Uo i le Uo
Auala e Fai Ai Isi [Tagata]
Mai se faatalanoaga ma Elder Francisco J. Viñas o le Fitugafulu, o loo auauna atu nei o se Peresitene o le Au Peresitene o le Eria a Keripeane; na saunia e Sarah Cutler
“Auauna le tasi i le tasi i le alofa” (Kalatia 5:13).
E faapefea ona e fausia se aiga e faavavau? O le auala muamua lava o le aoao mai i ou matua. Na papatisoina o’u matua i le 1951, ina ua fa ou tausaga. O i matou o isi tagata muamua o le Ekalesia i Iurukuei.
Na ou aoao mai i ou matua le ala ou te faia ai isi tagata. Na la aoaoina au e aapa atu i tagata uma, e oo lava ia i latou e le mai lo matou atunuu po o le aganuu. I se tasi taimi na sau ai se kapeteni o se vaa mai Nouei i Iurukuei. Sa na o ia lava, sa le’i i ai lona aiga. Sa valaaulia o ia e lo’u aiga e nofo i lo matou fale. Sa toatele tagata na nonofo i lo matou fale pumoomoo, ae sa matou taliaina se isi toatasi.
O le vaai atu i ou matua o tausia isi tagata na ou aoaoina ai se aoaoga faavae faigofie lava o le talalelei a Iesu Keriso: ia faauo atu i isi, fai lelei i latou, ma aua le faamasinoina i latou. Ia agalelei, ma fesoasoani atu i tagata pe a i ai se mea latou te manaomia.
Sa ou vaai foi i le ala na auauna ai ou matua i le Ekalesia ma le ala na la fesoasoani ai i faifeautalai. A o lei valaauina au o se taitai perisitua, ua uma lava ona ou maua se aoaoga faamasani matagofie i lou aiga mai ou matua.
O le vave amata ona e ola i le talalelei i lou olaga, o le sili atu foi lena o le lelei o le a i ai lou olaga. E i ai se aso o le a mafai ai ona e tuuina atu lena lava savali o le talalelei ma le talatuu i lau fanau ma a latou fanau. E mafai ona e amataina se tupulaga fou o se aiga e faavavau pe a e aoaoina aoaoga faavae autu o le talalelei.
O faataitaiga a o’u matua o se talatuu maoae lea mo a’u ma lo’u aiga. Ou te faamoemoe o le a faaauau ai pea faapea mo tupulaga uma o i luma. E i ai sa matou mafutaga maoae a i ma’ua ma lo’u toalua ma le ma fanau. Sa ma taumafai e fesoasoani ia i latou ia malamalama i mea na aoaoina ai a’u e ou matua, afai e te alofa atu i isi ma fesoasoani ia i latou, ua faamanuiaina oe. Sa tele ni luitau a le ma fanau, ae peitai ua uma ona faamauina i latou uma i le malumalu. O loo malolosi i latou i le Ekalesia, ma ma te faamoemoe o le a latou tuufaasolo atu lenei tofi i le isi tupulaga e sosoo ai.
O le fanau a la’u fanau o le tupulaga lona fa lea o lo’u aiga i le Ekalesia. Ma te famoemoe e mafai ona ma fetufaai atu ia i latou lea lava taleni o le talia o isi, ia fesoasoani atu ia i latou, ma siitia i latou i luga. O loo matou galulue e fausiaina se aiga e faavae i le faatuatua ia Iesu Keriso ma se molimau malosi i Lana talalelei.
Ata na tusia e Dilleen Marsh