E Aupito Taua

Ray Taylor, Iuta, ISA

Ina ua ou filifilia le ata vali o le Faaola, sa ula mai ou uso e toalua ma ou tuafafine. O aitema na latou manatu na sili ona taua na i ai pea i meatotino a Tina ma Tama.

Sa matou faatasitasi i le matou fale sa matou nonofo ai a o matou laiti, lea sa nofo ai Tina a o lei maliu i ni nai vaiaso na mavae atu. O le lima tausaga na muamua atu, i le 2001 na maliu ai Tama. O lenei la ua oo i le taimi e vaevae ai a laua meatotino. Sa se’i a matou numera ma filifili aitema, o le tagata na aupito maualalo lana numera na ilo muamua ana aitema.

O le seti i le potumoe na muamua alu, sosoo ai ma le pusaaisa, le laulau ai ma nofoa, ma le taavale o le fausaga tuai. Sa ou filifilia le piano, e ui lava ina ou le ta piano. Sa matou fiafia tele i musika i totonu o lo matou aiga a’o matou ola a’e. Sa masani ona galue Tama o se taitai musika i le uarota, ma sa lelei uma leo o o matou matua. Sa le mafai ona teena e lo’u tama, o se tagata tinoese ma leo lelei, se avanoa e pese ai. E taua tele ia te a’u le piano, ma na faapena foi i le ata vali o le Faaola.

Ina ua ou filifilia le ata vali, lea sa faavaa faatasi ma se kopi “O Le Keriso Soifua: O Le Molimau a Aposetolo,”¹ sa tautau i le puipui o le potu malolo lea sa matou saofafai ai.

I se taimi faapea sa le mafai ona taofi lo’u mafaufau i le Faaola, le ata o le faaolataga, ma le taua tele ia te a’u o o’u matua. Ma sa le mafai foi ona taofi lo’u lagonaina o le agaga faafetai mo le auala na la tausia ai i matou, le aoaoina o i matou i le talalelei, ma faataitaiga sa laua faia mo i matou, e aofia ai ma lo la naunau e auauna atu.

Ina ua valaauina Tama e avea o se epikopo, sa ia faamanatu atu i le peresitene o le siteki ua 70 ona tausaga. “Masalo e sese le tagata ua e filifilia,” o lana tala atu lea.

“E te manatu o le a le matutua o le Usoga o loo i le Aai o Sate Leki?” o le fesili mai lea a le peresitene e tali mai ai. “E le o oe o le matou filifiliga muamua. E le o oe foi o le matou filifiliga lona lua. O oe o le filifiliga a le Alii.”

Na iloa e Tama na valaauina o ia e le Atua, ma na avea o ia ma se epikopo lelei. Sa le o ia o se tagata na fia faalialia. Sa le o ia o se tagata na atamai i tusitusiga paia. Sa na o ia o se alii loto maualalo na faaalia lona manatu popole mo tagata o le uarota.

A o avea Tama ma se epikopo, na avea a’u ma se fesoasoani i se isi au epikopo i le matou siteki. A o matou auai faatasi i fonotaga faaleautaitai, sa oo ina taulai atu le ma mafutaga ia Keriso, ma na mafai ona ou iloa lona itu faaleagaga.

Ina ua valaauina Tama e avea ma se epikopo i le 1994, sa mafatia o ia i faafitauli o le soifua maloloina. “Pe mafai ea e lenei valaauga ona faamaonia lo’u ola pea mo le isi lima tausaga. o lana fesili tausua atu lea i le peresitene o le siteki. E lua tausaga talu ona faamalolo Tama [mai le avea ma se epikopo], ae maliu loa.

O nei manatu na lolofi mai i lo’u mafaufau a o faamaea ona matou vaevaeina meatotino a o matou matua. Ina ua ou foi mai i le fale, sa ou vaavaai mo se tulaga lelei e tautau ai le ata vali o le Faaola. Ina ua ou liliuina le ata, na ou te’i i lou vaaia na saunia o se saafiafiga mo lo’u tama: “O le a matou manatua pea Epikopo Taylor o se alii e tinoese ma se loto e tutusa lelei lava.” Na sainia e le au peresitene o le matou siteki: “Peresitene Cory, Peresitene Carter, Peresitene Stubbs.”

Na faafuasei lava ona avea le ata vali o se mea ua sili atu le taua ia te a’u. O loo tautau pea lea ata i le puipui o lo matou fale i luga a’e o le piano a o’u matua. O loo i ai pea i lo matou fale tuai nisi o mea ua uma ona filifilia ae e le’i aveeseina mai. E le afaina lea. Ua ia te a’u ni mea e sili atu ona taua.

Ina ua ou liliuina le ata vali, na faafuasei ona avea ma se mea na sili atu le taua ia te a’u.