O Le Auiliiliga o Faaaliga: O Le Matafaioi ua Faaalia Mai o Fitugafulu

Saunia e Elder Earl C. Tingey

Sa auauna atu o se sui o le Au Peresitene a Fitugafulu mai le 1996 i le 2008

Aisea e taua ai le malamalama i le talafaasolopito o Fitugafulu i aso nei? Aua e aumaia ai se mamanu o le auala e faaali mai ai e le Alii Lona finagalo mo Lana Ekalesia—ma mo o tatou olaga taitoatasi.

I le aso 8 o Fepuari,1835, na faailoa atu ai e Iosefa Samita ia Polika ma Iosefa Iaga o le a ia faatulagaina Aposetolo e Toasefululua ma Fitugafulu e tusa ai ma le faaaliga na ia maua (tagai MFF 107).

Ona saunoa atu lea o le perofeta: “‘Ou te mana’o e te lua logoina atu i le usoga uma o loo nonofo i paranesi, i se mamao talafeagai mai lenei nofoaga, ina ia faapotopoto i se konafesi aoao i le Aso Toona’i a sau. O le a ou tofia ai i le taimi lena ma iina ni Molimau Faapitoa se toasefululua, latou te avatu le Talalelei i atunuu mamao, ma o oe,” sa ia (fai atu ai ia Uso Polika), ‘o se tasi ia o i latou.’ … Ona ia faliu atu lea ia Elder Iosefa Iaga ma se naunautaiga tele, e pei o loo faalauteleina pea le faaaliga i lona mafaufau, ma saunoa atu ia te ia, Uso Iosefa, ua filifilia oe e le Alii e avea ma Peresitene o Fitugafulu.’”

E ui lava na iloa e le au Iaga le ta’ua ai o nei tofi o le perisitua i le Tusi Paia, ae na “maofa lava i la’ua” i upu a le Perofeta.¹

I le Aso Toonai na sosoo ai, 14 Fepuari, na tofiaina ma faauuina ai sui o le Toasefululua, ma i le lua vaiaso mulimuli ane, na tofiaina ma faauuina ai foi sui o le Korama Muamua a Fitugafulu.

E lua lava mea e faapitoa le taua o loo matilatila i lo’u mafaufau e uiga i le talafaasolopito o Fitugafulu, o loo manino lava i lenei valaauga muamua o Fitugafulu i la tatou tisipenisione: (1) o le tofi o Fitugafulu o loo faavae i aoaoga faavae o loo i tusitusiga paia ma (2) o le matafaioi o Fitugafulu e fesootai tumau atu i le misiona a le Toasefululua. A tatou suesueina nei manatu taua e lua, o se manatu lona tolu—e tutusa lava, a le o lea o se manatu e taua tele atu—o loo manino mai: e faaali mai e le Alii Lona finagalo i le upu ma le upu, ma avea ai le talafaasolopito o Fitugafulu o aso e gata ai, o se mamanu o faaaliga mo le Ekalesia ma mo tagata taitoatasi.

1. O Le Tofi o Fitugafulu O Loo Faavae i Aoaoga Faavae o loo i Tusitusiga Paia

O le taimi muamua o loo ta’ua ai Fitugafulu, o le faatonuga o loo i le Feagaiga Tuai ia Mose ma “toeaina o Isaraelu e toafitugafulu” (Esoto 24:1).

Na faatonuina e le Alii ia Mose e faaaoga Fitugafulu ina ia aua nei ona tauave toatasia le mamafa o ana avega: “Ina faapotopoto mai ia ia te au o tagata e toafitugafulu, o toeaina o Isaraelu … ina ia latou tutu ai faatasi ma oe” (Numera 11:16).

Ina ia tonu le faatagaina o Fitugafulu [e faataunuu le galuega], na avatu ai e le Alii le “agaga” lea na i luga o Mose, ma tuuina atu foi i Fitugafulu. “Ua nofo le agaga i luga ia te i latou, ona latou perofeta ane ai lea, ua gata i lea aso” (Numera 11:25).

Sa faapena foi ona i ai i le Ekalesia i le Feagaiga Fou le tofi o Fitugafulu. Na tofiaina ma aoaoina e le Faaola lava Ia ia Fitugafulu (tagai Luka 10) i se agaga e tutusa lava ma aoaoga na Ia tuuina atu i le Toasefululua (tagai Mataio 10). Na Ia auina atu Fitugafulu, ma faamalamalama atu “o le faalogo ia te outou ua faalogo o ia ia te au” (Luka 10:16; tagai foi i fuaiupu 1–15).

