Mo Nodra iVakarau Era sa Vakabauta
Se da daukaulotu tudei se lewenilotu, sa dodonu me da nodra ivakaraitaki vinaka o ira sa vakabauti Jisu Karisito.
Kemuni na taciqu lomani, ena yakavi nikua eda soqoni vata ena vuqa na veivanua e vuravura raraba. Era tiko maliwai keda na daukaulotu vakasakiti. Au vinakata meu sureti ira kece sara na daukaulotu tudei me ra tucake. Na vanua cava ga o ni tu kina, kemuni na italatala kei na mataveiliutaki ni kaulotu, ni yalovinaka ni tucake. Keimami vakavinavinakataki kemuni vakayadudua! Vinaka vakalevu! Keimami lomani kemuni! Ni dabe sobu tale.
Ena veigauna eso e dodonu me da dau nanuma tale na vuna era tu kina na daukaulotu. E sa baleta ni sa ikoya e dua na ivakaro mai vua na Turaga, nona kaya:
“O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu:
“Vakavulici ira me ra vakabauta na veika kece kau a vosa kina vei kemudou: ka mo dou kila, au sa tiko vata kei kemudou ena veisiga kecega, ka yacova na ivakataotioti kei vuravura.”1
Na ivakaro oqo e dua vei ira na vuqa sa vakavoui baleta na kena sa vakalesui mai ena kena taucoko na kosipeli i Jisu Karisito. Era sa veiqaravi tu ena gauna oqo na daukaulotu me vaka ga ena gauna ni Veiyalayalati Vou. E vakamacalataki ena Cakacaka na nodra cakacaka taumada ni kaulotu na iApositolo kei ira na tisaipeli tale eso ni oti na nona veiqaravi na Turaga ena bula oqo. Eda wilika kina na vakasakiti ni nona saumaki mai o Saula mai Tasisi,2 o koya a dau cavuta tiko na “vosa vakacudrucudruya kei na veivakamatei vei ira sa lotu vua na Turaga”3 ka dau vakacacani ira na lewe ni Lotu se qai tauyavu. Mai na itekitekivu vakaoqori, a yaco ko Saula me ko Paula sa saumaki mai, e dua na Nona daukaulotu cecere na Turaga. Na iotioti ni 15 ni iwase ni Cakacaka e tukuni kina na cakacaka ni kaulotu nei Paula kei ira na nona itokani.
Ena dua nona ivola kivua e dua nona itokani dau nuitaki koya vakalevu, a vola o Paula vua na gone o Timoci, “Me kakua ni beci iko e dua ni ko sa cauravou; ia mo yaco mo nodra i vakarau era sa vakabauta, ena vosa, ena ivalavala, ena loloma, ena lomadina, ena yalosavasava.”4 Na ivakasala oqori e matata vakavinaka sara tu ga vei keda ena gauna oqo me vaka ga ena gauna e liu. E baleti ira na noda daukaulotu tudei; ka baleti keda vakatautauvata na lewe ni Lotu. Se daukaulotu tudei se lewenilotu, sa dodonu me da nodra ivakaraitaki vinaka o ira sa vakabauti Jisu Karisito.
Daukaulotu Tudei
O ira na daukaulotu tudei, e rauta ni 52,000 se sivia, era veiqaravi voli ena 340 na tabana ni kaulotu e vuravura raraba. Era tamata vakabauta ka italai yalodina ni Turaga. Na nodra inaki me ra “sureti ira na tamata kecega me ra lako mai vei Karisito ena nodra vukei ira me ra ciqoma na kosipeli vakalesui mai ena nodra vakabauti Jisu Karisito kei na Nona Veisorovaki, ka veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”5
Me vakataki Timoci, e vuqa vei ira na daukaulotu tudei era cauravou. Eso era goneyalewa; eso era daukaulotu itabaqase. Eda lomani ira yadua! Era veiqaravi na daukaulotu me vakavinakataki cake kina na nodra bula na luvena na Kalou. Na Tamada Vakalomalagi e lomani ira vakayadua na Luvena. Me vaka, ni Tamadra. E vinakata me vakalougatataki ira ena Nona isolisoli cecere duadua, sa ikoya na bula tawamudu.6 Era sa dau veivakavulici kina na daukaulotu ena veivanua kecega era veiqaravi kina. Era vukei ira na tamata me ra vakatorocaketaka na nodra vakabauta na Turaga, veivutuni, papitaiso, ciqoma na Yalo Tabu, ciqoma na cakacaka vakalotu ni valetabu, ka vosota ena yalodina ki na ivakataotioti. Na Nona cakacaka kei na nona lagilagi na Kalou—“me ra tucake tale mai na mate na tamata kecega ka rawata na bula tawamudu,”7—sa nodra cakacaka tabu ka nodra lagilagi talega vakayadua na daukaulotu.
