Vaomago mo le Faatanoa
“O mea uma ua valaau atu ma taufaalata ia faia mea lelei, ma ia alofa i le Atua, ma ia auauna ia te ia, e mai le Atua ia” (Moronae 7:13).
Na sioa Mikaele i le tamai moega, o vaomago. “Ou te fiafia o le a i ai se moega malūlū, mafanafana o Iesu mo le po o le Vaeluaga o le Kerisimasi,” o ona mafaufauga ia.
Mo le vaiaso ua tea na tuu i ai e Mikaele ma le faaeteete ia vao mago ninii, taitasi i le taimi, i totonu o le tamai faatanoa. Na mafaufau Mikaele atonu o le a avea o se Kerisimasi sili atu ua ia maua aua o lea ua lava lona matua e malamalama ai i le uiga moni o le Kerisimasi.
I le vaiaso talu ai na tuuina mai ai e Tina se lesona i le afiafi faaleaiga e faatatau i le uiga moni o le Kerisimasi. Fai mai o Iesu Keriso o se meaalofa silisili na auina mai e le Tama Faalelagi i le lalolagi. Ona ia tuuina mai lea i tamaiti taitasi o le aiga se tamai faatanoa e leai se mea o i totonu, ma se tamai faatagata o le pepe o Iesu.
“Mo le isi vaiaso o le a sosoo o le a tofu outou ma se avanoa e toe faafoi atu ai se meaalofa i le Tama Faalelagi,” o le tala lea a Tina.
“E faapefea ona matou faia lena mea?” o le fesili lea a Mikaele.
“O la outou meaalofa i le Tama Faalelagi o le auauna atu lea i isi,” o lana tala lea. “O taimi uma lava e te faia ai se galuega lelei pe fesoasoani i se isi tagata, e mafai ona e faaopoopoina se fasi vaomago i lau faatanoa. O le tele o lou faaalia o lou agalelei atu i isi, o le sili atu foi lea o le malūlū o le faatanoa i le po o le Vaeluaga o le Kerisimasi.”
“Talosia ia mafai ona sili atu ni a’u vaomago i la’u faatanoa nai lo se isi lava!” o mafaufauga ia o Mikaele.
O le aso na sosoo ai na amata ai loa ona galue Mikaele i le faaputuina o vaomago.
“Tina, e mafai ona ou fesoasoani ia te oe e salu le fola o le fale?” o le fesili lea a Mikaele, ina ua ia vaai atu o loo ia faamamaina le umukuka.
“O le a ou fesoasoani ia te oe e su’e lau urosa taalo,” na ia fai atu ai i lona uso laitiiti ina ua tagi mo lana meataalo na leiloa.
“Ou te fia saluina foi ni kiona,” o lana tala lea ina ua alu atu lona tama i fafo e salu le auala taavale.
I totonu o ni nai aso na matua ese lava se vaaiga i le tamai faatanoa a Mikaele. Na matua faatumuina i vaomago! Ae na matauina foi e Mikaele se suiga ia te ia. Na amata ona ia fiafia e faia mea lelei mo isi aua ua ia iloa o le mea lea e finagalo i ai le Tama Faalelagi na te faia. O nisi o taimi e galo ai ia te ia ona faaopoopo se fasi vaomago i le faatanoa pe a ia fesoasoani atu.
Na tonu ia Mikaele o le faia o mea lelei na ia maua ai se faalogoga lelei i totonu ia te ia. I le po o le Vaeluaga o le Kerisimasi, ao ia tu i autafa o moli o le laau Kerisimasi, na faataoto lemu i lalo e Mikaele lana pepe itiiti o Iesu i le faatanoa, lea ua matua faatumuina lava i vaomago.
Na iloa e Mikaele na ia faia le mea sili na ia mafaia e faaali atu ai lona alofa mo le Tama Faalelagi ma Iesu. O se Kerisimasi aupito sili lea.
Ata na tusia e Jim Madsen