O Ai O Le A Avea ma Meaalofa?

Ana Márcia Agra de Oliveira, Pernambuco, Pasila

I le tausaga e 1982, o le Kerisimasi lona lua talu ona ma faaipoipo, na ma filifili ai ma Cleto e faavae ni aga masani faaleaiga. Ona o ma’ua o tagata muamua o lo matou aiga ua auai i le Ekalesia, o lo matou faamanatuina o le Kerisimasi i aso ua mavae—e ui ina faafiafiaina ai i matou pe a manatua —ae na le’i i ai le alofa ma le auaunaga moni. E le gata i lea, o la ma pepe muamua, o Diego e valu masina, o se mafuaaga lea e faaleleia atili ai i ma’ua i lenei ala.

Na fai si o ma’ua pisi i aoaoga i le univesite, o feau i le fale, o tofiga i le Ekalesia, ma le faatoa avea ma ni matua, ae na ma tuuto lava i le saunia mo se gaoioiga faapitoa. Na ma faaaogaina afiafi faaleaiga taitasi ia Tesema e faia ai ni teuteuga ma oo ai i se malamalama sili atu o faatusa ma lanu na ma vaaia i soo se mea. Na ma fuafua foi i le sauniaina o se taumafataga faigofie o le afiafi, ma na ma mafaufau i ni meaalofa aoga ma le taugofie. Ao ma aveina se polokalama o le suesue i tusitusiga paia, na ma iloa ai o le suiga moni i o ma uiga i le faamanatuina o le soifua mai o Keriso e aofia ai le filifilia o se meaalofa mo le Faaola.

Na ma mafaufau, “O le a se mea e te avatu i se tasi o le o loo Ia puleaina le lagi ma le lalolagi?” Na tuuina mai e tusitusiga paia le tali, ma folafola mai soo se mea tatou te faia “aua na faia e outou i le tasi o e aupito itiiti o o’u uso nei” (Mataio 25:40) ua tatou faia lea ia te Ia. Ona o le Kerisimasi o se vaitau o faauoga ma se taimi o le alofa, na ma mananao ai e valaaulia se tagata o le Ekalesia ina ia maua le agaga mafanafana ma le matagofie na ma lagonaina i lo ma fale. Na ma sailia ma le totoa se tasi e moomia sina faafiafiaina ma o le fesoasoani atu i ai e mafai ona avea ma a ma’ua meaalofa i le Faaola mo le Kerisimasi.

O taimi uma lava ma te valaaulia ai se uso po o se tuagane o le uarota po o le siteki i lo ma fale, ma te fiafia lava e iloa o la ua i ai se isi gaoioiga e alu i ai lena tagata. Na vave ona oo mai le po o le Vaeluaga o le Kerisimasi, ae ma te le i mauaina lava se tasi matou te fai Kerisimasi faatasi.

Na tonu ia i ma’ua ua leai se isi, ma a’o sauni le ma meaai o le afiafi ae tatagi loa le logo o le faitotoa. Ina ua ou tatalaina le faitotoa, na matua faafiafiaina au i le mauaina o se uo ma te le i toe fevaaiai mo sina taimi. E le’i leva atu nei ona feagai Avelar ma se faanoanoaga o se teteaga lē lelei. Sa faanoanoa o ia ma tuulafoaia ma na lagona se naunautaiga malosi ina ia matou mafuta.

Na ma faafeiloaia Avelar ma le alofa, ma na ia ta’u mai ia i ma’ua ua ia maua se siosiomaga na ia moomia ina ia faamafanafana ai mai ona mafatiaga. Na ma ta’u atu ia te ia e uiga i a ma’ua tapenapenaga e auauna atu ma fesoasoani i se tasi o loo manaomia le fesoasoani, ina ia mafai ona ia iloa e silafia ma alofa le Alii ia te ia.

Sa matagofie mo i matou uma, le iloaina sa auina mai e le Faaola se tasi sa le mafai ona ma mauaina: o la ma uo o Avelar. Na ma iloa ai le mea pito sili ona taua i fegalegaleaiga a atalii ma afafine a le Tama Faalelagi. Mo lena mafuaaga, na matou manatua ai pea ma le ma fanau e toatolu i Kerisimasi na mulimuli mai, o le faamoemoega lava o lea vaitau o le faamalolosia lea o noataga o le lotogatasi, alofa, ma faigauo.

Na tonu ia i ma’ua ua leai se isi, ma a’o sauni le ma meaai o le afiafi ae tatagi loa le logo o le faitotoa.