Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga.O nai faataitaiga nei.

“O Se Meaalofa e Tatau i ai le Tausiga Faaopoopo,” itulau 26: Ua faasoa mai e Elder Neil L. Andersen ni nai faataitaiga i le ala e taitaia ai tagata e le Agaga Paia. Mafaufau i le faitauina i nisi o nei faataitaiga ona fesili atu lea i tagata o le aiga e faasoa mai ni aafiaga na latou lagona ai le Agaga Paia.

Mo tamaiti laiti, e mafai ona e faaali atu ni mea faitino e fai ma sui o faamanuiaga a le Agaga Paia. Mo se faataitaiga, o le Agaga Paia e pei o se palanikeke aua Na te faamafanafanaina i tatou (tagai i le Ioane 14:26), o se tapasa aua Na te taialaina i tatou (tagai i le 2 Nifae 32:5), ma se fasimoli aua Na te mafaia ona fesoasoani ia i tatou pe a faamamaina i tatou e ala atu i le Togiola (tagai i le 2 Nifae 31:17; 3 Nifae 27:20)

“Aga Masani i le Kerisimasi a Fitugafulu,” itulau 32: Faitau nisi o aga masani o loo tusia i le tusiga, ona fesili atu lea i tagata o le aiga po o a latou aga masani o le Kerisimasi e fiafia i ai. Pe i ai ni aga masani fou tou te mananao e faataitai?

“O se Malo Faapitoa,” itulau 68: E pei o le aiga i le tala, e mafai ona e faamanatuina le aso fanau o le Perofeta o Iosefa Samita e ala i le aoaoina o le Uluai Faaaliga. Atonu e te manao foi e faitau se lauga o le konafesi e uiga ia Iosefa Samita (tagai, mo se faataitaiga, Tad R. Callister, “Iosefa Samita —o le Perofeta o le Toefuataiga,” Liahona ma le Ensign, Nov. 2009, 35–37).

Agaga Faafetai mo le Misiona a le Faaola

O se tasi o a matou afiafi faaleaiga sili ona fiafia i ai na fesoasoani ia i matou e faafetaia atili ai le soifua ma le misiona a le Faaola. Na matou fesili atu i tagata o le aiga e su’e ia mau e uiga i lima, mata, vae, po o fofoga o le Faaola. Ona matou faasoaina lea o na mau. Mo se faataitaiga, na faamaloloina e lima o le Faaola le lepela, o Ona vae na savalia le vai, ma Ona mata na tagi i le tuugamau o Lasalo. Na matou talanoaina foi manua i le tino o Iesu ma le atoatoa o Lana taulaga. O a matou talanoaga e uiga i le soifua ma gaoioiga a Iesu Keriso na valaaulia ai le Agaga ma faatagaina tagata uma o le aiga e tuuina mai molimau i lo tatou Faaola.

David R. Anderson, Iuta, ISA