O Le Faamafanafanaina o Lusi
“[O le] Fesoasoani e oo mai ai le faamoemoe ma le alofa atoatoa” (Moronae 8:26).
Sa faapupuu Lusi i se tulimanu o lona potumoe i le taimi na sau ai lona tina e faamanuia mai le po.
“O le a lau mea o loo fai iina, Lusi?” O le fesili lea a Tina.
“Ou te manao e tuu na o au ou te mafaufau,” na fai mai ai Lusi, a o pulou ona foliga i lona palanikeke e sili ona fiafia i ai—le [palanikeke] samasama e i ai fugalaau lea sa onaina e tina a o avea ma se teineitiiti.
“E te fia talanoa e uiga i ai?” Sa fesili atu ai tina, a o nofo ifo i le nofoa faalue.
Sa lue le ulu o Lusi ma oso loa i luga o vae o Tina. “Sa ou mafaufau ia Tinamatua Elisa,” sa ia fai atu lemu ai, a o solo ona mata i lona palanikeke.
“Oi,” sa fai atu ai Tina, ma luelueina malie o ia. “E te iloa, o loo i ai Tinamatua Elisa i le lagi i le taimi lenei Ou te manatu o loo matua fiafia lava o ia iina.”
Sa masusu Lusi. “Ua ou iloa,” sa ia fai atu ai. “Ae ua ou misia lava o ia, ma ou te le o fiafia ua alu o ia.”
“Ua ou misia foi o ia,” sa fai atu ai Tina a o ia milimiliina le ulu o Lusi. “Aisea ta te le tatalo ai e uiga i lenei mea?”
“Ua lelei,” sa ioe atu ai Lusi. Faatasi ai ma le fesoasoani a Tina, sa tatalo ai Lusi, “Le Tama Faalelagi pele e, ua ou faanoanoa ua oti Tinamatua Elisa, ma ua ou misia lava o ia. Ae ua ou iloa o loo i le lagi o ia ma o loo fiafia, ma ua ou iloa o le a ou toe vaai ia te ia pe a toetu o ia. Faamolemole fesoasoani mai ia aua nei ou faanoanoa tele. I le suafa o Iesu Keriso, amene.”
Ina ua uma ona ia fai atu “amene,” ona nofonofo filemu ai lea o Lusi mo sina taimi. Ona oso ae lea o sona manatu “Ua ou iloa le mea e fai! Sa fai mai lou uso o Ema o le usuina o pese Paraimeri e fesoasoani ia te ia e lagona ai le fiafia. Masalo e tatau ona ta faia lena mea!”
“E foliga mai o se manatu lelei lena,” sa fai atu ai Tina.
Sa usuina faatasi e Lusi ma Tina le “O A’u o se Atalii o le Atua,” “Ou Te Fia Vaai i le Malumalu,” ma le “O Loo Ou Taumafai e Avea e Pei o Iesu.” Ina ua uma, sa faapea atu Lusi, “Ua ou lagona nei le fiafia, Tina.”
“Sa fesoasoani le Agaga Paia ia te oe ia e iloa le mea e fai ina ia e maua ai se lagona lelei,” sa fai atu ai Tina.
Sa ataata Lusi. “Ua ou iloa. Sa tali mai le Tama Faalelagi i la’u tatalo.” O le taimi nei a mafaufau o ia i a Tinamatua Elisa, na te lagonaina le pei e taai lona palanikeke e sili ona fiafia i ai i lona fatu. Sa faamafanafanaina o ia.
“Ou te alofa ia te oe, Tina,” sa musumusu atu ai Lusi a o le i moe. “Ma ou te alofa foi ia Tinamatua Elisa.”
Ata na tusia e Sam Lawlor; ata pue o Sister Matsumori na saunia e le Busath Photography