O le aoga o Fitugafulu na manino lava ina ua latou lipoti atu e uiga i a latou auaunaga, ua “faapea mai, Le Alii e, ua usiusitai mai temoni ia te i matou ona o lou suafa.” (Luka 10:17).

2. O Le Matafaioi a Fitugafulu E Fesoota’i atu i le Misiona a le Toasefululua

O le matafaioi a Fitugafulu e faatatau i le Toasefululua ua sili ona manino mai ina ua mavae le Toetu o le Faaola. Ua ola le Ekalesia ma na le mafai e le Toasefululua ona taulimaina na o i latou manaoga o tagata. O le tofiaina o Fitugafulu na taliina ai luitau o le faatuputeleina [o le Ekalesia], o le amata muimui lea o nisi ona o le le tausia i aso taitasi o tina ua oti a latou tane. Na tauaveina e Fitugafulu nisi o avega ina ia le lafoai ai e le Toasefululua ia tofiga ia e na o i latou lava e mafai ona faataunuuina:

“O lenei, le au uso e, ina filifili ia ni o outou se toafitu e tauleleia, e tutumu i le Agaga Paia ma le poto, ia matou tofia i latou i lenei faiva.

“A o i matou [le Toasefululua] matou te finafinau i talotaloga ma le auauna i le upu” (Galuega 6:3–4).

O lenei mamanu na toefuataiina mai e ala i le Perofeta o Iosefa Samita, ma o le tofi o Fitugafulu e faatatau i le tofi o le Toasefululua na maioio lava lona faamalamalamaina i faaaliga o onaponei:

“Ua valaauina foi Fitugafulu latou te folafola atu le talalelei, ma avea ma molimau faapitoa i Nuu Ese ma le lalolagi atoa” (MFF 107:25).
“O le Au Fitugafulu e galulue i le igoa o le Alii, e tusa ma le faatonuga a le Toasefulu ma le Toalua po o le Au Fautua Maualuga Femalaga’i i le atiina ae o le ekalesia ma le faatonuina o ana galuega i atunuu uma” (MFF 107:34).
O le Toasefululua “e valaauina le Au Fitugafulu, a e le o nisi pe a tatau ia i latou se fesoasoani, e faataunuuina valaaulia mo le talaiga ma le taitaiga o le talalelei” (MFF 107:38).
O Fitugafulu “ua faavaeina mo toeaina femalaga’i e molimau i lo’u igoa i le lalolagi atoa i soo se mea lava e auina atu i ai i latou e le au lagolago maualuga femalaga’i, o a’u aposetolo ia, e saunia le ala i o’u luma” (MFF 124:139).

Ou te mautinoa o Fitugafulu taitoatasi i aso nei ua latou manatu o se avanoa maoae le lagolagoina o le Au Peresitene Sili ma le Korama a Aposetolo e Toasefululua. Ma lea foi, e fesoasoani le Fitugafulu e tuuina mai se tali i luitau o le tuputupu ae o le Ekalesia. E ui o le masani lava e na o le toa 3 sui o le Au Peresitene Sili ae 12 sui o le Korama a Aposetolo e Toasefululua, e i ai lava fetuunaiga i tulaga ma le numera o Fitugafulu.

3. E Faaali Mai e le Alii Lona Finagalo i le Upu ma le Upu

Ina ua latou taunuu i le Vanu o Sate Leki, sa auina atu loa le Au Paia anamua, e aofia ai ma Fitugafulu, i nofoaga eseese. Na faatulagaina Fitugafulu i korama pe tusa ma le 30. O le vavamamao o mea sa nonofo ai na faigata ai lava, pe na le mafai ai foi, e tagata ma taitai o Fitugafulu ona faatasi atu i a latou korama na amata ai.

O se taunuuga o lenei faafitauli, na saunia ai loa ma le agaga tatalo e le Au Peresitene Sili i le 1883 se fautuaga tusitusia i le auala ma le agaga e tatau ona faatulaga ai le Fitugafulu.

