O La’u Kerisimasi Aupito Sili
Morten Sønderskov, Tenimaka
I se tasi o Tesema ao o’u laitiiti, na matua ma’i ai lava lo’u tina. O fualaau na ia faaaogaina na matua vaivai ai lava, ma na ia moe ai pe a ma le 18 itula i le aso.
Talu ai e nofofua lo’u tina, na ma taumafai ai ma lo’u tuafafine matua e faatulaga le tausiga o lo matou aiga i le mea sili ma te mafaia, ae na ma laiti ma e lei lava se iloa, ma e le i faamanuiaina tele i ma’ua. I le fitu o aso talu ona ma’i lo ma tina, na ma sueina ai se mea e ’ai. A o ma sueina i totonu o le umukuka, na tatagi le logo o le faitotoa.
Sa i ai se tuafafine mai la matou uarota i luma, ma meaai i ona lima. Na te le i iloa le mea sa matou manaomia, ae na i ai o ia iina ma se taumafataga o le afiafi. Na ia fesili mai pe o le a le umi na ma’i ai lo ma tina ma pe sa faapefea ona ma taulimaina na o i ma’ua i lena taimi umi. Na ma faamautinoa atu ia te ia o loo ma taumafai i le mea sili ma te mafaia, ae ma te faafetai mo lona agalelei i le faasoa mai o se meaai mo i matou.
Ina ua ia tuua lo matou fale, na vili lenei tuafafine i le peresitene o le Aualofa ma logo i ai le tulaga o i ai lo matou aiga. I le aso na sosoo ai ma le tele o aso mulimuli ane, na aumaia e tagata o la matou uarota meaai i lo matou fale. Matou te matua faafetai lava! O mea matou te le i vave faaaogaina na ma teuina i le ‘aisa, ma ona o le agalelei o la matou uarota, o lea na lava ma totoe ai meaai mo lo matou aiga mo le isi tolu masina. Ae e le i muta ai iina le agalelei sa faaalia pea e isi.
Na lata mai le Kerisimasi, ma na faasolosolo malie ona manuia Tina, ae e le i toe foi o ia i lona tulaga na masani ai. Na sau le tuagane o lo’u tina mai Copenhagen, e tusa ma le 40 maila (65 km) le mamao, e fesoasoani i tapenaga mo le aso malolo. Na agalelei o ia i mea na mafai ona ia faia, i le sauniaina o se laau Kerisimasi ma ni meaai mo lo matou aiga. Na ia faatauina foi ni nai meaalofa mo a’u ma lo’u tuafafine. O i ma’ua foi, na ma faatauina ni nai meaalofa talafeagai mo lo ma tina ma lona tuagane. Na ma iloa e tele naua mea ma te faafetai ai, ae ona o i ma’ua o ni tamaiti, sa ma lagona ai lava sina lē fiafia i le tulaga na tulai mai ai lenei Kerisimasi.
I le po o le Vaeluaga o le Kerisimasi, na tatagi ai le logo o lo matou faitotoa. Na ou vaai atu i fafo o le faamalama ae ou te lei iloa atu se tasi. Na ou faapea o se taufaalili, ae na fai mai ia te au lo’u tuafafine e tatala pea le faitotoa. Na matou mauaina i luma o lo matou fale se ato lapoa o loo i ai ni meaai ma isi mea e manaomia faapea foi ma ni meataalo. Na ma mautinoa lava e sese le fale lea na tiliva mai i ai. Na ma o i le fale o lo matou tuaoi e fesili i ai pe na tatau ona avatu le ato i lo latou fale, ae e leai nisi sa i ai. Ona ma vaaia lea o meaalofa uma lava o loo i ai o matou igoa. Na i ai foi ni mea mo le tuagane o lo’u tina. Sa i ai se tasi na mafaufau mai ia i matou.
O le agalelei faalilolilo na faailoa mai i lo matou aiga i lena tausaga na suia ai le Kerisimasi pogisa ma le faanoanoa e avea o se Kerisimasi aupito sili i lo’u olaga. O loo faaauau pea ona pa’i mai ia te au i le taimi nei le agalelei ma le alofa sa matou lagonaina mai i isi.