Mo Nodra iVakarau era sa Vakabauta
Edaidai au gadreva meu sureti kemuni mo ni “sa … nodra ivakarau era sa vakabauta … ena lomadina [kei na] savasava.”
Ena dua na gauna lekaleka sa oti, a sucu o Ruby lailai ena neitou matavuvale. Ena noqu raica yani na matana kamica, au sa qoroya na noqu kila ni bera nona lako mai ki vuravura a bula vata tu kei na Tamada Vakalomalagi. E a ciqoma na Nona ituvatuva uasivi ni mamarau ka digitaka me muri Koya kei Jisu Karisito, na noda i Vakabula.1 Ena vuku ni nona vakatulewa, a vakatarai kina me lako mai ki vuravura me mai sotava na bula vakayago ka toso yani ki na bula tawamudu. Ena kena mai duavata na yalona kei na yagona, sa yacova o Ruby e dua na gauna ni vuli me rawa kina vua me vakadinadinataka, na nona digitaka me muri Karisito, ka vakavakarau me kilikili kaya me bula tawamudu.
A lako mai o Ruby ki na vuravura oqo ena savasava, ia me vaka ga ni tiki ni ituvatuva e sa na sotava na veivakatovolei kei na veitemaki ka na cakava eso na cala. Mai na Veisorovaki ni noda i Vakabula, sa na rawa kina me vosoti o Ruby, ciqoma na taucoko ni reki, ka me savasava tale—vakarau tu me bula tawamudu ena iserau ni Tamada Vakalomalagi.
Ni oti e vica na auwa nona sucu, a noqu na madigi meu roqota e ligaqu na gone talei oqo. Au kaya vei tinana, “Io, me da vakatavulici Ruby me yalewa bula dodonu, savasava ka iyau levu me vaka e tukuni ena yacana.”2
A sauma o tinana, “Au sa na tekivu nikua.”
Na cava ena cakava o tinai Ruby me “tekivu nikua?” E rawa vakacava vei keda na itubutubu, tukadra kei na budra na gone kei na iliuliu me da tekivu maroroi ira na luveda—noda itabagone—ena salatu ni bula tawamudu? E dodonu “mo nodra [ivakarau] era sa vakabauta.”3
E kaya na Parofita o Brigham Young, “Me kua ni da vakayacora e dua na ka, eda sega ni vinakata me ra vakayacora na luveda. Meda idusidusi vinaka tikoga, meda namaka tiko me ra na vakamuri keda.”4 Oi keda vakayadua e dodonu meda tekivu nikua meda ivakaraitaki vinaka o ya.
Edaidai au gadreva meu sureti kemuni “mo ni “sa … nodra ivakarau era sa vakabauta ena … lomadina [kei] na savasava”5—ena rua na ivakavuvuli e gadrevi me baleta na vakabulai.
Mo nodra ivakarau era sa vakabauta ena vakabauta.Vakaukauwataka tikoga na nomu vakabauta kei na ivakadinadina vakai iko i Jisu Karisito kei na nomu tu mo vakadinadinataka ena vosa kei na ivakarau kivei ira na luvemu.
Meu tukuna mada vei kemuni e dua na tina vakasakiti ka ivakaraitaki ni vakabauta na nona bula. Ena gauna e se gone tagane lailai kina na Parofita o Josefa Simici, a sarava ka vulica mai vei Lucy Mack Smith na tinana, na vakabauta na Kalou. A dau qara na isau ni ka o Lucy ena nona vakasaqaqara ena ivolanikalou,6 ka vaka tale ga kina o Josefa, me vuki ki na i Volatabu me dusimaki kina me vaka a cakava o tinana.7
A walia talega o Lucy na veileqa vakamatavuvale mai na nona vakasaqara vakaikoya na veivuke ni Turaga ena masu. Ena dua na siga, a sotava na veileti ena nona matavuvale me baleta e dua na ulutaga vakalotu, a kaya o Lucy ni a “gole ki na dua na loma ni veiloga ni jeri lailai ka voleka toka ga ka masu vua na Turaga.”8
O Lucy e dau masu talega ena vakabauta levu ena nona sotava na veika e tara na nona bula vakayago, a voleka me yali na yavai Josefa ena mate ni sui, kei Sophronia, na ganei Josefa, a voleka sara ni mate ena waqaqa. Me baleta na tauvimate nei Sophronia, a vola o Lucy, “Au vakaraica na luvequ … keirau veitauri liga vata kei watiqu ka tekiduru ena yasa ni mocemoce ka keirau sovaraka neirau rarawa kei na vakamamasu ki daligana.”9 A bula o Sophronia. Au nuidei ni o ira na luvei Lucy era vakadinadinataka wasoma na nona dau masu ena vakabauta, ka ciqomi na isau ni masu o ya.
