Aisea Tatou Te Faia Ai le Galuega Faafaifeautalai?
Mai le tautalaga na tuuina atu i se semina mo peresitene fou o misiona i le aso 23 o Iuni, 1992.
O le faamoemoega o la tatou galuega faafaifeautalai o le fesoasoani lea i fanau a le Atua e faataunuu se tulaga na tuuina mai e lo tatou Faaola ma le Togiola.
O le aoaoga faavae autu o le galuega faafaifeautalai o loo i le fetalaiga a le Faaola ia Nikotemo: “E moni, e moni, ou te fai atu ia te oe, Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5).
O le “malo o le Atua” o loo faatatau i ai le mau lenei o le malo selesitila.
Tatou te le talai ma aoao atu ina ia “aumaia ai tagata i le Ekalesia” pe faateleina ai foi le fuaitau aofai o le Ekalesia. Tatou te le talai atu ma aoao atu ina ia tau lava o le tauanau o tagata e ola i ni olaga lelei. Tatou te faamamaluina ma faafetaia le tele o failotu ma isi o e o loo aafia i le ituaiga talaiga ua faaleleia ai tagata leaga ae faaleleia atili ai tagata lelei. E taua lena, ae tatou te ofoina atu se mea e sili atu. E mafai ona agavaa se tasi mo le malo teresitila nai lo le malo telesitila e aunoa ma le fesoasoani a lenei Ekalesia. Tatou te popole mo se taunuuga e maualuga atu.
O le faamoemoega o la tatou galuega faafaifeautalai o le fesoasoani lea i fanau a le Atua e faataunuu se tulaga na tuuina mai e lo tatou Faaola ma le Togiola. Tatou te talai ma aoao atu ina ia papatisoina fanau a le Atua ina ia mafai ona faaolaina i latou i le malo selesitila nai lo le faasalaina i se malo maualalo ifo. Tatou te faia le galuega faafaifeautalai ina ia mafai ona papatiso ma faamau. O le aoaoga faavae autu lena o le galuega faafaifeautalai.
Ua aumaia e le talalelei toefuataiina ia i tatou le malamalama faaopoopo e uiga ia Iesu Keriso ma Ana aoaoga. Ae o le tulagaese o la tatou savali e le na o le malamalama faaopoopo. O tulaga manaomia o le papatisoga e faamanatu mai ai ia i tatou o upu moni tatou te aoao atu e le o ni [mataupu] faaakatemia. O le talalelei toefuataiina e aofia ai aoaoga faavae ma sauniga. Tatou te folafola atu e manaomia le papatisoga ina ia mafai ona faaolaina ai i tatou mai agasala, e tusa ai ma tulaga na tuuina mai e le Togiola, ma e na o toeaina o lenei Ekalesia ua i ai le pule mai le Atua, e suia ai le faatinoga o le faatofuina i le vai, i se sauniga o le talalelei e faavavau. O la tatou talaiga ma le aoaoga e auga uma i le papatisoga.
Ae aisea e manaomia ai le papatisoga? Aisea e tatau ai le papatisoina i lenei auala ma e se tasi o i ai le pule faapitoa? Ou te le iloa. Ae o le mea ou te iloa, o le faamagaloina o agasala, na pau le ala na mafai ai o le taulaga togiola a lo tatou Faaola, o Iesu Keriso, ma ua Ia faailoaina mai pea lava pea lena tulaga. O Lana taulaga na totogiina ai le tau mo a’u agasala, ma ua Ia tuuina mai tulaga e mafai ai ona faaolaina a’u i Lana togisala. Ua lava lena faamaoniga mo a’u.
E pei ona ta’uina mai ia i tatou e perofeta o lenei tisipenisione, o le faamoemoega o le i ai o faifeautalai i le talaiga, ina ia faaolaina agaga, ia papatiso i tagata liliu mai, lea e matala ai faitotoa o le malo selesitila i atalii ma afafine o le Atua.
E leai se isi e mafai ona faia lenei mea.
E le mafai ona faia e isi ekalesia.
E le mafai ona faia e le ola lelei Faakerisiano.
E le mafai ona faia e le faatuatua lelei, manaoga lelei, ma mafuaaga lelei.
Ua na o le perisitua lava a le Atua e mafai ona ia faia le papatisoga o le a faamalieina ai le folafolaga faalelagi ae “afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5).
O aoaoga faavae autu o le galuega faafaifeautalai, o le afioga lea a le Atua, ua faaalia mai i tupulaga uma, e faapea, e le mafai ona faaolaina le tagata i le malo selesitila e aunoa ma le taulaga togiola a Iesu Keriso, ma na o le pau lava le auala e agavaa ai mo lena Togiola, o le mulimuli lea i poloaiga a le mataisau: “Ina salamo ia ma ia taitasi ma papatisoina outou uma” (Galuega 2:38). Ua valaauina i tatou e fesoasoani atu i lenei taumafaiga tele.
Ua aoaoina Nikotemo e Keriso, saunia e Robert T. Barrett; ata na tusia ma le pito i tua na saunia e Cary Henrie