Lesona mai le Mataupu Faavae ma Feagaiga
O Le Tatou Faatuatuaga Lenei, ia Faaola i Agaga
O se viiga e sili ona fiafia i ai e masani ona matou usuina i le sauniga perisitua o le “Outou Faifeau o Isaraelu” ma upu na tusia e Cyrus H. Wheelock. O le fuaiupu lona tolu e faapea:
Pei o le Matai [Iesu] tatou te o i e vaivai,
Ma e matitiva ma fia aai;
Tatou faafiafia i le tala na ia aumai
Aumai i Siona ma ala e ola ai.1
O le Aso Toonai a o lumanai le konafesi aoao ia Oketopa 1856, na taunuu ai Elder Franklin D. Richards ma ni faifeautalai se toatele ua maea misiona i le Vanu o Sate Leki. Na latou lipoti atu ia Peresitene Polika Iaga le faitau selau o alii, tamaitai, ma tamaiti paionia na taape solo i le ala umi e agai atu i le vanu, ua feagai ma le amataga o le taumalulu. Sa fia aai tagata, ma na tele taavale tulei ma taavale toso na malepelepe. Na matua mafatia tagata ma meaola. O le a faaumatia i latou uma pe a leai se laveai.
O le taeao o le Aso Sa na tofia ai e Peresitene Iaga i latou uma o le a tuuina atu saunoaga i lea aso ma i le taimi o le konafesi na sosoo ai, ina ia ta’ua le mala na feagai ma paionia. I lana saunoaga na ia saunoa ai:
“O lo’u talitonuga lena; o le upu tusia lena a le Agaga Paia o loo ia te a’u. Ina ia laveai i tagata. …
“Ou te tau atu ia te outou, o la outou faatuatuaga, tapuaiga, ma galuega faalelotu, o le a le mafai ona faasaoina ai se agaga se toatasi o outou i le Malo Selesitila o lo tatou Atua, seiiloga tou te faia ia mataupu faavae e pei ona ou aoao atu nei ia te outou. Ia outou o atu nei ma aumai na tagata o loo i laufanua valevalenoa.”2
Sa i ai Cyrus H. Wheelock i na sauniga. Na avea o ia ma se tasi o le vaega laveai muamua na tuua le Aai o Sate Leki i le aso 7 o Oketopa e saili i le Au Paia na salalau solo i laufanua valevalenoa.
Mulimuli ane, na lipoti atu ai George D. Grant o lē na taitai i le vaega laveai, ia Peresitene Iaga: “E leai se aoga tele ia te au o le taumafai e tuuina atu se faamatalaga o le tulaga o nei tagata, aua o le a e silafiaina mai [isi] … ; peitai e mafai ona e vaai faalemafaufau i le va o le lima ma le ono selau alii, tamaitai ma tamaiti, ua matua lelavava i le tau tuleiina o taavale tulei i luga o le kiona ma le palapala; ua matapogia i tafaala; palalasi ifo, ua maalilili i le malulu; o tamaiti fetagisi, ua malo o latou vae ma lima i le malulu, ua tafetotoi o latou vae ma o nisi na leai ni seevae i le kiona ma le maluluina. Na toetoe a le mafai e le tagata aupito malosi ma naunautai o i matou; peitai sa matou malaga pea, ma faia le mea na matou mafaia, e aunoa ma le masalosalo po o le faavaivai.”3
O upu o le viiga “Outou Faifeau o Isaraelu” atonu sa i ai i le mafaufau o Uso Wheelock i na vaitaimi faigata o le 1856. Sa mafai e vaega laveai ona aapa atu i tagata mafatia, fia aai, ma maluluina. Sa latou faamalosiau atu ia i latou ma faasino atu i latou i le ala i Siona i le Vanu o Sate Leki.
Laveaiina o Tagata
I o tatou taimi o le i ai o vaalele, lea e le atoa se aso e malaga mai ai mai Europa e agai atu i le Vanu o Sate Leki, ua matua tele lava suiga i nofoaga ma tulaga. Peitai e le o suia lava le saunoaga a Peresitene Iaga—o le tatou lava faatuatuaga ia laveai i tagata. I le avea ai ma ni tagata o le Ekalesia a le Alii, o le a i ai pea ia i tatou se tiute o le laveai o i latou e i ai manaoga faaleagaga ma le faaletino. E pei ona fetalai mai le Alii i toeaina i le popofou o le Ekalesia: “Ia manatua foi i mea uma, e matitiva ma e le tagolima, o e mama’i ma e puapuagatia, aua o le na te le faia ia mea, e le o sou soo o ia” (MFF 52:40).
