Na Yalo Tabu kei na iVakatakila
Na Yalo Tabu ka ikatolu ni Lewetolu Vakalou, vata kei na Tamana kei na Luvena, e kila o Koya na ka kecega.
Niu dua na daukaulotu gone kau se qai yabaki dua ena buturara ni kaulotu niu wilika tiko na ivolanikalou kei na nodra vosa na iApositolo ni gauna oqo me baleta na ivakatakila kei na Yalo Tabu, au a liaca vakasauri e dua na ka. E se bera tu ni dua na noqu ivakadinadina vakataki au, vakauasivi me baleta na Tamada kei na Luvena. Au lako tu ki kaulotu ena rarama kerei mai vei rau na noqu itubutubu vakasakiti. Niu sega ni dau lomalomaruataka na nodrau vosa, au sega mada ga ni bau vakasamataka meu vakasaqara na noqu ivakadinadina vakayalo vakataki au. Ena dua na bogi ni Feperueri e San Antonio, Texas, ena 1962, au kila kina ni dodonu meu kila vakataki au. Ena neitou vale redetaki lailai au raica kina e dua na vanua ena rawa niu masu duadua kina ena domo levu, ka vakatakekere, “Tamaqu mai Lomalagi, o ni tiko beka oqori? E dodonu meu kila vakataki au!”
Ena dua na gauna e muri ena bogi ko ya, au mai kila kina vakataki au ena imatai ni gauna ena noqu bula, rau tiko dina na Kalou kei Jisu. Au sega ni rogoca e dua na rorogo ni domo kau sega talega ni raica e dua na tamata vakalomalagi. Au kila ena sala vata ga, o ni a kila talega kina oi kemuni—o ya ena “isolisoli ni Yalo Tabu e sega ni vakamacalataki rawa” (V&V 121:26) kei na yalo ni ivakatakila (raica na V&V 8:1–3), ka vakacegu kina na yalo[qu] (raica na V&V 6:23) ka vakaukauwataka na noqu vakabauta (raica na Alama 58:11).
Mai na veika oqori, au sa vakadinadinataka kina na ivakasala nei Alama meu “yadra mada ka vakasama ka rogoca na [Nona] vunau” (Alama 32:27). Na ivunau oqori se na sore ni itei era sa tubu me ra vunikau, io me ra vunikau vakaitamera ni ivakadinadina. E tomani tiko na iwalewale oqo me levu cake na kena vakatovolei na vosa ka basika kina eso tale na vunikau ni ivakadinadina, sa yaco oqo me dua na veikau dina ena vuku ni ivakatakila mai vua na Yalo Tabu.
Na Yalo Tabu e Dua na iSolisoli Gadrevi
Ena Nona veisiko na iVakabula ki Amerika a kacivi iratou e tinikarua na tisaipeli. E dua na Nona itukutuku vei iratou kei ira na tamata e baleta na Yalo Tabu. Ni oti na nona vakatavulici ira, a lako yani na iVakabula ka yalataka ni na qai lesu tale yani ena siga ka tarava. Era a ia tikoga na tamata ena bogi taucoko me ra vakasoqona na levu ga ni tamata e rawa me ra vakarorogo Vua.
Eratou a vakasokumuni ira na tamata o iratou na tisaipeli ena tinikarua na iwasewase me ratou vakavulici ira ena veika a vakatavulica vei iratou na iVakabula. Ratou a vakavulica taumada na ivakavuvuli na bibi ni Yalo Tabu. (Raica na 3 Nifai 11–18.) Era sa qai tekiduru ka masu na tamata. Na nodra gagadre mai vu ni yalodra o ya me soli vei ira na Yalo Tabu (raica na 3 Nifai 19:8–9).
A rairai vei iratou na iVakabula ka taleva tale na bibi ni Yalo Tabu ena Nona masu vei Tamada:
“I Tamaqu, au sa vakavinavinaka vei Kemuni ni ko ni sa solia na Yalo Tabu vei iratou kau sa digitaka; ia au sa digitaki iratou; …
“I Tamaqu, au sa kerei Kemuni mo ni solia talega na Yalo Tabu vei ira kece sa vakabauta na nodratou vunau” (3 Nifai 19:20–21).
