Aga Masani i le Kerisimasi a Fitugafulu

Na faasoa mai e le usoga a Fitugafulu ni auala latou te faamanatu ai le vaitau ma manatua ai le soifua mai o le Faaola.

E mafai faapefea ona tatou faamanatuina le Kerisimasi ina ia taua mo tagata taitasi o le aiga? E mafai faapefea ona avea le Faaola ma totonugalemu o le Kerisimasi? O a ni aga masani e fesoasoani ia i tatou ia manatua ai o Ia ma Lona soifua mai?

Na faasoa mai e uso o Fitugafulu mai atunuu ma aganuu eseese ni auala na latou talia ai nei fesili mo i latou lava ma e pele ia i latou. Ua latou faasoa mai ni manatuaga anoa o le Kerisimasi, molimau, ma aga masani. (O loo tusia o latou atunuu moni i totonu o puipui.)

Elder Marcos A. Aidukaitis (Pasila): O le Kerisimasi o se avanoa e matua faapitoa lava mo au ma lo’u aiga e talanoa ai e uiga i nisi mea paia matou te le talanoaina atonu i se auala lava lea e tasi ma le faapitoa i isi taimi o le tausaga. O se avanoa e faaali atu ai le alofa i isi ma le agaga faafetai mo mea na tutupu i o matou olaga.

Elder David S. Baxter (Sikotilani): A o laiti le ma fanau, matou te o e pepese i le po o le Vaeluaga o le Kerisimasi, tufatufa atu meaalofa o poloka fafie mo le faamumuina o afi i aiga e le toaaga mai o le matou uarota. Matou te tutuina moligao i le po o le Vaeluaga o le Kerisimasi, faitau le tala o le Kerisimasi, faia se toonai faapitoa a le aiga, ma fiafia faatasi ai i le Kerisimasi.

Elder Gérald Caussé (Falani): I lo matou aiga ua matou filifili o le Kerisimasi e le na o le fiafia faatasi, ae ia tulimatai atu foi ia Keriso ma auauna atu i isi. E tusa ma le 10 tausaga talu ai na matou tuufaatasia ai se aufaipese o tagata o le aiga. Na matou o i falemai ma fale o le au litaea ma usuina pese o le Kerisimasi. I le taimi muamua sa na o se vaega itiiti. Na i ai pepe i o ma lima ma i totonu o taavale pepe. Ae ua matutua nei pepe, ma ua avea ma ni tagata e popoto e pepese. E 44 tagata i la matou aufaipese e fefaasoaai e le gata i tu masani o pese faaFaalani ae faapea foi ma viiga o le Ekalesia, ma ua matou iloaina lava le faamanuiaina tele. A uma ona pepese, ona tufatufa lea e le fanau i tagata mamai po o e matutua o ni meaalofa laiti na matou saunia o se aiga. Matou te taumafai ia maua se taimi ma tagata taitasi, e talanoa ai i le uiga moni o le Kerisimasi ma faalogo ai foi ia te ia. E tele lava mea e fia faasoa mai e tagata uma.

O a matou asiasiga o ni gaoioiga taua e manatua ai mea matou te iloa i le avea ai ma Kerisiano ma le tauaveina o le suafa o Keriso. O le Kerisimasi o se faamanatu lelei o le auala tatou te moomia ina ia amio ai i le tausaga atoa.

Elder Eduardo Gavarret (Iurukuei): O le Kerisimasi o se taimi faapitoa i o matou olaga. E faatumulia pea lava i matou i se lagona mafana i lena taimi. Pe a oo mai le masina o Tesema, matou te iloaina o le Kerisimasi o se taimi o le filemu ma mafuta faatasi ai ma aiga. E i ai sa matou tu masani o le tusi o ni tusi i a matou uo, ae sili ai lo matou fiafia e tusi ni tusi i le Faaola ma tuu i luga o le laau Kerisimasi e avea o se meaalofa matou te mananao e avatu ia te Ia.

Elder Carlos A. Godoy (Pasila): Matou te tusia faatasi o se aiga a matou molimau i kopi o le Tusi a Mamona ma lafo ia matou uo ma aiga e avea o ni meaalofa o le Kerisimasi. Ona o le Kerisimasi, e masani lava ona talia meaalofa. Ma o se auala manaia e faasoa atu ai le talalelei ma manatua ai o Keriso o se vaega sili ona taua o le aso.

