Tala Faamamai o le Talalelei
O Le Tala e Fou Lava Pea
E leai lava se tasi na ola i luga o le fogaeleele na i ai se uunaiga faapea i taunuuga o le lalolagi e pei ona faia e lo tatou Alii ma le Faaola, o Iesu Keriso.
O le tala ia Iesu le Keriso o se tala tuai lea e tumau pea le fou. O le faatele ona ou faitau i Lona soifuaga ma galuega o le sili atu foi lea ona faatumulia lo’u agaga i le olioli, filemu, fiafia, ma le faamalieina. E i ai lava se faatosinaga fou e oo mai ia te au i le mafaufau ai i Ana upu ma le fuafuaga o le olaga ma le faaolataga lea na Ia aoao atu i tagata ao soifua o Ia i le lalolagi.
Ua tatou iloa uma e leai lava se isi na ola i luga o le fogaeleele na i ai se uunaiga faapea i taunuuga o le lalolagi e pei ona faia e lo tatou Alii ma Faaola, o Iesu Keriso; e ui na fanau mai o Ia i se tulaga maualalo, ma sa taoto i totonu o se faatanoa vao. Na Ia filifilia e avea ma Ana Aposetolo ni faifaiva matitiva, ma le le aoaoina. [Ua silia ma le] 1,900 tausaga ua mavae ma mou atu talu Lona Faasatauroga, ae i le lalolagi atoa, e ui lava i faigata ma gaogaosa, o loo mumu pea i loto o le faitau miliona o tagata se molimau i le paia o le galuega na Ia faataunuuina. …
O se puna o le olioli le faatuaoia mo a’u ma ua faatumulia ai lo’u loto i se tulaga le mafaaalia e tomanatu ai i le mea moni lava e uiga i le toe asiasi mai o le Atua lo tatou Tama Faalelagi ma lo tatou Alii o Iesu Keriso i le lalolagi ma toe faaali mai le talalelei i tagata; ma ua faatumulia au i le loto ma le agaga faafetai, i se tulaga e le mafai ona ou faamatalaina, na Ia faamanuiaina au i se malamalama o le paia o le galuega lea o loo tatou galulue ai. O lau tatalo faifai pea ma le faamaoni ia te Ia e masani lava ina ia aua lava nei faapogisaina lo’u mafaufau, ina ia aua lava nei ou alu ese mai le ala sao, ae ao faateleina tausaga o lo’u matua, ia faateleina foi lo’u malamalama, ina ia mu i totonu o lo’u loto musumusuga a le Agaga o le Atua ma faamalamalamaina ai lo’u malamalama ma faatumauina au ia mausali ma faamaoni e auauna atu i lo’u Tama Faalelagi.
Ma e ou te fia fai atu i le Au Paia o Aso e Gata Ai e tatau ia i tatou, i le mauaina o se molimau o le paia o le galuega o loo tatou faia, ia faatulaga o tatou olaga mai lea aso i lea aso ia aumaia ai le mamalu i le galuega a le Atua e ala mai galuega lelei ua tatou faia, ma faasusuluina atu o tatou malamalama ina ia iloa e tagata, a tatou galuega lelei, ma vivii atu ai i le Atua. E leai ni tagata i luga o le fogaeleele ua sili ona faamanuiaina e pei o le Au Paia o Aso e Gata Ai; e lei i ai lava ni tagata na maua se faailoga o le agalelei ma le alofa tunoa ma le onosai o le Atua lea ua faaeeina mai i o tatou luga, ma e ou te faapea atu o i tatou, e sili atu i alii ma tamaitai i luga o le fogaeleele, ua tatau ona ola i ni olaga faaleatua ma faamaoni.
Tina ma le Tamaitiiti, saunia e J. Kirk Richards; ata na tusia e Christina Smith