Me Vakacegu na Yalomudou
Na kunei ni vakacegu ni yaloda e oka kina na vakacegu ni vakasama kei na yalo, ka sa vua ni kena vulici ka vakamuri na ivunau i Karisito.
Ena mua ni taoni o Gothenburg, mai Suwiteni, e tiko kina e dua na gaunisala rabailevu ka ra tubu tu kina eso na vunikau totoka ena yasa ni sala ruarua. Dua na siga au raica ni sa tola tu na tolo ni dua na vunikau o ya, au sa mani irova sara ka kunea ni sa lala sara tu ga. Dina ni tola, ia e sega ga ni lala! Sinai tu kina na veimataqali benu.
Au kurabui ni rawa me sa duri tu ga na vunikau. Niu rai cake au qai raica ni tolona e cake sa vesu wavoki tu kina e dua na beleti sitila. Era sa qai vesuvesu yani ena beleti na waya sitila ka ra laki vesu ka vakadre sara ena veivale ka tu voleka e kea. Ni da raica yani vakayawa e vaka tu ga ni ra tautauvata kece na vunikau; ena qai kilai ga ni sa tola tu ni da sa irova. Ena vica vata na yabaki yani ki liu sa tekivu kina na vuca ni tolo ni kau ka sa vaka me malumu na uto ni vunikau. E sega ni ka me qai tekivu walega oqo. Me vaka ga, na kena tubu vakamalua e dua na vunikau lailai me laki dua na vunikau kaukauwa, eda na tubu talega vakakina ena noda sasaga meda dei ka vakaukauwataki mai loma ka vakakina e tautuba, ka duidui mai na vunikau tola.
Na veivakabulai ni Veisorovaki i Jisu Karisito eda na vakaukauwataki me rawa ni da tucake kina vakadodonu ka tudei ka vakasinaiti na yaloda—ena rarama, ena kila ka, ena reki kei na loloma. Sa veisureti tu yani o Koya kivei “ira kecega me ra lako mai vua ka vakaivotavota ena nona loloma ka sa sega ni bureitaka vua e dua sa lako mai vua” (2 Nifai 26:33). Na nona yalayala mo:
“Dou lako mai vei au koi kemudou sa oca ka colata na icolacola bibi, ia kau na vakacegui kemudou.
Vakataqara vei kemudou na noqu ivua ka vuli vei au niu sa yalomalua ka yalomalumalumu, dou na kunea kina na vakacegu ni yalomudou.” (Maciu 11:28–29).
Na vakacegu oqo e tukuna kina o Peresitedi Joseph F. Smith: “Ena noqu vakasama, o ya na curu ki na vuku kei na loloma ni Kalou, ena noda vakabauta na nona inaki kei na nona vakatulewa, me kilai kina vakamatata ni da dina tiko, ka da sega ni vaqara tale tiko e dua na ka, e sega tale ni da yavalati ni liwa e dua na cagi ni ivakavuvuli, se mai vei ira na tamata qaseqase se daulawaki era wawa tu me ra vakayacora na nodra cakacaka ca. Eda kila ni lako mai vua na Kalou na ivakavuvuli ka da sega talega ni taroga e dua era dui lewa na nodra dui nanuma, na veika era vakasamataka kei na nodra itovo tawa kilikili. Ni sa yacova yani e dua na ivakatagedegede ni vakabauta na Kalou ka sa yali kina na vakatitiqa kei na rere e sa curuma yani na nona ‘ivakavakacegu na Kalou.’” (Nodra iVakavuvuli Na Peresitedi ni Lotu: Joseph F. Smith [1998], 60).
Na kunei ni vakacegu ni yaloda e oka kina na vakacegu ni vakasama kei na yalo, ka sa vua ni kena vulici ka vakamuri na ivunau i Karisito, ka na yaco kina meda liga ni Karisito ena nodra vukei ka qaravi na tamata. Na vakabauti Karisito ka talairawarawa ki na nona ivakavuvuli, ena solia vei keda na vakanuinui dei, ka na vakadeitaka na yaloda na vakanuinui oqo. Eda na tudei ka sega ni yavalati vakarawarawa. Ena rawa ni da sotava na vakacegu sega ni vakaiyalayala; ka rawa ni curuma yani na vakacegu ni Turaga. Kevaka meda qai vuki tani mai na rarama kei na dina, sa na vaka me mai tola tu na noda bula me vaka sara ga na vunikau o ya, ka sa na qai lala tu na yaloda mai loma, ka da qai vakasinaita tu yani ena veika e cacawale.
Ni da raica yani na noda bula me vaka ni da gone vakayalo ni bera ni da mai sucu e vuravura, kei na tawa mate rawa ena bula mai muri, na bula oqo e sa ka e rui lekaleka wale.
Sa ikoya, ia, sa gauna ni vakatovolei, ia sa siga talega ni noda madigi meda digitaka na kena vakamuri na veisureti me kakua ni vakaweleweletaki na siga ni noda mai vakatovolei (raica na 2 Nifai 9:27). Na veika eda dau vakasamataka, na veika eda dau vakila e yaloda, kei na veika eda digitaka meda vakayacora, era na vakamawe kece ena noda bula eke kei na bula sa bera mai.
