Me Yacova ni da Qai Sota Tale
Sa dodonu meda vosota me yacova na ivakataotioti, ka ni noda takete na bula tawamudu ena nona iserau na Tamada mai Lomalagi.
Kemuni na taciqu kei na ganequ, sa vuabale na yaloqu ni da sa mai sogota na koniferedi raraba totoka oqo ni Lotu. Eda sa vakani vakayalo ena noda vakarogoci ira na sa vosa ka wase ivakadinadina vei keda ena veisoqoni yadua. Au vakadeitaka niu sa vosa tiko ena vukumuni na lewenilotu ena veivanua kece sara ena noqu vakaraitaka na noqu vakavinavinaka ena vuku ni dina eda sa tuberi kina. Sa na rawa ni da vakavoqataka na vosa e kune ena iVola iMomani, na ka era kaya o ira era rogoca na vosa nei Penijamini na Tui ka kaya, “kaci vata mai, ka kaya: Io, keimami sa vakabauta na vosa kece ko ni sa tukuna, keimami sa vakadinata talega ni sa ka vakaidina sara, raica sa cakacaka yaco na Yalo ni Turaga sa Kaukauwa.”1
Au nuitaka ni da na taura na gauna me da vakawilika na vosa ni koniferedi, ka na tabaki tiko ena Ensign kei na Liaona ni vula o Noveba, ni na ganita meda na vulica sara vakavinaka.
Sa dua na ka ni veivakalougataki ni da mai sota eke, ena loma ni Vale ni Koniferedi oqo, ena yalo vakacegu, logalogavinaka ka taqomaki. Eda kila ni sa kaburaki sara ga na koniferedi oqo ki na veimatanitu, ka takosova na wasawasa vei ira na tamata ena veivanua. Dina ni keimami yawa mai na levu sara vei kemuni, keimami vakila na yalomuni ka vakauta yani na neimami loloma kei na vakavinavinaka vei kemuni.
Vei kemuni na Veitacini ko ni sa vagalalataki ena koniferedi oqo, au gadreva meu vakavinavinaka sara vakalevu vei kemuni ena vuku ni veiyabaki ko ni a yalodina tu mai kina ena veiqaravi. Sega ni wili rawa o ira era sa vakalougatataki ena vuku ni nomuni a vakaitavi tu mai ena cakacaka ni Turaga.
O ira na Matasere na Tabernacle kei na veimatasere era vakaitavi ena veisoqoni era a vakarautaka na sere vakalomalagi ka kuria na totoka ni veika e yaco eke nikua. Au vakavinavinaka vei kemuni ena nomuni mai wasea eke na nomuni taledi kei na kila ena lagasere.
Au lomani rau ka vakavinavinaka vakalevu vei rau na noqu daunivakasala yalodina, Peresitedi Henry B. Eyring kei Peresitedi Dieter F. Uchtdorf. Erau sa turaga yalomatua ka kila ka, ka sa veivuke sara vakalevu na nodrau veiqaravi. Au na sega ni cakava rawa na ka e dodonu meu cakava kevaka a sega na nodrau veitokoni kei na veivuke. Au lomani ira ka qoroi ira na Taciqu ena Kuoramu ni iApositolo Le Tinikarua, kei ira kece sara ena Kuoramu ni Vitusagavulu vakakina ena Matabisopi Vakatulewa. Era veiqaravi ena yalodina ka vuavuai vinaka na nodra veiqaravi. Au vakaraitaka vakakina na noqu vakavinavinaka vei ira na vakailesilsesi kece sara ena veiliutaki raraba ni veimataisoqosoqo.
Eda sa kalougata dina ni sa tiko vei keda na kosipeli vakalesuimai nei Jisu Karisito. E vakarautaka na isau ni taro baleta na vanua eda lako mai kina, na cava eda mai cakava tiko eke, kei na vanua eda na lako kina ni da sa lako sivia na bula oqo. E vakaibalebaletaka ka vakainakitaka, vakakina ena solia na vakanuinui ki na noda bula.
Eda bula ena dua na vuravura leqaleqa, e dua na vuravura e levu na kena bolebole. Eda tu ena vuravura oqo me da sotava na noda dui bolebole ena kena vinaka duadua eda rawata, me da vuli mai kina, ka da vakamalumalumutaka. Sa dodonu meda vosota me yacova na ivakataotioti, ka ni noda takete na bula tawamudu ena nona iserau na Tamada mai Lomalagi. E lomani keda o Koya ka sega tale ni dua na ka e vinakata vakalevu cake ena vukuda ia me da rawata na takete oqo. Ena vukei keda o Koya ka vakalougatataki keda ni da vosa Vua ena noda masu, ni da vulica na Nona vosa, ka da talairawarawa ki na Nona ivakaro. Oqori ena kune kina na veitaqomaki; oqori ena kune kina na vakacegu.
Kemuni na taciqu kei na ganequ, me vakalougatataki kemuni na Kalou. Au vakavinavinakataka na nomuni dau masulaki au kei ira kece sara na Vakaitutu Raraba. Keimami sa vakavinavinaka vakalevu sara vei kemuni kei na veika kece sara o ni dau cakava me toso kina na matanitu ni Kalou e vuravura.
Me tiko vata kei kemuni na veivakalougatataki mai lomalagi. Me vakasinaiti na nomuni veivale ena loloma, ena veirokorokovi kei na Yalo ni Turaga. Mo ni dau vakabulabulataka tikoga na nomuni ivakadinadina ni kosipeli, me ra na nomu isasabai mai na sasaga nei Setani.
Sa mai cava na koniferedi. Ni da lesu ki vale, me da vakayacora ena noda qaqarauni. Me tiko vata ga kei keda na yalo eda sa vakila eke ena noda laki qarava na itavi eda dau qarava ena veisiga yadua. Me da veilomani vakalevu cake; me na kunei ni da sa dau cakava tikoga na cakacaka ni Turaga.
Au lomani kemuni; Au dau masulaki kemuni. Au vakamoce vei kemuni me yacova ni da qai sota tale ena ono na vula mai oqo.’ Ena yaca ni noda Turaga ka iVakabula, io o Jisu Karisito, emeni.