Eda gadreva me levu cake na daukaulotu—me levu cake na daukaulotu bula kilikili. Ena Nona veiqaravi e vuravura a tukuna kina na Turaga vei ira na Nona tisaipeli, “E dina sa vakalewe na yabaki, a ra sa lewe lailai ga na ivakatawa ni were: o koya mo dou qai masuti koya na iTaukei ni were, me tala yani eso na ivakatawa ni were ki na nona were.”8
Ena soqoni ni koniferedi raraba ena mataka nikua, na noda Peresitedi lomani o Thomas S. Monson e sa vakamasuti kemuni vakabibi na gone tagane ni Lotu oqo mo ni vakarautaki kemuni vakayadua me baleta na veiqaravi ni kaulotu. Au sa nuitaka ni na kauwaitaki vakabibi na nona itukutuku ena veivuvale kece sara ena Lotu.
Me ikuria ni ivakasala yalomatua nei Peresitedi Monson, na noqu ivakadinadina. Ena noqu matavuvale, au sa dikeva toka na veivakalougatataki e dui yaco mai vei ira na daukaulotu. Me yacova mai na gauna oqo, na iwiliwili ni luvei keirau, makubui keirau, kei na dui watidra era sa kacivi me ra daukaulotu tudei e 49, na iwiliwili o ya ena toso tikoga. Ena veigauna yadua oqori au sa dikeva toka na tubu cake ni yalomatua, na vakatulewa matau, kei na seraki ni vakabauta ka vakaraitaki mai vei ira yadua na daukaulotu. O ira, me vaka ga na itabatamata taumada mai vei ira, era qarava na cakacaka ni Kalou “mo dou qaravi Koya ena yalomudou [taucoko], na nomudou kaukauwa taucoko, kei na nomudou nanuma kece ga.”9 Na veiqaravi ni kaulotu e sa vukea na kena vakataucokotaki na nodra ilesilesi vakalou.
Lewenilotu Daukaulotu
Na ivakasala nei Paula, “Mo nodra ivakarau era sa vakabauta,” sa baleti keda vakatautauvata na lewenilotu. E vuqa era se bera se era na sega sara beka ga ni daukaulotu tudei. Ia e rawa ni da lewenilotu daukaulotu. Na malanivosa o ya au nanuma lesu kina na itukutuku ni dua na ka lasa a yaco. A biu tu e dua na itukutuku ena loma ni dua na rara ni qito levu ena dua na koronivuli ni kaulotu. Ka vakaoqo, “Ira ga na Daukaulotu!” O ira na vinakata me ra laki qito talega ena rara ko ya era qai vakabira e dua na itukutuku vou ka ra cakava ga. Ka vakaqo na nodra itukutuku, “Na Lewenilotu Kece e Daukaulotu!”
