lagona popole, ae na suia i le fiafia. Sa ou faamatala atu ia Keni e uiga i le perofeta o Iosefa Samita ma le ala na toefuataiina mai ai le talalelei i le lalolagi. Sa ou faamatala atu ia te ia e uiga i perofeta soifua ma aposetolo i le lalolagi i aso nei.
Ina ua uma, sa ou fesili atu ia Keni po o le a sona manatu i ai.
Sa le pisa o ia mo ni sina taimi. “Ou te manatu o se tala ofoofogia lena tala e tatau lava ona ou matua mafaufau i ai. E te talitonu moni lava i ai?”
“Ioe, ou te matua talitonu lava i ai.” Sa ou lagonaina le mafanafana i lo’u loto, ma na ou iloaina sa ou tauina atu le mea sa finagalo le Tama Faalelagi ou te tau atu. Sa ou faia se tatalo le leoa ina ia mafai e Keni ona iloa mo ia lava o le mea sa ou fai atu ai e moni.
Sa ou iloa mulimuli ane sa tatalo Keni e saili lana tali. Sa ia fetufaaiina atu foi le mea sa ia aoaoina i ona matua. E le’i pine ae suesue loa e le aiga o Keni le talalelei ma feiloai atu i faifeautalai. E lei umi ae papatisoina uma le aiga o Keni ma faamauina o ni tagata O Le Ekalesia a Iesu Keriso o le Au Paia o Aso e Gata Ai.
E ui lava ina ua mavae tausaga e tele talu mai lena taimi, ae o loo avea pea i maua ma Keni ma se uo mamae. Na ma auauna uma i ni misiona, ma na ma aooga faatasi i le Iunivesite o Polika Iaga. Ua matua ou fiafia lava ona sa ou faaaluina le taimi e fetufaai atu ai le talalelei i la’u uo.
Ata na tusia e Richard Hull