Pe Mafai Ona Tatou Vaai i le Keriso?

Saunia e Peresitene Dieter F. Uchtdorf

Fesoasoani Lua i le Au Peresitene Sili

I se tasi po na faitau ai e se tamamatua se tala i lona afafine laitiiti e fa-tausaga-le-matua ae tepa ae loa i luga le teineitiiti ma fai mai, “Tama matua, vaai i fetu!” Na ataata ma le alofa le toeaina ma faapea atu, “O lea ta te i totonu o le fale, la’u pele. E leai ni fetu iinei.” Ae na finau atu le teineitiiti, “O loo i ai fetu i lo’u potu! Vaai!”

Na tilotilo i luga le tamamatua ma sa te’i ina ua ia iloa ai o loo sausauina le faaalo i ni mea ilaila ninii. E le iloa i le tele o taimi, ae a suluia i le malamalama ia mea ilaila i se auala faapitoa, ona foliga moni mai lea o se malae o fetu. Sa na o mata o se tamaitiiti na mafai ai ona iloa, ae na i ai iina. Ma mai lena lava taimi, pe a savali tamamatua i totonu o lenei potu ma tepa i luga, ua mafai ona ia iloa atu mea sa ia lei iloaina muamua.

Ua tatou ulufale atu i se isi vaitau matagofie o le Kerisimasi ua faatumulia i musika ma moli, pati ma meaalofa. Ae mai tagata uma lava, ua manaomia i tatou, i le avea ai ma tagata o le ekalesia o loo tauaveina le suafa o le Faaola, ina ia vaavaai i luga atu o foliga vaaia o le vaitau ma vaai i le uiga moni ma le matagofie o le taimi lenei o le tausaga.

Ou te le iloa pe toafia i latou i Peteleema na iloa o iina, e lata ane ia i latou, na soifua mai ai le Faaola? O le Alo o le Atua, le Mesia ua leva ona faatalitali i ai ma folafolaina—sa i ai o Ia i lo latou lotolotoi!

O e manatua le mea na tau atu e le agelu i leoleo mamoe? “Aua o le aso nei ua fanau ai i le aai a Tavita, lo outou Faaola, o le Alii ia o Keriso” Ona latou fetautalatalaai ai lea, “Ina tatou o ia i Peteleema, tatou te vaavaai i lenei mea ua faia” (Luka 2:11,15).

Faapei o leoleo mamoe anamua, e tatau ona tatou faapea ifo i o tatou loto, “Ina tatou vaavaai ia i lenei mea ua faia.” E tatau ona i ai le manao i o tatou loto. Ina tatou vaavaai atu ia i Le Paia e Toatasi o Isaraelu i le faatanoa vao, i le malumalu, i luga o le mauga, ma luga o le satauro. Ina tatou faamamaluina ma viia le Atua, faapei o leoleo mamoe, mo nei tala fiafia o le olioli sili!

O nisi taimi o mea e sili ona faigata ona vaaia o mea ia ua leva lava ona tatou faafesagai. E pei o le tamamatua lea na le mafai ona iloa atu fetu i le faaalo, o nisi taimi e le mafai ai ona tatou vaaia mea e iloagofie.

O i tatou ua faalogo i le savali faamamaluina o le afio mai o le Alo o le Atua, o i tatou ua tauaveina i o tatou luga Lona suafa ma ua osi feagaiga e savavali i Ona ala i le avea ai ma Ona soo—e le tatau ona tatou le tatalaina o tatou loto ma mafaufau, ma vaai moni atu ai ia te Ia.

E matagofie le vaitau o le Kerisimasi i le tele o itu. O se vaitau o gaoioiga fesoasoani o le agalelei ma le alofa faauso. O se vaitau e toe mafaufau atili ai e uiga i o tatou lava olaga ma le anoanoai o o tatou faamanuiaga. O se vaitau o le fefaamagaloai. O se vaitau e fiafia ai i musika ma moli, fiafiaga ma meaalofa. Ae e le tatau lava ona avea le feilafi o le vaitau e puaoa ai la tatou vaaiga ma taofia ai i tatou mai le vaai moni atu lava i le Alii o le Filemu i Lona mamalu.

Ina tatou faia ia lenei vaitau o le Kerisimasi o se taimi o le olioli ma le faamanatuina, o se taimi tatou te aloaia ai le vavega na auina mai ai e lo tatou Atua Silisiliese Lona Alo Pele e Toatasi na Fanaua, o Iesu Keriso lea, e faaolaina le lalolagi!

Manatu e Aoao Atu ai mai Lenei Savali

1. “E mafai ona faaaoga gaoioiga faatosina e faatupuina ai le fiafia ma fesoasoani ai i tagata o loo aoaoina e taulai atu la latou gauai i le mataupu o le lesona. … O ata o ni meafaigaluega taua ia e faamalosi ai le manatu autu o se lesona ma fesoasoani ai i tagata o loo aoaoina ia tumau pea le naunau mai” (O Le Aoao Atu, e Leai Se Isi Valaauga e Sili Ai [1999],168, 185). Ao amata ona e faasoaina atu lenei savali, mafaufau e faaaoga se gaoioiga faatosina e pei o le faaalia o se ata po o le faasoaina atu o se mau ma fai i le aiga e mafaufau pe faapefea ona faatatau i le savali.

2. “O se tasi o au sini sili ona taua o le fesoasoani lea i isi ina ia faaaoga ia mataupu faavae o le talalelei i mea e tutupu i aso uma. … Fesoasoani i tagata o loo aoaoina ia iloa faamanuiaga e oo mai pe a tatou ola ai i le talalelei” (O Le Aoao Atu, e Leai Se Isi Valaauga e Sili Ai, 167). A maea ona faasoa atu lenei savali, mafaufau e valaaulia tagata o le aiga e faasoa mai ni aafiaga na latou maua a o latou tulimatai atu i le Faaola i le vaitau o le Kerisimasi.

Ata na tusia e David Stucki; ata na tusia e Joe Flores

Agavale: ata na tusia e Paul Mann; ata o mea teuteu o le Kerisimasi na tusia e Joe Flores; O Keriso o loo Faatuina Mai le Afafine o Iairo, saunia e Greg Olsen © 1990; Tamaitiiti o Iesu i le Malumalu, saunia e Grant Romney Clawson © IRI; O Le Faasatauroga, saunia e Harry Anderson © IRI; ata na tusia e Paul Mann; Ua Toetu o Ia, saunia e Del Parson; Makoi e Toatolu, saunia e Paul Mann