Na lewenilotu yadua e rawa ni nodra ivakaraitaki o ira na vakabauta. Kemuni na taciqu, me vaka ni da tisaipeli i Jisu Karisito, e rawa vei keda yadua me da bula me vaka na Nona ivakavuvuli. E rawa mo “dou kaya ni dou sa savasava”; e rawa mo “dou raica yani na i serau ni [mata] ni Kalou.”10 Me ra raica na nomudou ivalavala vinaka.11 Sa vu mai Vua na rarama sa vakararamataki kemudou.12 Ena rarama oqori, e vinaka mo dou vakarautaki kemudou ena taro eso ena yaco mai. E veivakasalataki kina vakaoqo o Pita na iApositolo: “Mo dou vakarau tiko mo dou tukuna vua na tamata yadua sa tarogi kemudou, na vu ni inuinui sa tu e lomamudou.”13
Me veiganiti ka marautaki na nomudou isau ni taro. Ia me veiganiti vinaka vei koya e taro mai, na kena isau. Nanuma, o koya talega e luve ni Kalou, na Kalou vata sara ga e vinakata tu vakalevu me rawa talega vua na tamata oqori me rawata na bula tawamudu ka lesu tale yani Vua ena dua na siga. O iko sara beka ga mo na dolava vua na katuba ki na nona vakabulai kei na nona kila na ivunau i Karisito.14
Ni sa oti na imatai ni nomu isaunitaro, vakarau mo cavuta na ikalawa e tarava. O na sureta beka na nomu itokani me lako vata kei iko ki lotu. E vuqa na noda itokani era sega tu ni kila ni ka marautaki nodra lako yani ki na noda vale ni lotu.“Lako mai ka raica” oqori na nona veisureti na iVakabula vei ira era gadreva me ra vulica eso tale na ka me baleti Koya.15 Na veisureti me lako mai ki Lotu vata kei iko, se vakaitavi ena itaviqaravi ni veimaliwai se veiqaravi ni Lotu, ena veivuke me vakayalia na italanoa lasu ka ra logaloga vinaka kina na vulagi ena keda maliwa.
Me vaka ni da lewe ni Lotu, dolele yani vei ira o sega tu ni kila, ka kidavaki ira vakavinaka. Ena veisigatabu dodoka yani na liga ni veitokani ki vua e dua mada ga na tamata o sega tu ni kila e liu. Ena veisiga yadua ni nomu bula, segata mo vakalevutaka na nomu veitokani.
E rawa mo sureta e dua na nomu itokani me wilika na i Vola i Momani. Vakamacalataka ni sega ni ivola ni italanoa se itukutuku makawa. Oqori e dua tale na ivakadinadina kei Jisu Karisito. Na kena inaki levu duadua sa ikoya “me ra kila kina na Jiu kei ira na Matanitu tani ni sa Karisito ko Jisu, na Kalou Tawamudu, ka sa vakaraitaki koya vei ira na veimatanitu kece ga.”16 E tiko e dua na kaukauwa ena ivola oqo ka rawa me tara na lomadra ka laveta cake nodra bula o ira era vakasaqara ena yalodina na dina. Sureti ira na nomu itokani me ra wilika ena yalomasumasu na ivola oqo.
A kaya na Parofita o Josefa Simici “ni i Vola i Momani e dua na ivola dina mai na ivola kece ga e vuravura, ka sa vatu ivakadei ena noda vakabauta vakalotu, kei na nona voleka vua na Kalou e dua na tamata mai na nona muria na ivakaro, vakatauvatani mai na ivola tale eso.”17 Na iVola i Momani e vakatavulica vei keda na Veisorovaki i Jisu Karisito ka iyaya me vakayacora kina na Kalou na nona yalayala taumada me vakasoqoni ira vata mai na Isireli era sa veiseyaki tu ena gauna oqo.18
Ena vuqa na yabaki sa oti, e rua na noqu itokani—e dua na nasi kei na watina vuniwai—erau taroga vei au se cava na vuna au bula tiko kina vakaoqo. Au sauma ka vaka, “Baleta niu kila ni dina na iVola i Momani.” Au solia me rau vakayagataka na noqu ivola, kau sureti rau me rau wilika. Ni oti e dua na macawa erau vakalesuya tale mai na ivola kei na dua na kena vakamalua ni “vinaka vakalevu.”
Au sauma ka vaka, “Na cava na ibalebale ni vinaka vakalevu? O ya e dua na malanivosa sega sara ga ni veiganiti mai vua e dua sa wilika na ivola oqo. O drau sa wilika, se sega! Drau yalovinaka drau kauta lesu tale ka wilika; oti au na qai kerea tale na noqu ivola.”
Erau vakadinadinataka ni rau a cereka walega na drauna, erau a ciqoma na noqu veisureti. Ni rau vakasuka mai erau kaya ena luluvu, “Keirau sa wilika na iVola i Momani. Keirau kila ni dina! Keirau vinakata me keirau kila eso tale na ka.” Erau a vulica eso tale na ka, ka noqu na galala meu papitaisotaki rau.