I le aso 14 o Aperila, 1883, na taliaina ai e le Alii le fautuaga ma faaali mai: “O le mea ua outou tusia o lo’u lea manao, ma ua ou talia: ma le isi … aua nei atuatuvale o outou loto, pe faapopoleina foi i le puleaina ma le faatulagaina o la’u Ekalesia ma le Perisitua ma le faataunuuina o la’u galuega. Ia mata’u ia te a’u ma tausi i a’u tulafono ma o le a ou faaali atu ia te outou, mai lea taimi i lea taimi, e ala i e ua ou tofiaina, o mea uma o le a tatau ai mo le atinaeina i le lumanai ma le atoatoa o la’u Ekalesia, mo le fesuiaiga ma le alualu i luma o lo’u malo, ma mo le fausiaina ma le faatuina o la’u Siona.”²

O le mamanu o faaaliga mai lea “taimi i lea taimi”o loo manino lava e ala i le suesueina o le talafaasolopito o Fitugafulu—o se suesuega e faamalamalama ai le auala ua atinae ai i le upu ma le upu ia valaauga, tiute, ma matafaioi o Fitugafulu, e tusa ai ma le faavae o aoaoga faavae o loo i tusitusiga paia. Na saunoa mai Peresitene Boyd K. Packer, Peresitene o le Korama a Aposetolo e Toasefululua, o le faaalia mai o mea e tutupu i le faatulagaga o Fitugafulu “o le a faamaonia ai o se mamanu maoae mai le Atua ma o se mamanu o faaaliga lava ia.”³

Sei o tatou toe iloiloina ni nai atina’e taua i lenei talafaasolopito e faamalamalama ai lenei faatulagaga o le upu ma le upu.

Faatulagaga o Fitugafulu. Ia Fepuari 1835, ina ua tofiaina e le Perofeta o Iosefa Samita ia Fitugafulu muamua o lenei tisipenisione, o i latou uma lava, o ni sui o le Tolauapiga a Siona, le vaega lea na savavali mai Ohaio e agai atu i Misuri i le 1834 e fesoasoani i le Au Paia.

Na ta’ua e Elder B. H. Roberts (1842–1933) o le Fitugafulu, o lenei auaunaga ua faaalia ai “o uiga o tamalii o e ausia lenei tofiga maualuga i le Perisitua a le Atua, e tatau ona avea ma ni tamalii na faia ni ositaulaga mo le galuega a le Atua, po o i latou o e e naunau atoatoa e faia ia osigataulaga faapea, e oo lava i le tuuina atu o o latou ola mo le galuega.”⁴

Olaga i Navu. Ao nonofo le Au Paia i Navu, “na matua faateleina le fuainumera o Fitugafulu. … E oo atu i le aso muamua o Ianuari, 1845, ua faaopoopoina le numera o korama i le sefulufa.” E tasi le tausaga mulimuli ane, ua faaopoopoina le numera o korama i le 30.⁵

Vaevaega i Iuta. O le vaevaega o Fitugafulu ina ua taunuu atu le Au Paia i Iuta, na iu ai i le fautuaina atu o le Au Peresitene Sili i le 1883, lea na tuuina mai ai, ia faatasi atu sui o Fitugafulu i se korama o loo i ai i le eria o loo latou nonofo ai.

E pei ona ta’ua, na taliaina e le Alii le fautuaina mai o le Au Peresitene Sili ma folafola mai lea taimi i lea taimi, o le a faaauau ona Ia faaalia mai fesuiaiga talafeagai. E foliga mai o le auiliiliga o faaaliga sa na o le amataga lea!

Korama a Fitugafulu i Siteki ma Misiona. Aperila i le 1953, ina ua pe a ma le 500 le aofai o korama, na faasilasilaina ai e le Au Peresitene Sili, ona o le popole i nisi o Fitugafulu sa le i faatasi atu i se korama, o le a faatulagaina ai se korama a Fitugafulu, e pulefaamalumalu ai ni peresitene se toafitu i siteki po o misiona taitasi na i ai ni Fitugafulu se 36 pe sili atu foi.⁶

I siteki taitasi po o misiona e ititi ifo ma le 36 Fitugafulu, o le a pulefaamalumalu ai se peresitene ma ni fesoasoani se toalua i se iunite, nai lo o se korama. Ona faatulagaina ai lea o iunite ma korama i ni fuainumera sosoo ina ia foia ai le fenumiai. I le 1974 na faamutaina ai iunite o Fitugafulu, ae na tofu siteki taitasi ma se korama. Sa galulue le au peresitene o korama a siteki o ni au peresitene o misiona a le siteki.⁷