Me vaka na veika a yaco oqo ena iVola i Momani, au sa qai kila vakavinaka na vuna e kaya kina o Peresitedi Wilford Woodruff ni “isolisoli ni Yalo Tabu sai koya na isolisoli cecere duadua e rawa ni soli vua na tamata. …
“Na Yalo Tabu e sega ni vakatarai walega vei ira na tagane se iapositolo se parofita; era taukena talega vakayadua na tagane kei na yalewa yalodina, kei ira na gone yadua era sa qase cake me ra ciqoma na kosipeli i Karisito” ( Nodra iVakavuvuli na Peresitedi ni Lotu, Wilford Woodruff (2004), 54).
Na iVakatakila e Solia na iWali ena Gauna ni Leqa
Na Yalo Tabu ka ikatolu ni Lewetolu Vakalou, vata kei na Tamana kei na Luvena, e kila o Koya na ka kecega. (raica na V&V 35:19; 42:17). E vica na nona itavi bibi, ka bibi duadua vei ira me veivakavulici ka vakadinadinataka na Tamana kei na Luvena (raica na 3 Nifai 28:11). Eso tale na nona itavi me vakatakila na dina ni ka kecega (raica na Moronai 10:5), e liutaki keda ko Koya me da caka vinaka (raica na V&V 11:12).
E ivakaraitaki ni itavi bibi oqo ni liutaki me caka vinaka o Peresitedi Monson. E muria o koya na nona ivakaraitaki na iVakabula “ko koya ka lako voli ka dau caka vinaka” (Cakacaka 10:38). Sa vakavuvulitaka ko Koya na bibi ni noda sega ni vagaluya e dua na veivakauqeti vakayalo ni Yalo Tabu, mo sikova e dua ka qaravi ira ka vueti koya mai na dua.
Ia ena so na gauna ena sega ni dua me vakataki Peresitedi Monson, sega na dauveituberi ni matavuvale, sega na marama dauveikauwaitaki me veiqaravi ena gauna ni leqa. Ena veigauna vakaoqori, au sa dau lako mai meu kunea na vakacegu kei na veidusimaki mai vua na Dauveivakacegui, e dua tale na itavi ni Yalo Tabu (raica na V&V 36:2).
A sucu o Quinton na makubui keirau tagane ka levu sara na leqa e vu mai na nona sucu ka bula walega me ciwa na vula, ena loma ni gauna oqori a curu suka tiko kina mai valenibula. Keirau a vakaitikotiko e Argentina kei Sisita Jensen ena gauna ko ya. Keirau a vinakata sara ga vakalevu me keirau tiko vata kei ira na luvei keirau ena gauna ko ya me keirau vakacegui ira ka ra vakacegui keirau. Oqo na makubui keirau, keirau dau lomana ka keirau vinakata me keirau tiko volekati koya. Sa rawa ga ni keirau masu, ka keirau sa mani gumatuataka sara!
Keirau a lako voli kei Sisita Jensen ena veisiko wavoki ena tabana ni kaulotu ena gauna keirau taura kina na itukutuku ni leqa nei Quinton. Keirau duri tu ena loma ni dua na valenilotu keirau veimokomoko ka veivakayalovinakataki vakataki keirau. Au vakadinadinataka vei kemuni ni a yaco mai na veivakadeitaki ni Yalo Tabu, e dua na vakacegu ka sivia na veika kecega e kilai rawa ka tomani tiko me yacova mai na siga nikua (raica na Filipai 4:7). Keirau vakadinadinataka talega na isolisoli sega ni vakamacalataki rawa ni Yalo Tabu ena nona bula na luvei keirau tagane kei na vugoi keirau kei ira na luvedrau ka ra se dau talanoataka tu ga ena gauna oqo ena vakabauta, kei na vakacegu kei na yalovinaka na gauna ko ya.
Na iVakatakila kei na iVola i Momani
Na isolisoli vata oqori ni ivakatakila sa vakaukauwataka na noqu ivakadinadina ni iVola i Momani. Au sa wilika, vulica, vakasaqara ka kana magiti mai kina ena veigauna. Sa vakatakila vei au na Yalo Tabu na kena dina kei na kena vakalou.
E vakatoka ko Peresitedi Gordon B. Hinckley na iVola i Momani me dua vei ira na va na vatunitutu yaga sara ni Lotu, na kena vo na iMatai ni Raivotu nei Josefa Simici, na vakalesui mai ni matabete kei na io sa dina sara, na noda ivakadinadina me baleti Jisu Karisito, na vatunitutu liu (raica na Efeso 2:19–21). “Na va na isolisoli cecere oqo ni Kalou,” e vakamacalataka o koya, “sai koya na vatunitutu sega ni yavalati rawa ka ikelekele ni Lotu i Jisu Karisito ni Yalododonu Edaidai, ka vakatalega kina na nodra ivakadinadina kei na nodra yalayala yadua na lewena” (“Four Cornerstone of Faith,” Liahona, Feb. 2004, 7).
