Savali a Faiaoga Asiasi

Ia Malamalama ma Ola i le Talalelei a Keriso

Ia aoao atu ma le agaga tatalo mau ma upusii nei po o, pe afai e manaomia, se isi mataupu faavae o le a faamanuiaina ai uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

E Mafai Faapefea Ona Ou Malamalama Lelei ma Ola i le Talalelei?

Elder Joseph B. Wirthlin (1917–2008) o le Korama a Aposetolo e Toasefululua: “E tatau i tagata faamaoni o le Ekalesia ona avea faapei o aluna ma faaloloto a latou aa i le eleele olaola o mataupu faavae o le talalelei. E tatau ona tatou malamalama ma ola i mataupu moni faigofie, ae aua nei faafaigataina. E tatau ona mautu ma loloto o tatou faavae ina ia mafai ona tatou talitalia afā o faaosoosoga, mataupu sese, o faigata, ma osofaiga a le fili e aunoa ma le taumaluelue pe liaina ai. …

“Ua taua lava le tausiga faaleagaga e pei foi o meaai paleni e faatumauina ai lo tatou malolosi ma le soifua maloloina. Tatou te tausi faaleagaga i tatou lava i lo tatou fetagofi i le faamanatuga i vaiaso taitasi, faitau i tusitusiga paia i aso taitasi, tatalo i aso taitasi taitoatasi ma faaleaiga, ma faia e le aunoa galuega o le malumalu. Ua pei lo tatou malosi faaleagaga o ni maa uila; e manaomia ona fafagaina ma saga fafagaina soo” (“O Aa Loloto,” Liahona, Ian. 1995, 89).

Barbara Thompson, fesoasoani lua i le au peresitene aoao o le Aualofa: “Uso e, o le taimi lenei e sili atu nai lo se isi lava taimi, ua tatou manaomia ai ni tamaitai e tulai mai ma malolosi. Tatou te manaomia ni tamaitai o e folafola atu le upumoni i le malosi, faatuatua, ma le totoa. Tatou te manaomia ni tamaitai e faia se faataitaiga o le amiotonu. Tatou te manaomia ni tamaitai e ‘galulue ma le naunauta’i i mea lelei.’ E tatau ona tatou ola ina ia molimau o tatou olaga tatou te alolofa i lo tatou Tama Faalelagi ma le Faaola o Iesu Keriso ma o le a tatou faia mea ua La fetalai mai tatou te faia” (Ia Tatou Fiafia Nei,” Liahona ma le Ensign, Nov. 2008, 116).

2 Nifae 31:12: “Ina mulimuli mai ia ia te a’u, ma faia mea ua outou vaavaai mai ai ia te a’u ua ou faia.”

E Faapefea Ona Manuia Olaga i le Malamalama ma le Ola i le Talalelei?

Peresitene Dieter F. Uchtdorf, Fesoasoani Lua i le Au Peresitene Sili: “Ao tatou tauivi ina ia malamalama, faatatau ma ola i mataupu faavae sa’o o le talalelei, o le a matua faateleina atu lo tatou ola faalagolago ia i tatou lava i le faaleagaga. … Ou te molimau atu i le avea ai o se Aposetolo a le Alii o Iesu Keriso o loo soifua o Ia, e moni le talalelei, ma o loo ofoina mai ai tali i luitau o tagata taitoatasi ma le lautele o fanau a le Atua o loo i ai i le lalolagi i aso nei” (“O Uiga FaaKeriso—o le Mana Lea e Siitiaina i Tatou i Luga,” Liahona ma le Ensign, Nov. 2005, 100, 101).

Elder M. Russell Ballard o le Korama a Aposetolo e Toasefululua: “O le fuafuaga o le fiafia ua avanoa lea mo ana fanau uma lava. Afai o le a talia e le lalolagi ma ola ai, ona faateleina ai lea o le filemu ma le olioli i le lalolagi. O le tele foi o puapuaga ua tatou iloa i onaponei o le a aveesea, pe afai e mafai e tagata i le lalolagi atoa ona malamalama i ai ma ola ai i le talalelei” (“Tali i Fesili o le Olaga,” Liahona, Iulai 1995, 28).

Elder Robert D. Hales o le Korama a Aposetolo e Toasefululua: “E tatau ona tatou ola i le talalelei i se auala o le a tatou mauaina ai le Agaga ina ia mafuta pea ma i tatou. Afai tatou te ola agavaa, o le a mafuta pea le Agaga ma i tatou. Ona mafai lea ona tatou aoao atu e ala i le Agaga. … O le mafuaaga tatou te tatalo ai, suesue i tusitusiga paia, ia i ai ni uo lelei, ma ola i le talalelei e ala i le usiusitai i poloaiga, ina ia—e le o le ae faapefea la, ae o le afai—e oo mai tofotofoga, ua tatou saunia” (Aoao Atu e ala i le Faatuatua,” Liahona, Sete. 2003, 10, 14–15; Ensign, Sete. 2003, 20, 24–25).

Faamatalaga Mai le Ua Toetu o Ia, saunia e Del Parson; pito i tua: ata na pueina e Jerry Garns