Tatou te mananao e avea ma soo moni o lo tatou Alii o Iesu Keriso. Ua tatou folafola atu tatou te alolofa i le Atua ma mananao e mulimuli i Ana poloaiga. E faafou i Aso Sa taitasi a tatou feagaiga o le papatisoga, tapuai atu i le Atua i a tatou sauniga, ma vivii atu ia te Ia i le tele o faamanuiaga ua Ia tuuina mai ia i tatou. O loo tumau pea le moni o le faamanatu mai a le Tupu o Peniamina: “Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17).
A finagalo le Alii e faamanuia le olaga o se tasi pe fesoasoani atu foi i se tasi o manaomia se fesosoani, e masani ona Ia auina mai se tuaoi, se uo, po o se tagata o le aiga. O se tasi lea auala Na te aumaia ai le lagolago ma le faaolataga i isi. O le faia o lea mea, Ua Ia fesoasoani mai ai ia i tatou ia malamalama i le poloaiga sili, “E te alofa atu i le lua te tuaoi, ia pei o oe lava ia te oe” (Mataio 22:39).
Pe o se mea ea e maofa ai le avea o i tatou ma ni tagata e masani ona faamanuiaina tele i lo tatou aapa atu i isi? Na folafola mai le Alii, “O le na te tago i lana selesaito ma lona malosi, ua na faaputu ai fua ma teu ina ia na le matelaina, ae aumaia le olataga i lona agaga” (MFF 4:4). O le aumaia o le olataga i isi e aumaia ai le olataga i o tatou lava agaga.
Tatou Tumau i le Mataala
E tele auala e mafai ona tatou aapa atu ai i isi ma fesoasoani atu i e o i ai ni manaoga faaletino ma faaleagaga. Afai tatou te mataala a o tatou savalia le olaga, o le a faaali mai e le Alii ia i tatou avanoa o le a faamanuiaina ai isi ma i tatou foi.
Talu ai nei sa ou auai atu ai i se konafesi o le au faamisiona o fesoasoani alofa a le Ekalesia sa faia i Ioritana. A o ou feiloai atu ia i latou, na ou vaaia ai ni tuafafine se toalua o loo galulue i le kolosē. Sa laua faapea mai sa la koloseina ni pulou laiti mo pepe fou faatoa fananau mai. I le itu i matu o le laumua o Amman, o loo i ai se falemai e faafanauina ni pepe se 50 i le aso. E matua matitiva lava tagata iina. A uma ona fanau mai se pepe, ona toe auina atu lea o tina ma a latou pepe i o latou aiga, ia e leai ni masini faamafanafana o i ai. O le toatele o nei pepe e tigaina i faamai ma maliliu ai lava ona o le le mafanafana o le tino. Sa ou talosagaina ni faataitaiga se lua o a laua kolosē.
Ina ua ou taunuu atu i lo matou aiga, sa ave e lou toalua nei faataitaiga i le Aualofa. O le taunuuga, na amataina ai se vavega—e pei lava ona masani ai ona tupu i totonu o fonotaga a le Aualofa i le lalolagi atoa. I le vaitau o le Kerisimasi na amataina ai e le toatele o tuafafine mai uarota lata mai ona kolosē ma su’i ni pulou pepe. Sa faia lava e i latou, faatasi ma uo, i fale, po o gaoioiga a le Ekalesia.
I se tasi aso na ou fesili ai i se uo po o a mai o ia. Sa faa’ivi lona mata ma tali mai, “O a’u o se ‘ositaulaga’ mo pulou pepe. Matou te talanoa i pulou pepe i le ao ma le po. Ua siomia ai i matou.” Na valaau mai se tasi o tuafafine ma fesili mai ia te au, “E le mafanafana Sasae Tutotonu?” Ina ua ou ta’u atu ia te ia sa manaomia ni pulou, sa amata loa ona galue o ia.