Na va na isolisoli ni Kalou oqo sa yaco me ra ikelekele ni noqu vakabauta kei na ivakadinadina, era a vakadeitaki yadua vei au mai vua na Yalo Tabu. Ia, au na vinakata meu goleva mada ena vica na miniti e rua vei rau na isolisoli vatunitutu oqo—na iMatai ni Raivotu kei na iVola i Momani. Erau sa ka bibi sara baleta ni rau tekivu ruarua ena matavuvale, ka ra sucu kina na gone mai vei rau na itubutubu vinaka ka ra vakavulici vakavinaka mai vei rau (raica na 1 Nifai 1:1). Na veika e yaco ena nodrau bula o Liai kei Josefa Simici erau tautauvata (raica na1 Nifai 1 kei na Josefa Simici—Ai Tukutuku 1):
-
E bibi ruarua na ka e gadrevi. Na itavi nei Liai me vakabulai koya kei na nona matavuvale mai na kena sa vakarau vakarusai ko Jerusalemi kei na itavi nei Josefa Simici me kila se lotu cava e dina.
-
Erau a dui masu.
-
Erau dui raica na raivotu ni Tamana kei na Luvena.
-
E dui soli vei rau e dua na ivola.
-
Erau a vunau ruarua.
-
Erau dui ciqoma na ivakatakila mai na Yalo Tabu kei na raivotu kei na tadra.
-
E muri, era a vakarerei rau na tamata ca. Eratou a dro bula o Liai kei na nona matavuvale. Ko Josefa a vakamatei ena vuku ni nona vakabauta.
Eda na vakataroga beka kina na nodra dau sureti ira na dauvakasaqara ena yalodina o ira na daukaulotu na dina me ra tekivuna na nodra vulica na iVola i Momani ena 1 Nifai? Na ivola oqo e vakasinaiti tu ena Yalo ni Turaga. Ena veiwase taumada e matata na kena itukutuku ni ivakatakila kei na Yalo Tabu e dau soli sega walega vei ira na parofita ia vei ira talega na tama kei na tina kei ira na gone.
Na itukutuku me baleta na ivakatakila kei na Yalo Tabu e kuruseta na iVola i Momani. Na dina eso oqo e umana vata na parofita o Josefa Simici, “Ni kau laivi na iVola i Momani kei na ivakatakila kece, sa qai evei beka na noda Lotu? E sa na sega” (Nodra iVakavuvuli na Peresitedi ni Lotu: Josefa Simici [2007], 222).
Me vaka ni da Yalododonu Edaidai, na noda ivakadinadina ni iVola i Momani ka soli vei keda mai na ivakatakila, sa vakadeitaka vei keda ni sa dina sara na lotu oqo kei na kena vunau (raica na ivakamacala taumada ni iVola i Momani).
Era ka tabu ka dredre ni vakamacalataki na veika ni Yalotabu. Oi keda, me vakataki Amoni, eda sa vunautaka, “Raica au sa kaya vei kemudou, sa sega mada ga ni rawa vei au meu vakamacalataka vakavinaka na levu ni noqu vakacaucautaki koya” (Alama 26:16).
Ia, au vakadinadinataka ni sa bula dina tiko na Yalo Tabu ni sai Koya na dauniivakadinadina, dauvakatakila, dauveivakacegui, dauveidusimaki, ka dauveituberi vakalou.
Au vakadinadinataka ena yalomalumalumu ni Lotu dina ka bula oqo, na vakabauta oqo e dabe ena va na vatunitutu oqo. Au vakadinadinataka ni o Jisu Karisito sai koya dina sara na vatunitutu liu (raica na Efeso 2:19–21). Na parofita ni Turaga o Peresitedi Thomas S. Monson ka ra parofita, daurairai, iapositolo, ka dauvakatakila o ira na turaga le 15 era dabe tiko oqo e dakuqu. E tu vei ira na matabete tabu kei na idola ni matanitu. Au lomani ira ka tokoni ira ena yaca i Jisu Karisito, emeni.