I le taimi ua tuanai, ia Mati 1936, na faatulagaina ai le galuega faafaifeautalai faatasi ai ma se misiona i siteki taitasi. O nei misiona a siteki na taitaia e le Aufono Muamua a Fitugafulu, na galulue e ala atu i peresitene o siteki.⁸

Toefaatuina o le Korama Muamua a Fitugafulu. O le konafesi aoao ia Oketopa 1975 na aumaia ai se faatumutumuga taua i le faaauauina o le auiliiliga o faaaliga. Na faasilasilaina mai e Spencer W. Kimball (1895–1985) le toefaatulagaina o le Korama Muamua a Fitugafulu. O lenei korama o Pulega Aoao o le a auauai lava ona faatulagaina faatasi ai ma ni sui se toa 70 ma ni Peresitene se Toafitu.⁹

E tasi le tausaga mulimuli ane, i le konafesi aoao ia Oketopa 1976, na faalauteleina ai le Korama Muamua a Fitugafulu e ala i le faaopoopoga o le Aufono Muamua a Fitugafulu ma Fesoasoani o le Toasefululua. Na faauuina sui uma o le Korama Muamua i le tofi o faitaulaga sili faapena foi i le tofi o Fitugafulu.

Na faamalamalama mai e Peresitene Kimball: “O lenei faiga, o korama taitai e tolu o le Ekalesia na faamaninoina mai i faaaliga—o le Au Peresitene Sili, o le Korama a Aposetolo e Toasefululua, ma le Korama Muamua a Fitugafulu—ua mae’a ona faatulagaina i o latou tulaga e pei ona faaalia mai e le Alii. O lenei faiga o le a mafai ai ona taulimaina lelei galuega mamafatu o loo i ai nei, ma ia saunia ai mo le faateleina o le faalauteleina ma le faatelevaveina o le galuega, e faatali ai mo le aso e toe afio mai ai le Alii e taitai Lana ekalesia ma le malo.”¹⁰

Faamutaina o Korama a Siteki. I le aso 4 o Oketopa, 1986, na faamutaina ai korama a Fitugafulu a siteki uma lava, ma avea ai Fitugafulu i le tulaga faalesiteki ma sui o le korama a toeaina pe faauuina foi i le tofi o le faitaulaga sili. Ma o lea sa faaavanoaina ai le tofi o Fitugafulu mo Pulega Aoao o le Ekalesia.¹¹

Faatuina o le Korama Lona Lua. I le aso 1 o Aperila,1989, na faavaeina ai le Korama Lona Lua a Fitugafulu.¹² O lenei faiga na amataina ai le faatulagaina o Korama e lua a Fitugafulu: o le [Korama] Muamua o Pulega Aoao, o e o le a faamalolo faamamaluina i le 70 o tausaga o o latou soifua, ma le [Korama] Lona Lua, e auauna mo le lima tausaga o ni Pulega Aoao.

Valaauina o Pule Eria. I le konafesi aoao ia Aperila 1995, na faamaloloina uma ai sui risone o le Toasefululua ma na faamamaluina ia Aokuso o le tausaga lava lena, ae faasilasilaina mai ai le tofi o le Pule Eria. (O le sui risone o se valaauga o le Ekalesia na faatulagaina i le 1967 e aoao faamasani ai taitai o siteki ma uarota.)

Na saunoa mai Peresitene Gordon B. Hinckley (1910–2008) e uiga i Pule Eria: “O ni faitaulaga sili ia e filifilia mai taitai poto masani o le Ekalesia o le taimi ua mavae ma le taimi nei. O le a faaauauina a latou galuega o galulue ai nei, ma nonofo i o latou lava aiga, ma auauna i se galuega auauna faaleEkalesia. O le umi o o latou valaauga e eseese lava, e masani lava, e mo se vaitaimi e tusa o le ono tausaga. O le a galulue vavalalata lava ma au peresitene o eria.”¹³

Valaauina o Fitugafulu Eria. E lua tausaga mulimuli ane, ia Aperila 1997, na fofogaina ai e Peresitene Hinckley o le a faauuina Pule Eria o ni Fitugafulu ma o le a ta’ua o Fitugafulu Pule Eria (lea ua valaauina nei o Fitugafulu Eria.) O le amataga lenei o le faatupulaia maoa’e o le numera o Fitugafulu ma o latou tiute.

