Ua Fanau mai Iesu
Na oo mai lemu le pogisa i luga o mauga e lata ane i Peteleema. O le taimi lea o le tautotogo, o le vaitau e fananau mai ai le tele o mamoe fou. E siakiina e leoleo mamoe pisi se tasi o mamoe ma le isi ao le i malolo mo le po.
Sa pisi foi Peteleema ia. Na o mai le toatele o tagata malaga i le nuu aua na tuuina atu e le tupu o Roma se faaaliga tusitusia e tatau i tagata uma ona o i le aai o o latou tuaa e totogi ai lafoga. Na sailia e ni tagata malaga se toalua o—Iosefa ma lona toalua, o Maria—se nofoaga e malolo ai mo le po.
Na iu lava ina maua e Iosefa ma Maria se faapaologa i le fale o manu, lea o loo tuu ai manu. Na fanau ai i lena fale o manu maualalo le pepe a Maria. O le pepe o le Alo o le Atua, o le Faaola i le lalolagi.
Na aui e Maria lana pepe i ie mama ma faia se moega mo Ia i vaovao mago vaivai, ma mama o le faatanoa. Na iloa e Iosefa o lenei pepe o le Alo o le Tama Faalelagi. Na ia faaigoaina le pepe ia Iesu, e pei ona muai ta’u atu e le agelu ia te ia.
Na alalaga fiafia agelu o le lagi! Na faataunuuina folafolaga a perofeta. O Ieova, lea ua faaigoaina nei ia Iesu, ua fanau mai i le lalolagi. Na pupula mai le lagi se fetu fou e faasilasila mai ai le tala fiafia.
Na faaali le agelu i luga o le mauga i leoleo mamoe, ma se malamalama na susulu e siomia ai mea uma. E le i vaaia lava e leoleo mamoe se mea faapenei, ma sa latou matatau ai.
“Aua le matau,” na fetalai ai le agelu, “aua, faauta, ou te aumai ia te outou le tala lelei, e olioli tele i le nuu uma. Aua o le aso nei ua fanau ai i le aai o Tavita, lo outou Faaola, o le Alii ia o Keriso. O le faailoga lenei ia te outou; E iloa e outou le tama meamea ua aui i le ie, o loo taoto i le fale povi.”
Na faafuaseia lava, na i ai agelu na ta’uina atu i leoleo mamoe, “O le viiga i le Atua i mea aupitoaluga, ma le manuia i le lalolagi, o le finagalo alofa i tagata.”
Ina ua o ese agelu, na faavave atu leoleo mamoe maofa i Peteleema, lea na latou mauaina ai le pepe o Iesu o loo taoto i le faatanoa vao. Ao toe foi atu leoleo mamoe i a latou mamoe, na latou vivii atu i le Atua ma ta’u atu i isi mea na latou vaaia.
Ierusalema
Peteleema
Mai le agavale: faamatalaga auiliili mai le Keriso ma le Taitai Talavou Mauoa, saunia e Heinrich Hofmann, faaaloaloga a C. Harrison Conroy Co.; ata o Peteleema na pueina e Scot Proctor; faafanua na saunia e Mountain High Maps © 1993 Digital Wisdom; ata na tusia e Sam Lawlor; ata vali o le Au Makoi na saunia e Paul Mann © 1999 IRI