A masu o Lucy ena vakabauta me baleta na veidusimaki, kei Josefa talega a lako ki na loma ni veikau me laki masu kina ena vakabauta, ka vakasaqara na kena isau mai vua na Turaga me vakataki tinana.
Me vakataki Lucy, e dodonu me da vakaraitaka vei ira na luveda kei ira na itabagone na kena vaqaqacotaki vakacava na nodra vakabauta kei na ivakadinadina me baleti Jisu Karisito mai na noda vaqaqacotaka na noda vakai keda, mai na vulici ni ivolanikalou, kei na masumasu, vakai keda vakakina kei ira.
E duatani vei Lucy, ni da sa vakalougatataki nikua ni sa tu vei keda e levu cake sara na veika ka sega ni iVolatabu ga. Sa tu vei keda na ivolanikalou edaidai kei na nodra vosa na parofita edaidai me “tuberi keda tu”10 ki na salatu ni bula tawamudu. Mai na iVola i Momani eda vulica baleti ira era tu ena salatu ka ra “tautauri matua tikoga ena ititoko kaukamea,”11 ka vakatauvatani ki “na vosa ni Kalou.”12 Ena vuravura nikua ka sa vakasinaiti tu ena veivakatovolei, “na tautauri matua” e rawa me veibolei, me vaka na ilawaki nei Setani ena nona tovolea me kauti keda tani mai na gaunisala ni Kalou. Kevaka me da biuta tiko e dua na ligada ki na ititoko ka dua tale e vuravura, eda sa biuti ira na luveda kei na itabagone ena itutu ni nodra rawa ni lakosese ena salatu. Kevaka e veilecayaki tiko na noda ivakaraitaki, ia ena vosa nei Jekope, era sa na “beci [keda] na [luveda], ena vuku ni [noda] itovo ca.”13
Kemuni na itubutubu, tukadra kei na budra na gone kei na iliuliu, e dodonu me matata na nomuni itukutuku. Na kena makare e rawa walega ni yaco mai na kena tauri na ititoko ena ligada ruarua kei na kena bulataki mai na dina e kunei ena ivolanikalou kei na nodra vosa na parofita edaidai. O ni na sega beka ni susuga tiko e dua na parofita me vaka a cakava o Lucy, ia o ni sa susugi ira dina tiko na iliuliu ni veisiga ni mataka, kei na nomuni ivalavala era sa tudei vinaka sara tu ga ena nodra vakabauta.
Tarava, mo nodra ivakarau era sa vakabauta ena savasava. Na gaunisala duadua ga e rawa me da yaco kina me da savasava sa ikoya mai na Veisorovaki ni noda i Vakabula.Vei keda vakayadudua, na kena icakacaka me yaco me da vakasavasavataki e tekivu mai na vakabauta, veivutuni, kei na noda imatai ni veiyalayalati ni papitaiso.
