O Le Meaalofa Aupito Sili
Na leai sa matou meaai i lena Kerisimasi. Sa na o se vavega na matou faamoemoe i ai.
Ina ua 12 ou tausaga, na nonofo lo’u aiga i se faatoaga i Pasila, e mamao mai le aai. O Tesema i lena tausaga na ma toliina ai ma lo’u tuagane ni nati mo se isi tagata e i ai lana faatoaga ae faafuasei loa ona timu. Na faaauau le mamafa o timuga mo le tele o aso ma sa le mafai ai ona ma galulue.
Na toeitiiti lava oo i le Kerisimasi, ma ua tau leai se meaai a lo matou aiga. Na popole lo’u tina o le a leai sa matou toonai o le Kerisimasi, o lea na ia fai mai ai ia i ma’ua ma lo’u tuagane matua ma te fesili atu i le pule o le faatoaga mo lo ma totogi. O le a le tele, ae o le a faatauina ni nai meaai mo lo matou aiga i se taimi e saunia ai e isi a latou faigā’ai o aso malolo.
Na ma savavali ma lo’u tuagane i ni maila se tele i se auala palapala e taunuu ai i le fale o le pule o le faatoaga. Ina ua ma taunuu, na ofo le pule o le faatoaga. “O le a le mea ua lua o mai ai i se aso timuga?” na ia fesili mai ai. Na ma faamalamalama i ai lo matou tulaga, ma na ia fai mai, “E leai se tinoitupe o ia te au e totogi ai oulua, ae e mafai ona ou totogiina oulua i se siaki.” Na ma taliaina ma vave ona o ese ina ia mafai ona ma taunuu i le aai e tala ai le siaki ma faatau ni meaai sa matou moomia.
E oo atu i le taimi na ma taunuu ai i le aai, toeitiiti lava a tapunia pisinisi uma mo le aso malolo o le Kerisimasi. Na ma le lavava, ma na le manuia a ma taumafaiga e talaina le siaki.
Ina ua ma taunuu i le fale e aunoa ma se meaai, na matua le fiafia lo’u tina ma o’u uso ma tuagane e toavalu. Pau lava le mea na ia i ma’ua o le siaki, lea e leai se aoga ia i matou i lena taimi. Na oo mai le po o le Vaeluaga o le Kerisimasi e aunoa ma ni meaalofa ma sa na o ni nai meaai laiti. Na ‘ai se matou araisa ma momoe ai loa.
Na matou ala mai i le taeao o le Kerisimasi i le leo o o matou tuaoi o faamanatuina le Kerisimasi i fafo, ae na matou nonofo i totonu, ma faamoemoe mo se vavega o le a tuuina ni meaai i luga o la matou laulau. Na matou tete’i, ina ua tuitui mai le faitotoa a ua tulata i le taimi o ‘aiga i le aoauli. Na tu ai iina se tasi o o matou tuaoi, o loo uuina se pesini tele o loo ufiufi i se solo.
“Na ou sau e aumai le mea lea mo outou,” o lana tala lea. Na taliaina ma le faafetai e lo’u tina le ipu, ma ina ua matou autilo atu i totonu, na faatumulia i meaai o le Kerisimasi. Ia i matou lava ia, o se ‘aiga tele, o se vavega moni lava!
Sa avea lena meaai o le Kerisimasi o se meaalofa sili na ou mauaina aua na fafagaina ai i matou i se aso faapitoa lava. E ui e lei iloa e lo matou tuaoi le tulaga sa matou i ai, ae ou te iloa na silafia e lo matou Tama Faalelagi, ma na Ia galue e auala mai ia te ia, le fafagaina o i matou i lena Kerisimasi. Ou te iloa afai ua leai lava se isi mea tatou te mafaia, o le a auina mai e le Alii i Lona alofa tunoa ma le agalelei ni vavega i o tatou olaga. Ma a o aoaoina lo matou aiga i lena Kerisimasi, e mafai ona tatou auauna atu i le Alii—e pei ona faia e lo matou tuaoi—i le aumaia o vavega i olaga o isi.
Ata na saunia e Bjorn Thorkelson