Dua na ivakarau ka rawa ni veivuke meda rai vakabalavu ena veisiga me rawa ni da vakanamata tawamudu tiko yani ki na veika e rawa ni da cakava, vakauasivi kevaka meda vakila ni basika tiko na vakanananu ni wawa mada qai caka ni mataka, na veika eda kila ni rawa ni caka nikua ni da se bula donuya na kena gauna.
Eda na vukei ena digidigi eda cakava ena noda bula ena veivakayarayarataki ni Yalotabu. Ia, kevaka meda digitaka na veibasai ni rarama kei na kila ka e tiko vei keda, eda na sotava e dua na dredre ka da na vakila ni sega ni vinaka. Ni vaka o ya na ka ena yaco sa dua na veivakalougatataki kevaka meda na yadrava ka sa na kena gauna meda veivutuni. Ni da vakamalumalumutaki keda ka vinakata meda cakava na ka dodonu, eda na nuiqawaqawa meda veisau ena gauna sara ga o ya, ia o ira era na yalokaukauwa ka ra na saga me ra “muria tikoga na [lomadra]” (V&V 88:35) era sa vakadonui Setani me “bukia ki domodra na dali laino ka vakatuitui ira me yacova ni sa vesuki ira ena nona dali kaukauwa ka tawamudu” (2 Nifai 26:22) vakavo kevaka sa curumi ira na yalo ni veivutuni. Ni tiko vei keda na veivakayarayarataki ni yalo ca ena sega ni basika na yalo vakacegu, baleta na vakacegu sa isolisoli mai vua na Kalou ka na yaco walega mai ena veivakauqeti ni Yalo ni Kalou.“Ko na sega ni kune marau ena nomu ivalavala ca” (Alama 41:10).
Na veika eda cakava ena veisiga, ena dau dede na kena tatara ki na noda bula na veika lalai ka rawarawa eda vakayacora (raica na Alama 37:6–7). Na ka eda tukuna, na ka eda cakava, kei na ka eda digitaka meda cakava mai na ka e yaco, ena sega walega ni tarai keda ia ena tatara talega vei ira era tiko vakavolivoliti keda. E rawa ni tara cake ka rawa ni da dresulaka sobu. Dua ga na kena ivakaraitaki na ka e a yaco vua na marama na buqu. A tala o koya e dua na luvena gone me laki volia mai eso na yaloka. Na gone oqo ena nona taubale yani vakadinamati ki vale e sega ni kila ni sa kavoro tu eso na yaloka ena gauna e yaco yani kina ki vale. A tukuna e dua na itokani ni matavuvale ka tiko e vale ena gauna o ya vei tinaqu me vakanakuitataka ena ka sa vakayacora. Ia e yalomalua ga o buqu ka kaya yani ni “Sega, oqori ena sega ni kauta lesu mai na yaloka sa kavoro. Edatou sa na vakayagataka ga na ka e rawa me caka kina eso na panikeke me rawa ni datou marautaka vata.”
Ena noda vulica meda walia na veika lalai ka rawarawa ni veisiga yadua ena dua na kena gaunisala vuku ka veiuqeti, na vuna sa ikoya e dua na veivakayarayarataki dina ena vakadeitaka na duavata ni yaloda na tara cake kei na nodra vakaukauwataki o ira era tu vakavolivoliti keda. Oqo e baleta ni veika e uqeti keda meda caka vinaka, “sa vakatakilai ena kaukauwa kei na isolisoli i Karisito, ia dou na kila vakaidina ni sa vu mai vua na Kalou” (Moronai 7:16).
Ena gauna oqo sa sega tale ni tu e kea na vunikau tola kau a tukuna vei kemuni. Era biuta ena vanua e tola tu eso na itabagone na rokete kacabote ka vakavuna na kena kama. Sa sega ni rawa ni vakabulai ka sa musu laivi. Qarauna na veika ena rawa ni vakacaca mai loma ka kauta mai ki tuba, lelevu se lalai! E rawa ni vakavu kacabote ka vakavuna na mate vakayalo.
Meda sa na vakanamata ga ki na veika ena vakaceguya na vakasama kei na yalo. Sa na qai “taucoko sara kina na nomu vakabauta ena mata ni Kalou” (V&V 121:45). Na yalayala ni noda curu ki na vakacegu ni Turaga, meda ciqoma na isolisoli ni vakacegu, e veiyawaki sara kei na veivakayalovinakataki vakaiyalayala vakavuravura. Sa dina sara sa isolisoli mai lomalagi: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou me vaka sa solia ko vuravura. Me kakua ni rarawa na yalomudou se rere” (Joni 14:27). E tiko vua na kaukauwa me vakabula ka vaqaqacotaka na yalo. O koya o Jisu Karisito, ni sa ikoya kau vakadinadinataka tiko ena yaca i Jisu Karisito, emeni.