Me vukei ira na luveda nodra bulataka na veiyalayalati ni papitaiso, a veivakasalataki kina o Elder Robert D Hales: “Me da vakatavulica ena gauna era sa lako tani kina mai wai, era sa lako tani mai vuravura ka gole ki na matanitu ni Kalou. Mai na veiyalayalati, ra vakadonuya me ra talairawarawa ki na Nona ivunau.”14
“Na veiyalayalati ena biuti keda toka ena dua na vanua vinaka sara me da na maroroya kina na noda yalayala vua na Kalou. Na noda maroroya na noda veiyalayalati sa dodonu me da na vakuwai keda mai na veimataqali soqoni se ka taleitaki ka dau vakavuna na noda sega ni maroroya vakavinaka na noda vosa ni yalayala.”15
Na iSakisaki ni iTabagone sa dua na iyaya vakasakiti me vukei ira na itabagone ena nodra kila vakavinaka na itavi tabu oqo ena kena vakayacori na veiyalayalati kei na veivakalougatataki ni savasava ka lako mai na kena maroroi na veiyalayalati. E tu kina na nodra vosa na parofita edaidai—na ititoko kaukamea ena tuberi ira tu ena sala dodonu ka qiqo, kauti ira tani mai na veicoriti nei Setani ka rawa me lokuyarataka na nodra toso ki liu. Ena ivolalailai oqo, e rawa talega mo ni kunea kina e vuqa na veivakalougatataki ka lako mai ena talairawarawa kei na kena vakasaqarai na veika e “vinaka, [ka] totoka.”16
Kemuni na itubutubu, me dua na nomuni ilavelave ni ivolalailai oqo ka mo ni dau wilika vakawasoma. Bulataka vakataki kemuni na kena itagede.Veivosakitaka vata kei ira na itabagone na vakasama yaga vakosipeli me na vukea nodra vakatorocaketaka na nodra dui gagadre me ra bulataka ka kunea vakataki ira na ibalebale kei na inaki ni kena ivakatagedegede.
Na ivakatagedegede e kunei ena iwase “Veivakamarautaki kei na Tabana ni iTukutuku” kei na “iSulusulu kei na iRairai” e rawa me ra veibolei vakatabakidua baleta ni ra sa yaco tiko me ra duatani mai na ivakatagedegede ni vuravura.
E dodonu me da ivakaraitaki tiko ni vinaka kei na totoka ena noda digidigi vakayadua ena vuku ni itukutuku kaburaki. E dodonu me da qarauna vakavinaka na itukutuku kaburaki eda kauta mai ki na noda veivale me kakua ni vakaluluqataka na kena dau kidavi na veika ni Yalo, vakacacana na veimaliwai vakamatavuvale kei na itokani, se na kena vakaraitaki na vakaliuci keda ga ka ra sega ni sala vata kei na ivakavuvuli vakosipeli. Mai na ivakaraitaki e rawa me da vukei ira na luveda ena nodra kila na vakayagataki vakabalavu ni gauna ena raici tiko ni Initaneti, itukutuku volai raraba, kei na talevoni veikauyaki, qito ena vidio, se sara retioyaloyalo ena kauti keda tani mai na itaviqaravi yaga kei na cakacaka vata kei ira tale eso.
Meda ivakaraitaki tale tikoga ni vinaka kei na totoka mai na noda isulusulu kei na keda irairai. Me vaka ni da tamata ni veiyalayalati e tu na noda itavi me da qarava, taqomaka ka vakaisulutaka vakavinaka na yagoda. E dodonu me da vukei ira na luveda kei na itabagone me ra kila ni da doka na yagoda me vaka na vale ni Kalou ka vaka ni sa isolisoli mai vua na Kalou.17 Me da vakaraitaka na ivakarau ena noda cata na volia se daramaka na isulu vakamadua ka sa rui oso, sa rui mamare, se vakaraitaka na yago ena so tale na kena ivakarau.
O ira na daumaroroya na veiyalayalati era na tovolea me ra talairawarawa “ena veigauna kecega … kei na veivanua kecega”18 baleta ni ra lomana na Kalou kei na Nona yalayala ni veivakalougatataki. Ena dua na yakavi, niu taubale vata tiko kei watiqu, keirau lako sivita e dua na soqo ni vakamau ka vakayacori tiko e tautuba. Keirau sega ni kilai ira na tamata oqo, ia e laurai kina na ivakaraitaki ni itovo savasava. Sa totoka dina na nodra digidigi ni ivakatagi kei na isulusulu. Na ivinivo rairai vinaka nei marama vakamau e sega ni vakamacalataki rawa na kena maqosa, vaka tale ga kina na nodra isulusulu o ira era tokoni koya tiko. E digitaka na matavuvale oqo me kakua ni wakia vata na ivakarau vakavuravura kei na kena vakalou na siga o ya.
