Ua Faasoa atu e le Au Paia le Talalelei i Luga o Peau o le Ea po o le Initoneti
Sa feagai faifeautalai i le lalolagi atoa ma se faafitauli i tausaga ua mavae: a mavae loa ni asiasiga pe tasi pe lua, ona motusia lea o le fesootaiga ma se tagata sailiili sa faaalia moni lava le fiafia i le talalelei. Ua maua e le au suesue, o le toatele o na tagata sailiili e i ai se mea e tasi e tutusa ai: e amata ona le toe fiafia mai ina ua latou maua ni faamatalaga e le lelei ma sese, i luga o le initoneti e uiga i le Ekalesia.
I le ono tausaga talu ai, o le 80 pasene o taunuuga o polokalama suesue mo le upu “Mamona” i le gagana Peretania na le lelei ma e le sa’o. Ua faasolo ina lelei lenei tulaga i le taimi nei. I nisi atunuu, o taunuuga o suesuega i le Initoneti mo le upu “Mamona” ua oo atu nei i le 80 pasene ua lelei ai.
Aisea ua tele ai le suiga? E le gata i Uepi saite aloaia a le Ekalesia, a o Uepi saite lē aloaia o loo faasoa ai faamatalaga lelei e uiga i le Ekalesia ua faasalalauina i le Uepi atoa lava. Ua faaaogaina e tagata taitoatasi lautusi faaletagata lava ia e faasoa atu ai o latou tulaga faatauaina, ma ua vaaia savali o le talalelei i luga o upegafesootai faaagafesootai.
O le aotelega la, ona o le auala ua faaaoga ai e le au paia, o lea ua fesoasoani ai le Initoneti i le aumaia o tagata i faifeautalai faamisiona.
Ua musuia le tele o tagata o le Ekalesia i le fautuaga a Elder M. Russell Ballard o le Korama a Aposetolo e Toasefululua, lea na saunoa mai, “Ou te fia talosagaina outou ia mafuta mai i le talanoaga e ala i le alu i luga o le Initoneti e faasoa mai ai ma faamalamalama i ni upu faigofie ma manino le savali o le Toefuataiga.”1
O se vaaiga lenei i nisi o auala ua faaaoga ai e tagata o le Ekalesia le Initoneti e faasoa mai ai le talalelei i ni auala faigofie, ae matua anoa lava.
O Le Mormon.org Fou
Mormon.org, o se Uepi saite aloaia a le Ekalesia ma o se meafaigaluega faatulagaina lelei mo faifeautalai, ua toe mamanuina e fesootai sa’o ai tagata e faaaogaina ma tagata o le Ekalesia i le faaaogaina o talaaga otooto o le tagata lava ia.
O le Mormon.org fou o le a vaaia i le tele o gagana i le ogatotonu o le 2011, e amata mai i le faaSipaniolo ma le faaPotukale. E mafai ai e le au paia ona fatufatuina ni talaaga otooto o le tagata lava ia e faamalamalama ai o latou talitonuga ma olaga. E mafai e i latou e asiasi atu i ai ona maimoaina nei itulau o faamatalaga e tuusao mai i tagata o le Ekalesia ma aoao atili ai e uiga i le Ekalesia.
“Matou te mananao i e asiasi atu i ai ia masani ma tagata o le Ekalesia ma fegalegaleai ma i latou,” o le saunoaga lea a Ron Wilson, le faatonu o le Initoneti ma fefaatauaiga i le Matagaluega a Faifeautalai o le Ekalesia.
(Mo nisi faamatalaga i nei talaaga otooto o le tagata lava ia ma isi vaega i le Mormon.org fou, tagai i le tala lenei.)
O Le Faavae ua Sili Atu Ona Lelei
O le Faavae ua Sili Atu Ona Lelei, o se faalapotopotoga tumaoti, ua faavaeina e tagata o le Ekalesia e galue e tuuina atu i le Ekalesia se vaaiga lelei i le auai i le initoneti. E ui lava o le faalapotopotoga e le faatautaia pe lagolagoina e le Ekalesia, ae ua ia faia se vaega taua tele i le faaleleia o le i ai o le Ekalesia i le initoneti.
O tagata na amataina le Faavae ua Sili Atu Ona Lelei, na amata ona suesueina ia polokalama suesue ma pe faapefea ona filifilia taunuuga. Na latou aoaoina o le Google, o se polokalama suesue manaomia tele o le Initoneti, e faatagaina se saite se tasi e faaaoga ai na o le lua avanoa i se itulau o taunuuga. O lona uiga afai o le LDS.org e i ai ni itulau talafeagai e fia selau, o le a na o le lua o le a vaaia o se taunuuga o le sailiiliga. O le a tele ai avanoa mo saite e le lelei, ma foliga mai ai o le a tosina atu ai tagata i saite e leai se faiā ma le Ekalesia e avea ma faalapotopotoga.
“Latou te saili mo mafaufauga a a latou tupulaga nai lo le faatuatuaina o faalapotopotoga,” na saunoa i ai Jonathan Johnson, le peresitene o le Faavae ua Sili Atu Ona Lelei. “Afai tatou te malamalama i lena mataupu faavae, o le a tatou malamalama foi i le mafuaaga e saunoa mai ai o tatou taitai e mafai ona sili atu so tatou aoga o ni tagata o le Ekalesia. Tatou te aloese ai mai papupuni ua foafoaina pe a vaai tagata i se tasi ua i ai i se tulaga maualuga aloaia.”
