Tala Fou o Malumalu
Ua Faapaiaina le Malumalu o Vancouver
Na faapaiaina e Peresitene Thomas S. Monson le malumalu lona 131 o le Ekalesia i fafo atu lava o Vancouver, British Columbia, i le aso 2 o Me, 2010. E latalata i le 40,000 tagata na maimoaina le malumalu i le taimi na tatala ai mo maimoaga, na faia i le lua masina talu ona maea Taaloga Faaolimipeka o le Taumalulu 2010 i Vancouver. O le Malumalu o Vancouver British Columbia o le a faaaogaina e tagata i le British Columbia ma Uosigitone i matu, ISA. Ua i ai nei malumalu e valu a le Ekalesia ua fuafuaina po o loo faaaogaina i Kanata.
Ua Faapaiaina le Malumalu o Gila Valley Arizona
Na faapaiaina e Peresitene Thomas S. Monson le Malumalu o Gila Valley Arizona i le aso 23 o Me, 2010, i ni sauniga se tolu. O le a faaaogaina le malumalu e tagata i Arizona sautesasae ma New Mexico sautesisifo. O loo tu le malumalu i Arizona sautesasae, e le mamao mai le eria na soifua ae ai Peresitene Spencer W. Kimball (1895–1985). O le Malumalu o Gila Valley o le lona tolu lea ua tatala i Arizona, ma ua uma foi ona fofogaina mai le isi lua (Gilbert Arizona ma Phoenix Arizona).
Ua Faapaiaina le Malumalu o Cebu City
Na faapaiaina e Peresitene Thomas S. Monson le malumalu lona lua i Filipaina i le aso 13 o Iuni, 2010. O le Malumalu o Cebu City Filipaina o loo tu e tusa ma le 350 maila (563 km) mai le Malumalu o Manila Filipaina. O le a faaaogaina le malumalu e le silia ma le 200,000 tagata i eria o Visayas ma Mindanao. E sili atu ma le 45,000 tagata na asiasi mai mo le lua vaiaso na maimoaina ai e tagata lautele. Na faafiafia i se gaoioiga faaleaganuu le autalavou e sili atu ma le 3,000 i le po a o lumanai le faapaiaga.
Ua Suatiaina le Eleele i Brigham City, Iuta
O le suatiaina o le eleele mo le Malumalu o Brigham City Iuta na faataunuuina i le Aso Toonai, 31 o Iulai, 2010, i le 9:00 i le taeao. O Peresitene Boyd K. Packer, le Peresitene o le Korama a Aposetolo e Toasefululua, na pulefaamalumalu i le suatiaina o le eleele, lea na faasalalauina atu i nofoaga tutotonu o siteki i le itumalo atoa e i ai le malumalu. Na faalauiloaina mai le Malumalu o Brigham City Iuta i le konafesi aoao i le aso 3 o Oketopa, 2009. O le malumalu lona 14 lena o le a faaaogaina i Iuta.
Ua Faapaiaina le Malumalu o Kyiv
Na faapaiaina le Malumalu o Kyiv Ukraine i le aso 29 o Aokuso, 2010, i ni sauniga se tolu na faasalalauina atu i le itumalo o le malumalu atoa lava. Na tatalaina mo maimoaga a tagata lautele mai le aso 7 o Aokuso i le 21, ma faafiafiaga faaleaganuu i le aso 28 o Aokuso. Na faalauiloaina mai le malumalu i le aso 20 o Iulai, 1998. Na amata galuega o le fausiaina i le aso 23 o Iuni, 2007. O le malumalu muamua lea a le Ekalesia i Europa i Sasae ma o le lona 11 lea i le konetineta o Europa. O le a faaaogaina le Malumalu o Kyiv e tagata mai atunuu e 13.
Ua Toe Faapaiaina le Malumalu o Laie
Ina ua maea se toefaafouga tele, o lea na toefaapaiaina ai le Malumalu o Laie Hawaii i ni sauniga se tolu i le aso 21 o Novema, 2010, ina ua maea ona maimoaina e tagata lautele i le aso 22 o Oketopa i le 13 o Novema ma faafiafiaga faaleaganuu i le aso 20 o Novema. Na faasalalauina atu le toefaapaiaina i itumalo uma o Malumalu o Laie ma Kona. O le malumalu lona lima lea o le Ekalesia, na faapaiaina i le 1919 e Peresitene Heber J. Grant ma na toefaapaiaina i le 1978 e Peresitene Spencer W. Kimball.
Na faapaiaina le Malumalu o Kyiv Ukraine i le aso 29 o Aokuso, 2010.
Ata na pueina e Weston C. Colton