Ia oqo, meu vosa mada kivei ira na itabagone vakasakiti ni noda Lotu. Vinaka vakalevu na nomuni ivakaraitaki ni bula savasava kivei—ira na nomuni itokani, qasenivuli, iliuliu, kei na matavuvale. Au raica ni vuqa vei kemuni o ni lewe ni Lotu duadua ga ena nomuni matavuvale. O ni dau mai lotu duadua tiko beka. Au vakavinavinakataki kemuni ena nomuni yalayala kei na nomuni ivakaraitaki ni bula savasava. Ni yalovosota ka tomana na bulataki ni bula savasava. Era tu e lewe vuqa e rawa me ra vukei kemuni. E kaya o Peresitedi Thomas S. Monson, “Na matavuvale ivakaraitaki vinaka mada ga … sa rawa me rau taurivaka na veivuke kecega erau rawata rawa mai vei ira na turaga [kei ira na marama] vinaka era sa dau veikauwaitaki dina.”19
Vakaraici ira wavoki na iliuliu kei na itokani ka ra sa nodra ivakarau era sa vakabauta ena nomuni tabanalevu kei na iteki ka vuli mai vei ira.
Niu a se goneyalewa kina, au dau kilai ira era sa nodra ivakarau era sa vakabauta. Me ikuri vei rau na noqu itubutubu, e dua o Carma Cutler na tinaqu lailai. Au se nauma vinaka tu na nona a vosa ena dua na Bogi ni iTagede ni iteki niu sa yabaki tinikaono tiko. A vakatavulica na kena bibi na savasava ka kilikili kaya e dua ena vakamau ena valetabu. E tarai au dina vakatitobu na nona ivakadinadina. Au dau dikeva na nona bula vakayalo me tekivu mai na noqu se gone yalewa lailai sara, kau kila ni rau salavata kei na nona ivakavuvuli. Au a vinakata meu muria na nona ivakarau.
Kemuni na cauravou kei na gone yalewa, e rawa vei kemuni mo ni tekivu nikua mo ni nodra ivakarau era sa vakabauta ena nodra yalodina kei na savasava. Vaqaqacotaka na nomuni vakabauta kei na nomuni ivakadinadina e veisiga ena nomuni vulica na ivolanikalou kei na masumasu. Maroroya na nomuni veiyalayalati ni papitaiso ni na maroroi kemuni mo ni savasava ka kilikili me baleta na veidusimaki ni Yalo Tabu. E rawa mo ni tekivuna nikua mo ni ivakaraitaki vei ira eso me ra muria.
O ni na sega ni kila, o ni na rawa beka ni ivakaraitaki ka na gadreva o noqu Ruby lailai ena dua na siga. Ena gauna oqo, sa vakasakiti na nona tekivuna o Ruby na salatu ki na bula tawamudu. Erau sa vakarautaka tiko na nona itubutubu na ituvatuva ni bula savasava ena loma ni nona vale, ena kena tekivutaki na veisiga yadua ena dua na dina me sa nodra ivakarau vei ira sa vakabauta. Sa nuitaki tiko, mai na nona galala ni digidigi, ena digitaka o Ruby me vakamuria.
Au vakavinavinakataka na ituvatuva ni marau, kau vakadinadinataka ni sa ikoya duadua ga o ya na sala ena rawa kina vei Ruby, kei keda vakayadua, me da rawata me da savasava tale, ka bula tawamudu ena iserau nei Tamada mai Lomalagi. Meda sa tekivu yadudua sara ga nikua. Ena yaca i Jisu Karisito, emeni.