Ina ua ou toe foi atu i Ioritana, e sili atu i le 800 ni pulou pepe sa i totonu o a’u atopa’u. Ina ua matou tuuina atu ia pulou pepe i faufautua sinia o le vaega e vaaia pepe o le falemai, sa manatu o ia o nei mea na auina mai e le Atua. Ua 16 tausaga ae faatoa oo lea o Ioritana i se taumalulu na sili ona maatiati, na matua maualalo lava le fua o le tau.
O Le Aapa Atu i Isi
O le aapa atu ma le fesoasoani atu e le faatapulaaina i le matua, soifua maloloina, taimi, tomai, po o punaoa tautupe. Soo se tasi e i ai le manao e mafai ona fesoasoani atu i e matitiva. E mafai ona tatou auai i galuega faatino e faatulagaina o le uelefea. E mafai ona tatou tuuina atu se taulaga anapogi limafoai. E mafai ona tatou asiasi atu ma faamafanafana i se uo o gasegase. E mafai ona tatou valaaulia i lo tatou aiga se tasi o feagai ma ni faafitauli E mafai ona tatou asiasi atu ma le faamaoni i aiga o loo tatou aoaoina ma tuafafine o loo tatou asia. E mafai ona tatou valaaulia se uo o tauivi ma ni faigata i a tatou sauniga i Aso Sa. E mafai ona tatou o [e talai] ma faifeautalai faamisiona. E mafai ona tatou faia galuega o talafaasolopito o aiga ma galulue e le aunoa i le malumalu. E mafai ona tatou faalogo atu i a tatou fanau ma fanau a fanau, aoao i latou, ma uunaia i latou e savavali i le malamalama.
O nisi taimi e tutusa lava le faigofie o le aapa atu ma le faia o se tatalo faamaoni, telefoni atu, po o le tusia o se tusi puupuu. Afai ua leai se tatou avanoa e aapa atu ai i se tasi o manaomia le fesoasoani, o lona uiga ua tatou pisi tele. A tatou faia ni mea lelei, ua tatou galulue i le valaaulia a le Faaola:
“Ou te tuuina atu ia te outou e fai ma malamalama o lenei nuu. E le mafai ona lilo le aai ua tu i luga o le mauga.
“Faauta, pe tutuina le lamepa e tagata i le tuu ai i lalo o le mea e fua ai saito? E leai, ae tuu i luga o le tuugalamepa, ia pupula atu ai i e o i le fale uma;
“O le mea lea ia faapea ona pupula atu ai lo outou malamalama i luma o lenei nuu, ina ia latou iloa a outou galuega lelei ma vivii atu ai i lo outou Tama o i le lagi” (3 Nifae 12:14–16).
Taitai Atu o Isi i Siona ma le Ola e Faavavau
O le aapa atu i isi o le tausia lea o isi tagata. Tatou te le popole i numera po o fuainumera ae o le manuia solo lelei o tagata o loo siomia i tatou. Afai tatou te faia mea lelei, aapa atu, ma tuuina atu le fesoasoani faaleagaga ma le faaletino e tusa ai ma lo tatou malosi ma agavaa, ua otometi lava ona tatou taitai atu isi i Siona. O le a tosina mai i latou ona o ituaiga tagata o loo tatou i ai ma le mea o loo tatou fai ai ma sui. O le a faamanuiaina i latou i mea latou te vaaia ma lagonaina. O le a faavaeina pe faamalosia foi a latou molimau. Ma o le a tatagi i o tatou agaga le faamaoniga a le Alii:
“Ia faamaoni ai; ia tumau i le tofiga ua ou tofia ai oe; ia fesoasoani i e vaivai, ia sii ae lima o loo tautau i lalo, ma faamalosia tulivae vaivai.
“Afai foi e te faamaoni e oo atu i le iuga e te maua le pale o le tino ola pea, ma le ola faavavau i maota ua ou saunia i le fale o lo’u Tama” (MFF 81:5–6).
E moni lava, o la tatou faatuatuaga ia laveai ma faaola i agaga.
Osigataulaga—George Padely, na saunia e Julie Rogers
Ata na tusia e Julie Rogers