Na faamalamalama mai e Peresitene Hinckley, “I le avea ai ma Fitugafulu, ua valaauina i latou e talai atu le talalelei ma avea ma molimau faapitoa o le Alii o Iesu Keriso e pei ona tauina mai i faaaliga.”¹⁴

Na faamalamalama mai e Peresitene Hinckley, o nei Uso o le a i ai sa latou fesoota’iga faalekorama. Na ia faatulagaina le Korama Lona Tolu, Fa, ma le Lima o Fitugafulu e faatatau i nofoaga o alala ai.

Ina ua mavae lea, na amata loa ona pulefaamalumalu Fitugafulu Eria i fono faamaopopo a le au faamisiona a le siteki (e aofia ai se peresitene o le misiona ma peresitene uma o siteki i le misiona). Na mulimuli ane toe faaigoaina ai lenei fonotaga o se fono faamaopoopo a le aufono, ma faalauteleina ai mataupu o le fono ina ia aofia ai le tele o polokalama a le Ekalesia ma atugaluga eseese a siteki tuufaatasi.

Faalauteleina o Tiute o le Au Peresitene o Fitugafulu. Ia Aperila 2004 na faamaloloina ai sui o le Au Peresitene o Fitugafulu o ni Pule Faatonu o matagaluega tetele i le laumua, ae tofiaina i ai nisi o Fitugafulu i na tulaga tofi. Ina ua mavae ni nai masina, ia Aokuso 2004, na amata ai ona vaai e le Au Peresitene o Fitugafulu ia eria uma e 11 o le Ekalesia i Amerika i Matu ma fesoasoani i le Toasefululua i le taitaiga o eria uma faavaomalo.

Na amataina ai foi ona fono faatasi le Au Peresitene o Fitugafulu ma le Toasefululua atoa i Aso Lua taitasi. Ua mafai nei ona faalagolago le Toasefululua i le Au Peresitene o Fitugafulu aua o le au peresitene o fitugafulu e “filifilia isi fitugafulu e ese mai [ma] taitai ia i latou” (MFF 107:95).

O Fitugafulu i Aso Nei

O le auiliiliga o faaaliga i le faatulagaga ma tiute o Fitugafulu o loo faaauau pea i aso nei. Lata mai nei na tuufaatasia ai e le Au Peresitene Sili ia eria faavaomalo a le Ekalesia, ma tuuina atu le tele o tiute faaletaitai i Fitugafulu o loo galulue i Au Peresitene o Eria.¹⁵

Pe na faapefea ona malamalama Iosefa Samita i le taimi na ia faauuina ai uluai Fitugafulu, o le a tuputupu ae lenei tofi ina ia aofia ai, i le taimi lenei, le 315 o Fitugafulu i korama e valu i le lalolagi atoa? Ou te molimau atu e lei faapea na tatau lava ona iloa e Iosefa, aua na silafia lava e le Alii ma o le mea na faavaeina e Iosefa o se faavae o aso e gata ai, na faavae i luga o aoaoga faavae o tusitusiga paia ma se “faaaliga vaaia o loo faaalia le faatulagaga tatau a le Au Fitugafulu” (MFF 107:93).

Na i ai le aao o le Alii i le talafaasolopito faaalia o Fitugafulu mai le amataga, ma i faaopoopoga taitasi na sosoo mai ai, na tuu atu ai le tofi o Fitugafulu ia ogatasi ma lona faataatiaga faaletusitusiga paia. Aisea e suesue ai i lenei talafaasolopito faaalia? E pei ona taua e Peresitene Packer, o se “mamanu o faaaliga lava ia.” Ua faaalia mai e le Alii Lona finagalo mo Fitugafulu i lea upu ma lea upu, ma ou te iloa o le a faaauau ona Ia faia faapea mo Fitugafulu—ma mo oe ma a’u o ni tagata taitoatasi o Lana Ekalesia.

O Le a Le Aufono Muamua a Fitugafulu?

