O Le Ekalesia i le Malo o Peretania

O faifeautalai muamua lava na o atu i atunuu e mamao na auina atu i Egelani i le 1837, i le na o le fitu o tausaga talu ona faavaeina le Ekalesia. Sa taunuu atu se vaega e toafitu o faifeautalai i Egelani i le aso 19 o Iulai, 1837, sa talai atu i Preston, ma papatisoina ai ni tagata liliu mai se toa 9 i le aso 30 o Iulai. E oo ane i le vaiaso na sosoo ai, ua 41 isi tagata liliu mai na papatisoina.

I le va o le 1837 ma le 1900, e tusa ma le 100,000 le toatele o tagata liliu mai na malaga atu e faatasi ma le tino autu o le Ekalesia i le Iunaite Setete. O le mea moni, e oo atu i le 1870 na toetoe o le afa o tagata na nofoia Iuta, o tagata na malaga mai Peretania. I le vaitaimi o le 1950, na faateleina ai le faitau aofai o tagata o le Ekalesia i le Malo o Peretania, (lea e aofia ai Egelani, Sikotilani, Uelese, ma Aialani i Matu) a o uunaia e taitai o le Ekalesia le au paia e nonofo i o latou lava atunuu moni ma atiina ae ai le Ekalesia.

O le 1958 na faapaiaina ai se malumalu i Lonetona. I le 1998 na faapaiaina ai se isi malumalu i Preston, o le nofoaga o le uluai talaiga i le silia ma le 170 tausaga ua mavae. O Preston o le nofoaga lea o le paranesi aupito tuai o loo i ai pea a le Ekalesia nai lo se isi nofoaga i le lalolagi, na amata mai i le 1837.

O nai mea moni nei e uiga i le Ekalesia i aso nei i le Malo o Peretania:

Tagata auai	181,756
Misiona	7
Malumalu	2
Uarota ma Paranesi	347
Nofoaga Autu o Talafaasolopito o Aiga	120