E dua tale na sala e rawa ni o wasea kina na kosipeli sa ikoya mo sureti ira na nomu itokani me ra sotavi ira na daukaulotu tudei ena nomu vale. O ira oqo era kacivi ka vakarautaki me ra vulica na kosipeli. O ira na nomu itokani, ena logaloga vinaka ni nomu vale kei na nomu veivakadeitaki e veigauna, e rawa ni ra tekivuna na nodra ilakolako ki na veivakabulai kei na bula vakalou. E kaya na Turaga, “Dou sa lesi mo dou vakasoqoni ira vata na noqu tamata digitaki; raica era na rogoca na domoqu na noqu tamata digitaki ka sega ni vakaukauwataka na yalodra.”19
E tukuna vei keda na ivolanikalou ni “era sa lewe vuqa sara … e vuravura, era sa sega ni kila rawa na ka dina, ni ra sa sega ni kila na vanua me ra vakasaqara kina.”20 E sega beka ni nomu madigi o ya? E rawa ni o yaco mo nodra tisaipeli me ra kunea kina!
Ena gauna oqo ni Initaneti, era sa tu na veisala vovou ka taleitaki e rawa ni o cakava kina na cakacaka ni kaulotu. E rawa ni o sureti ira na nomu itokani kei na wekamu ena vale kadua me sikova na mataveilawa vou ni mormon.org. Kevaka e tu na buloqu kei na veisemati eso ni veimaliwai ena initaneti, e rawa ni o semata na nomu mata ki na mormon.org. E rawa ni o qai bulia mai kea na kemu itukutuku vakataki iko. Na itukutuku yadua e tiko na kena ivakamacala ni veika e vakabauti, na veika sa sotavi, kei na dua na ivakadinadina. Me vaka ni oqo e dua na ka vou, e vuqa na itukutuku oqo era tu ena vosa Vakavalagi. Ena muria na itukutuku ena so tale na vosa.
Na veitukutuku oqo e rawa ni veivakauqeti vakalevu sara ki na vinaka. Ena rua na vula sa oti, e dua na cauravou na yacana o Zach—e dua na curuvou ki na vuli torocake—a raica e dua na itukutuku ni mormon.org ena retioyaloyalo mai Baton Rouge, Louisiana. A semati koya ki na mataveilawa ka vakauqeti mai na kedra itukutuku na lewe ni Lotu. Ena noda mataveilawa a kunea kina na isema ka tukuna vua na vanua e rawa ni laki lotu kina. Ena Sigatabu ka tarava, ni vakasote vulavula tu ka vakaneketai, a lako yani ki lotu, a vakaveikilaitaki vei ira na lewe ni tabanalevu, ka marautaka na tolu na auwa ni soqoni. A sureti ki na nona vale e dua na lewenilotu me laki vakayakavi, tarava yani na imatai ni nona lesoni ni kaulotu. Ni bera ni oti na ikarua ni macawa, sa papitaiso ka vakadeitaki me lewe ni Lotu.21 O sa kidavaki, Zac! (o koya vakarorogo tiko mai.)
O ira yadua na ivakaraitaki vinaka ni tisaipeli kei Jisu Karisito e rawa ni ra yaco me ra lewenilotu daukaulotu mana sara. E rawa ni ra veitauriligataka na daukaulotu tudei kei ira na lewenilotu na kena kau yani na veivakalougatataki ni kosipeli vei ira na nodra itokani kei ira na wekadra vakamareqeti. E vuqa vei ira era Isireli, ka ra sa vakasoqoni tiko oqo me vaka na yalayala. Oqo na tiki kece ni kena vakarautaki na iKarua ni Nona Lako Mai na Turaga.22 E vinakata o Koya vei keda yadua me da nodra ivakaraitaki dina sara na vakabauta.
Au kila ni bula tiko na Kalou. O Jisu na Karisito. Oqo na Nona Lotu. E dina na iVola i Momani. O Josefa Simici na kena dauvakavakadewa ka parofita ni ivakataotioti ni gauna oqo. O Peresitedi Thomas S. Monson na parofita ni Kalou nikua. Au vakadinadinataka ena yaca tabu i Jisu Karisito, emeni.