Na faatulagaina e le Perofeta o Iosefa le Uluai Aufono a Fitugafulu ina ua ia faatulagaina le Korama Muamua a Fitugafulu i le aso 28 o Fepuari, 1835. O le Uluai Aufono na aofia ai Peresitene e Toafitu o le Korama Muamua. O lenei aufono sa i ai mo se vaitaimi seia oo i le 1976, ina ua valaauina ona sui (luma: Elder S. Dilworth Young, A. Theodore Tuttle, ma Paul H. Dunn; tua: Elder Hartman Rector Jr., Loren C. Dunn, Rex D. Pinegar, ma Gene R. Cook) i le toe faatulagaina o le Korama Muamua a Fitugafulu e avea o ni Pulega Aoao.

O matafaioi ma tiute a le Aufono Muamua na suia i le aluga o tausaga a o faagasolo le faaalia mai o faaaliga, ae o le latou matafaioi le masuia, o le pulefaamalumalu lea i isi Fitugafulu ma ia faataunuuina le galuega ua tuuina atu nei i Fitugafulu.

O Le Faailoaina Mai o Mea Na Tutupu

Fepuari 1835: Na fofogaina mai ai e le Perofeta o Iosefa Samita le o le tofi o Fitugafulu ma le faatulagaina o le Korama Muamua a Fitugafulu.
Mati 1835: Na maua ai e le Perofeta o Iosefa Samita faatonuga e uiga i le valaauga ma le matafaioi o Fitugafulu (tagai MFF 107).
Ianuari 1836: Na maua ai e le Au Peresitene o Fitugafulu o latou faauuga ma faamanuiaga i le Malumalu i Katelani. Mulimuli ane i le masina lava lea, na faauuina ma faamanuiaina ai sui o Fitugafulu i le Malumalu i Katelani.
Fepuari 1836: Na fono ai Iosefa Samita ma nisi o le Usoga e filifilia le Korama Lona Lua a Fitugafulu.
Aperila 1837: Na toe faatulagaina ai Peresitene o Fitugafulu.
Ianuari 1841: Na faataoto mai ai tiute o Fitugafulu (tagai MFF 124:138–39).
Tesema 1844: Na faapaiaina ai le Faletele o Fitugafulu i Navu.
1846: Ina ua tuua e le Au Paia Navu, na faaopoopoina le numera o korama a Fitugafulu i le pe tusa ma le 30.
Aperila 1883: Na faailoa mai ai e le Alii i le Au Peresitene Sili o le a Ia faaali mai Lona finagalo mai “lea taimi i lea taimi” e tusa ai ma le alualu i luma o Lona malo.
1899: Na amata ai ona auai Fitugafulu i se polokalama o aoaoga faamasani a faafaifeautalai i aoga a le Ekalesia.
1904: Na faateleina le numera o korama a Fitugafulu i le 146.
Mati 1936: Na amata ai ona i ai i siteki taitasi se misiona a le siteki, na taitaia e le Aufono Muamua a Fitugafulu.
1953: Na faatulagaina ai korama po o iunite o Fitugafulu i siteki taitasi.
Iuni 1961: Na faauuina ai sui e toafa o le Aufono Muamua a Fitugafulu e avea ma faitaulaga sili, ma faatagaina ai sui o le Aufono Muamua a Fitugafulu e faatulaga ma toefaatulaga au peresitene o siteki.
Ianuari 1964: Na tuuina atu ai i sui o le Aufono Muamua a Fitugafulu le mana e fai ai faamauga.
1967: Na valaauina ai uso e onosefulu ma le iva e avea ma sui risone a le Toasefululua.
Mati 1974: Na faatagaina ai e le Au Peresitene Sili ia peresitene o siteki e faauuina Fitugafulu, pe a maea ai ona faamaoniaina mai e le Aufono Muamua a Fitugafulu.
Oketopa 1974: Na faamutaina ai Iunite o Fitugafulu, ma na faatagaina ai siteki taitasi ia i ai se korama.
1975: Na tofiaina fesoasoani i le Korama a le Toasefululua i fafo atu o Amerika i Matu o ni Pulega Aoao taitai eria.
Oketopa 1975: Na toefaavaeina ai le Korama Muamua a Fitugafulu o se korama a Pulega Aoao.