Elder Christoffel Golden Jr. (Aferika i Saute): I le po o le Vaeluaga o le Kerisimasi matou te fiafia ai i se taumafataga manaia o le afiafi, a maea ona matou faitau lea i le tala a Luka i le soifua mai o le Faaola. I le taeao o le Kerisimasi, e fai o matou ofu lelei o le Aso Sa, ma auai i se sauniga puupuu o le Kerisimasi. E auai foi i lenei sauniga se vaega o tagata le lolotu ma e le toaaga mai. Mulimuli ane matou te asiasi ai i uo ma isi tagata o le aiga i mafutaga faaleaiga ma o iina e faamalosia ai a matou sootaga faaleaiga i le agaga moni o le Kerisimasi.

Elder Donald L. Hallstrom (ISA): I po o Vaeluaga o Kerisimasi i tausaga ua mavae matou te faatasitasi ai e faatino se taimi manaia e manatua pea o le faia o molimau. Na tuuina atu i tagata taitoatasi o le aiga e faailoa mai ona lagona e uiga i le Faaola ma lo tatou Tama o i le Lagi. O na lagona loloto o le alofa o le a liliu atu ai le tasi i le isi, ma o le faailoaina o le alofa mo tagata o le aiga o le a sili ona faamaoni. Ona faailoa mai lea e lo’u tama sana vaaiga mamao mo le aiga ma tuu mai se faamalosiau malosi i tagata taitoatasi o le aiga ia tumau faamaoni i le faatuatua. Ona matou tootutuli faatasi ai lea ma le lotogatasi i se tatalo faaiu faaleaiga.

Elder Paul V. Johnson (ISA): O se tasi o a matou aga masani i tausaga uma o lo matou auai atu faatasi lea o se aiga i le usuina o le Messiah a Handel. Matou te fiafia i ai. E tofu uma matou ma le kopi o le musika, ma e matou te maua ai le avanoa e usuina ai upu matagofie, na faamusikaina e Handel, ma toe manatunatu ai i le galuega a le Faaola.

Elder Yoshihiko Kikuchi (Iapani): E amata pe tusa ma le 30 aso ao le i oo i le Kerisimasi, ma te taumafai ai ma lo’u toalua e faitau upu a perofeta mai tusitusiga paia e faatatau i le soifua mai o le Faaola. Afai e te faitau i aso taitasi seia oo i le aso 25 o Tesema, e te lagona le faatupulaia o le agaga o le Kerisimasi, o lea tala ma lea tala, o lea mau ma lea mau. O le mea lena matou te taumafai e faia i lo matou aiga.

Ou te manatua pea le tali a Nifae i le fesili a le agelu e uiga i le faauigaga o le laau i le miti a lona tama. Na faapea mai Nifae, “Ioe, o le alofa lea o le Atua, ua salalau i loto o le fanauga a tagata” (1 Nifae 11:22). Ia te au lava ia, o le Kerisimasi e faatatau lea i le alofa o le Tama Faalelagi ma Iesu Keriso.

Elder Erich W. Kopischke (Siamani): I le taimi lenei o le vaitau, e matua manino ai lava le suia atoa o le fale. E teuteuina ai lala tetele o le laau o le paina, e tuuina i faamalama ia moligao, ma tautau i luga ia moli. E tuu e le fanau a latou teuga o le Kerisimasi i o latou potu moe, taoina kuki ma falaoa e fai i le fiu, ma e sasala le manogi i le fale atoa—o le manogi o le paina ma le kināmoni.

O le po o le Vaeluaga o le Kerisimasi o se taimi fiafia lea mo i matou e valaaulia ai aiga ma uo i lo matou fale. Matou te tutuina moligao ma le magalafu e faamafanafana ai totonu o le fale. Na matou saunia ni tusipese faapitoa o loo i ai ni viiga o le Kerisimasi matou te fiafia e usuina. Ou te aumaia i fafo la’u mea faifaili, ma e filifili e tagata taitoatasi se pese Kerisimasi matou te usuina faatasi. E i ai se agaga faapitoa e fiafia i ai tagata uma.

Ona matou talaia lea o meaalofa. E muamua le fanau laiti. E matamata tagata uma ma taufai sagisagi fiafia faatasi ao tatalaina meaalofa taitasi. E uma loa ona tatala uma meaalofa, e vave lava ona mou atu le fanau ma a latou oa. E nonofo tagata matutua ma talatalanoa. E pei lava o se afiafi faaleaiga faapitoa.

O nisi taimi matou te valaaulia ai tagata e o mai i le po o le Vaeluaga o le Kerisimasi o e atonu ua tuua na o i latou. O nei Kerisimasi e matua mananaia lava.