O le faalapotopotoga o le Faavae ua Sili Atu Ona Lelei, ua mauaina aia tatau e sili atu ma le 1,400 URL saite eseese ma ua fautuaina ai tagata o le Ekalesia e amatalia ni Uepi saite o loo talanoaina ai mataupu faavae o le talalelei. Ua latou amataina ni saite se 320 ua oo atu i le 12 gagana. Ua latou tuuina foi i ai ni vitio e sili atu ma le 1,900 i luga o le YouTube, ua tuuina atu ai i tagata o loo suesue i le Ekalesia le tele o avanoa e maua ai le upu moni.
Lautusi Faaletagata Lava Ia i le Initoneti
Mo le au paia e le lava le taimi pe leai se tomai e amatalia ai se Uepi saite atoa, o le faia o se lautusi faaletagata lava ia i le initoneti e mafai ona fai. O le lautusi faaletagata lava ia (faapuupuuina o le “weblogs”) o ni Uepi saite e faigofie ona tausia ma e masani lava ona maua fua.
E tai fia selau tagata o le Ekalesia i le lalolagi atoa o loo faaaogaina a latou lautusi faaletagata lava ia i le initoneti e faasoa atu ai le talalelei i o latou aiga ma uo. O se mea masani mo tagata e fai ia lautusi faaletagata lava ia le faasoa atu o mea e taua ia i latou, ma o se nofoaga masani lenei e talanoa ai e uiga i le talalelei.
O se tasi tina talavou e masani ona faasoa atu lona faatuatua i le initoneti na atiina ae se lotonuu mulimuli ane. Na amata e Stephanie Nielson se lautusi faaletagata lava ia, o le nieniedialogues.blogspot.com, lena na ia tusia ai se talaaga faasolosolo o lona olaga i le avea ai ma se tina e nofo-i-le-fale. Na ia faaauauina le tusia o lana lautusi ina ua ia sao mai se vaalele na pau i le 2008 lena na tuua ai o ia ua matua mailaila lava ae na faatupulaia ai lona tuuto faaleagaga.
Ua faasoa mai e Stephanie le talalelei i lana lautusi e ala i ana meli ma e aofia ai se faamau lapoa o loo i ai se sootaga i le LDS.org. Ua ofo mai foi e ia i e asiasi i ai, se kopi maua fua o lana “tusi e sili ona fiafia i ai”—le Tusi a Mamona—o le a ia auina atu “i soo se mea lava o le lalolagi … soo se mea lava!”
Uepi Saite o Faasalalauga Faaagafesootai
E faitau miliona tagata ua fesootai i luga o le Facebook, Twitter, ma le YouTube, ma o loo faasoa atu ai foi e tagata o le Ekalesia le talalelei iina.
Ua faasolo ina vave ma faigofie le faasalalauina atu o faamatalaga i upegafesootai faaagafesootai, lena ua mafai ai ona avea ma auala faigofie e faasoa atu ai le talalelei. I le LDS.org, o aitema uma lava i le vaega o le Gospel Library o loo tuuina mai ai se meafaigaluega e “Faasoa atu”, lena ua faigofie ai ia i latou e faaaogaina ona faasoa atu sootaga i tusiga i mekasini a le Ekalesia, lauga o konafesi aoao, ma tusi lesona i saite eseese o faasalalauga faaagafesootai.
O i latou e faaaogaina le upegafesootai faaagafesootai, e mafai ona avea foi ma paaga a itulau aloaia o le Facebook a le Ekalesia. E sili atu i le 280,000 paaga a le Ekalesia, o le Tusi a Mamona e sili atu i le 162,000 paaga, ma e fia afe isi tagata ua auai i le faaaogaina o isi itulau-fesootai a le Ekalesia. Pe a faatasi atu se tagata o loo faaaogaina le Facebook ma auai i se vaega, ona faafesootai lea o ana uo. O le mea lea, ua faailoa atu ai i le Ekalesia e ala i le Facebook ia uo a le fia afe o e faaaogaina le Facebook.
E faaaoga foi e tagata o le Ekalesia le Twitter, o se Uepi saite o upegafesootai faaagafesootai e auina atu ai savali pupuu (“tweets”) e ala atu i le Initoneti, e faasoa atu ai le talalelei. O le mea sili ona mata’ina, sa avea le konafesi aoao ma se tosinaga numera tasi o le Twitter i le taimi o le konafesi aoao i le faaiuga o le vaiaso ia Aperila 2009,2 o lona uiga sa sili atu ona ta’ua soo i nei savali pupuu nai lo se isi lava mataupu.
Ua faatulagaina foi e le Ekalesia se itulau i luga o le YouTube, o se Uepi saite lauiloa e faailoa atu ai vitio, na faatupuina ai se tali lelei mai tagata o le ekalesia faapea foi tagata e le lolotu. So o se vitio lava o le Mormon Messages, e pei foi o isi e tuuina i le YouTube, e faigofie lava ona tuuina i luga o se lautusi faaletagata lava ia, pe faasoa atu foi i le i-meli, Facebook, po o le Twitter.
Ua saunia e le Initoneti se auala mo tagata o le Ekalesia e sue ai tagata i ni auala sa le mafai ona mafaufauina i le isi tupulaga talu ai, ma a o faaleleia tekinolosi, o le a faapena foi le tomai o tagata o le Ekalesia e faasoa atu ai le talalelei.
Ua faateleina le taua o matafaioi a tagata o le Ekalesia i luga o peau o le ea po o le initoneti ao faatoateleina pea lava pea tagata o loo sailiili i le Ekalesia e ala atu i le Uepi.
Ata na pueina e Welden Andersen