Aperila 1976: Na faatagaina ai e le Au Peresitene Sili ia Peresitene o le Korama Muamua a Fitugafulu ina ia tuufaasoloina mai lea taimi i lea taimi.
Oketopa 1976: Na faamaloloina ai Fesoasoani o le Toasefululua ma sui o le Aufono Muamua a Fitugafulu, ae valaauina i le Korama Muamua a Fitugafulu.
Oketopa 1976: Na le toe manaomia se faamaoniga mai le Korama Muamua a Fitugafulu mo le faauuina o Fitugafulu a siteki.
Setema 1978: O le a tuuina atu i Pulega Aoao faapitoa le tulaga o le faamalologa faamamaluina.
Fepuari 1980: Na valaauina ai Fitugafulu na auauna atu o ni Pule Faatonu o matagaluega i le laumua o le Ekalesia, i Au Peresitene o Fitugafulu.
Aperila 1984: Na valaauina ai le toaono o sui fou o le Korama Muamua a Fitugafulu e galulue mo le umi e tolu i le lima tausaga, ma faatuina ai se faataitaiga fou mo le umi e galulue ai Pulega Aoao.
Iulai 1984: Na valaauina ai sui o le Korama Muamua a Fitugafulu e avea ma Au Peresitene o Eria e vaaia eria i lalo o le taitaiga a le Toasefululua.
Oketopa 1986: Na faamutaina ai korama a Fitugafulu i siteki.
Aperila 1989: Na faatulagaina ai le Korama Lona Lua a Fitugafulu, na faia mai i tamalii o le a galulue mo le lima tausaga.
Novema 1991: Na faia ai se aiaiga mo sui o le Korama Muamua e auauna atu seia aulia le 70 tausaga o le soifua, ae faamalolo sui o le Korama Lona Lua pe a mae’a le lima tausaga.
Aperila 1995: Na fofogaina mai ai e Peresitene Gordon B. Hinckley le faamalologa o sui risone ae amatalia ai valaauga o Pule Eria ia Aokuso 1995.
Aperila 1997: Na faatulaga ai Korama Lona Tolu, Fa, ma le Lima o Fitugafulu, na faia mai i Fitugafulu Pule Eria.
Iuni 1997: I lalo o le taitaiga a le Au Peresitene o Eria, na amata pulefaamalumalu ai Fitugafulu Pule Eria i le fono faamaopopo a le au faamisiona, e aofia ai peresitene o siteki ma peresitene o misiona.
Me 2001 ma Setema 2002: Na faalauteleina ai fonotaga faamaopoopo a le au faamisiona [a uarota ma siteki] ina ia aofia ai le tele o polokalama a le Ekalesia ma atugaluga eseese a siteki tuufaatasi.
Aperila 2004: Na vaeluaina ai le Korama Lona Lima a Fitugafulu ina ia faia ai le Korama Lona Ono a Fitugafulu.
Aokuso 2004: I lalo o le taitaiga a le Toasefululua, na amata nafa ai le Au Peresitene o Fitugafulu ma le vaaiga o eria uma o le Ekalesia. Na le toe auauna atu ai sui o le Au Peresitene o Fitugafulu o ni Pule Faatonu o matagaluega tetele i le laumua. Na tofiaina ai Peresitene e Toafitu e taitaia eria uma e 11 i Amerika i Matu.
Aperila 2005: Na fatuina ai le Korama Lona Fitu o Fitugafulu mai le Korama Lona Fa. Na vaeluaina le Korama Lona Tolu ina ia fatuina ai le Korama Lona Valu.
Iuni 2008: Na fofogaina mai ai e le Au Peresitene Sili le faateleina o matafaioi a Au Peresitene o Eria.

Tauagavale pito i luga: Ua Faauuina e Iosefa Samita ia Parley P.Pratt o se Aposetolo, na saunia e Walter Rane.

Ua Auina atu Fitugafulu, saunia e Del Parson

Ata na pueina e Craig Dimond

Luga mai le agavale: O uluai sui o le Korama a Aposetolo e Toasefululua ma uluai Fitugafulu na faauuina ia Fepuari 1835. O peresitene e toafitu o le Korama lona 30 o Fitugafulu ma la latou failautusi, i le pe tusa o le 1890. O sui o le Korama lona 88 o Fitugafulu ma o latou aiga, Mati 1897.

O le Korama Muamua ma le Lua o Fitugafulu, 2006.