Elder Michael John U. Teh (Filipaina): O le uiga o le Kerisimasi ia te au, o Keriso ma lo’u aiga. O se avanoa e toe tautino ai ia te au lava ia, ia faaleleia atili le ma’ua sootaga ma le Tama Faalelagi ma le Faaola ma le ituaiga tane ma se tamā o i ai a’u. Ou te faafetai mo le avanoa e auai ai i sauniga faamanatuga i le tausaga atoa aua o se taimi lea ou te toe faafouina ai na feagaiga ma manatua ai le Kerisimasi. E mafai ona avea vaiaso uma e faapei o le Kerisimasi, o se taimi ou te toe tautino ai a’u lava ia ina ia manatua le Faaola.

Elder José A. Teixeira (Potukale): O le auala sili mo lo matou aiga faatumauina ma tausisia pea le agaga o le Kerisimasi, e le na o le vaitau ae mo le tausaga atoa foi, o le faitauina lea o tusitusiga paia. A o matou faitau i tusitusiga paia o se aiga, matou te faamanatu ai ia i matou lava le Faaola ma le agaga moni o le Kerisimasi.

O le uiga moni lava o le Kerisimasi ia te au ma lo’u aiga o Iesu Keriso lea. O se taimi o le foai atu, o se taimi o le taliaina, o se taimi o le toefesootai ma o matou aiga, ma o se taimi e faalautele atili ai le alofa ia i latou o loo siomia i tatou.

Elder Francisco J. Viñas (Sepania): Ou te fia faasoa atu ia te outou se aafiaga na matou maua ao avea a’u o se peresitene o le misiona i le 1989. Ao ma galulue ai i le Misiona a Salta Atenitina, i ni nai aso ao le i oo i le Kerisimasi, na matou mauaina se faatonuga mai le Matagaluega o Faifeautalai e tatau ona nonofo faifeautalai i o latou fale seia toe logoina mai ona o se osofaiga o Panama e le Iunaite Setete.

I le taeao o le aso 24 o Tesema, na faatumulia a matou taavale o le misiona ma vaevaeina le misiona i ni vaega se lua: o o’u fesoasoani na o i le vaega i matu o le misiona, ae ma o ma lo’u atalii e valu tausaga i saute o le misiona. O le faamoemoega ina ia asia soa taitasi i o latou fale, tufa atu i ai meaai, ma faasoa atu se savali o le Kerisimasi ia i latou. O se aafiaga maoae lenei mo au ma lo’u atalii. O se aafiaga matagofie mo i ma’ua uma le i ai lea i fale taitasi ma fefaasoaai ma faifeautalai—o se tasi o mea ma te teufatuina e avea o se manatuaga maoae o le Kerisimasi.

Sa nonofo lo’u toalua ma o’u afafine e toalua i le fale o le misiona, ma na ma toe foi mai ma lo’u atalii i le taeao po o le aso 25 o Tesema. O se taimi muamua lena matou te le i faatasi ai o se aiga i le po o le Vaeluaga o le Kerisimasi, ae sa avea mo i matou o se mea aupito sili ona manatua o Kerisimasi uma.

Elder Jorge F. Zeballos (Chile): Pe a i ai sau molimau ia Iesu Keriso—o loo soifua o Ia, o Ia o lo tatou Faaola, lo tatou Togiola—o le ala sili e faaalia ai lou alofa mo Ia o le usiusitai lea i Ana poloaiga. O lea la ia te au lava ia, o le auala sili e manatua ai o Ia, e le na o le vaitau o le Kerisimasi ae o aso uma, o le usiusitai lea i mea uma ua Ia poloaiina ai i tatou e fai.

Elder Claudio D. Zivic (Atenitina): O le uiga o le Kerisimasi ia te au ma lo’u aiga o le faamanatuina lea o le soifua mai o Iesu Keriso, lo tatou Faaola ma le Togiola. O lona uiga o le faatasia o se aiga i le po o le Vaeluaga o le Kerisimasi e fai se afiafi faaleaiga lea e auai tagata uma i le tuuina atu, faitauina, ma le usuina o le gaoioiga faapitoa o le soifua mai o le Pepe o Peteleema. Sa avea lava lenei mea ma faamanatu sili ona taua i lo matou aiga, ma e matou te taumafai pea ina ia faatumauina le agaga o lea vaitau e ala i le ola ai i le talalelei i aso taitasi.