Seia Tatou Toe Feiloai
O Le Kerisimasi i le Tovine
O a ni mea e faaosofia ai se vaega o le Au Paia o Aso e Gata Ai ia tuua o latou fale i le aso o le Kerisimasi mo se aso e galue mamafa ai? O lo latou naunau e auauna atu ia te Ia o loo tatou faamanatuina Lona soifua mai.
I le faaiuga o Tesema na ufitia ai e se sau malulu ia paina e le i teuteuina i le taeao po. O loo filemu pea le tovine sei vagana ai le isi itu, lea o loo faatumulia i leo ma le malamalama, o le afitafu. O le taeao lenei o le Kerisimasi, ma i isi nofoaga i lenei vanu, o loo i ai pea tagata i o latou moega mafanafana pe o latou siosiomia foi le laau Kerisimasi ma matamata i le sagisagi fiafia o le fanau. Ae le faapea la le vaega toaitiiti lea i le tovine. Ua latou o mai e foai atu se meaalofa.
Ina ia malamalama i le uiga o le meaalofa, e tatau ona e iloa o lenei tovine i Madera, Kalefonia, ISA, o se vaega o le gaosiga o le uelefea a le Ekalesia. O tausaga taitasi e maua mai ai pe tusa ma le 400,000 pauna (180,000 kk) o vine. O le afa o le seleselega e tuuina atu i fata o faleteuoloa a epikopo. O le isi vaega e faaaogaina mo auaunaga agaalofa i le salafa o le lalolagi. O uarota ma paranesi mai siteki e valu ua tuu i ai ni galuega patino ina ia faauma ma tausia ni laina o vine.
O se tasi o galuega taua o le teuteuina o vine. O vine ua lavelave o le vaitau ua te’a e tatau ona ’oti ese, ma tuua ai na o ni nai laau o le a tutupu ae e fua mai ai le isi seleselega. A aunoa ma lenei teuteuga i lenei vaitau e le o fua ai vine, o le a soona ola talaulau le tovine. O le tele naua o vine e le gafatia ai e a’a ona tatalia. O le a matua faaitiitia fua, ma o le a matua tuuitiitia ai le seleselega.
Aisea e faia ai lenei galuega i le aso o le Kerisimasi? Aua o le toatele o tagata o le uarota e faigaluega i le faatoaga, e teuteuina le tovine ma togalaau ‘aina suamalie e ola ai. E tigaina a la latou galuega i le taimi lenei o le tausaga, ua na o le pau lava lea o le aso latou te malolo ai i le tele o vaiaso. Ua oo i le Kerismasi—ma e latou te faaaluina iinei i le tovine a le Ekalesia. O le mea moni lava, latou te o mai iinei i le 8 o Kerisimasi e 15 ua tuanai. Mo nei tagata o le Uarota Tolu o Madera o le gagana-Sipaniolo, o la latou meaalofa mo El Niño—mo le pepe o Keriso.
O se tasi o tagata faigaluega, o Miguel Chavez, na ia faamalamalamaina mai o se tasi lea o auala e toe avatu ai faamanuiaga uma latou te maua mai le Alii: “Ua matou tuuina atu ni mea i aiga o loo moomia le fesoasoani. O la matou saofaga itiiti e avea ma se faamanuiaga maoae i isi tagata.” Na faapea mai se tasi o tagata o le uarota, “O se galuega sili lenei e mafai ona matou faia aua o le tovine lenei a le Atua.”
Ma o lea, i lenei aso patino o le Kerisimasi, a uma ona teuteuina, afifi, ma noanoa e tagata nei o le Uarota Tolu a Madera a latou vine na tuu atu ia i latou, ua latou faamaeaina laina e lua a uarota tuaoi. O se meaalofa e fetaui mo se Tupu.
Ata na pueina e Howard Collett