Na Veikacivi nei Peresitedi Monson Vei Ira Me ra Kaulotu, ka Kacivaka e Lima na Valetabu Vou
A dolava o Peresitedi Thomas S. Monson na iKa 180 ni Koniferedi Raraba Vakayabaki, a vakayacori ena Vakarauwai kei na Sigatabu, ena 2 kei na 3 ni Okotova, 2010, ka kacivi ira kina vakalewe levu na lewenilotu me ra laki kaulotu ka kacivaka talega vakakina e lima na valetabu vou.
A veikacivi tale vakakina o Peresitedi Monson vei ira “na cauravou bula kilikili yadua” me ra vakarautaki ira ki na veiqaravi oqo; ka kidavaki ira na goneyalewa era gadreva me ra laki veiqaravi vakakina; ka vakaraitaka ni gadreva tu na Lotu “e vuqa vakavuqa na veiwatini qase daukaulotu” me a laki veiqaravi yani.
“Na veiqaravi vakadaukaulotu e itavi ni matabete,” a kaya, ni sa “dua na itavi e namaka vei keda ka sa soli sara vakalevu vei keda na ka na Turaga.”
E kacivaka kina o Peresitedi Monson ni lima na valetabu vou oqo era na tara tiko e Hartford, Connecticut, e Amerika; Indianapolis, Indiana, e Amerika; Lisbon, e Potukali; Tijuana, e Mexico; kei Urdaneta, ena Filipaini.
Mai na lima na valetabu vou oqo sa na 23 taucoko kina na levu ni valetabu era sa mai kacivaki se sa tara tiko. Ni ra tara oti na 23 na valetabu oqo, sa na 157 taucoko kina na kedra iwiliwili ena Lotu e vuravura raraba.
“Eda tomana tikoga na tara valetabu,” e kaya o Peresitedi Monson. “… Meda yalodina tikoga ena curuma na valetabu, ka ra sa tara voleka tikoga vei ira na noda lewenilotu” (“Ena Noda Mai Sota Vata Tale,” Liaona kei na Ensign, Nove. 2010, 4).
Na valetabu vou e Potukali, Indiana, kei Connecticut era sa kena isevu tiko ena Lotu. Na Valetabu e Urdaneta sa kena ikatolu tiko ena Lotu ena Yatu Filipaini kei na Valetabu e Tijuana sa na ika tinikatolu tiko ni valetabu e Mexico.
Ena ono na vula ena tadrua ni koniferedi raraba ni Epereli kei na Okotova, sa vakatabuya kina na Lotu e va na valetabu vou: Na Gila Valley Arizona, Vancouver British Columbia, Cebu City ena Filipaini, kei Kyiv e Ukraine. Sa namaki tiko me vakatabui tale na Valetabu e Laie Hawaii ena 21 ni Noveba, 2010, ni oti na kena vakavinakataki.