Savali a Faiaoga Asiasi
O Lo Tatou Tiutetauave le Auai e Faatino Galuega o le Malumalu ma Talafaasolopito o Aiga
Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua • Aiga • Toomaga
I le tele o seneturi e toatele tagata ua maliliu e aunoa ma se malamalamaaga o le talalelei. O nisi o na tagata o o outou aiga vavalalata pe mamao foi le faiā. O loo latou faatalitali mai ia te oe e faia ni sailiga manaomia e sosoo faatasi ai ou aiga ma faia sauniga faaola mo i latou.
O le tele o malumalu o le lalolagi e le o lava le pisi. Na folafola mai e le Alii o le a liliu atu o outou loto i o outou tama ina ia le matua faatafunaina lava le lalolagi atoa i Lona afio mai (tagai MFF 2:2–3).
E i ai faamanuiaga patino e te mauaina o se taunuuga o le auai e faatino galuega o le malumalu ma talafaasolopito o aiga. O se tasi o nei faamanuiaga o le lagonaina o le fiafia ao e tautuaina ou tuaa. O le isi o le mafai lea ona e agavaa mo se pepa faataga o le malumalu, e faaalia ai lou agavaa i luma o le Alii. O i latou e le o agavaa nei mo le avanoa e maua ai se pepa faataga ua tatau loa ona galulue faatasi ma le epikopo po o le peresitene o le paranesi ina ia vave ona agavaa. Faamolemole aua nei leai lenei faamaoniga taua. Ou te molimau atu e moni le Togiola ma e mafai ona faamagaloina agasala pe a faaalia le salamo e tatau ai.
Ao tatou auai i galuega o le malumalu ma talafaasolopito o aiga, ua tatou mautinoa lava le i ai o le Agaga e faamafanafanaina i tatou i o tatou luitau ma taialaina i tatou i filifiliga taua. O galuega o le malumalu ma talafaasolopito o aiga o se vaega lea o la tatou galuega e tuuina atu ai le fesoasoani, po o le auaunaga, i o tatou lava augatuaa.
Julie B. Beck, peresitene aoao o le Aualofa.
Mai Tusitusiga Paia
Malaki 4:5–6; 1 Korinito 15:29;1 Peteru 3:18–19; MFF 110:13–16; 128:24
Mai lo Tatou Talafaasolopito
“Na saunoa mai le Perofeta o Iosefa Samita, ‘Ua tuuina mai e le Atua i o tatou luga se tiutetauave maoae e saili atu mo o tatou tagata ua maliliu’ (History of the Church, 6:313). Mai lava i le amataga, na lagolagoina e tuafafine o le Aualofa lenei galuega taua. I Navu i le 1842, o le manao o Sarah M. Kimball e fesoasoani i tagata faigaluega o le malumalu na uunaia ai se vaega o tuafafine e faatulaga i latou lava ina ia mafai ona sili atu ona aoga la latou auaunaga. Ao amata ona latou fono, o le Perofeta … na faatulagaina le Aualofa muamua i lalo o le faatulagaga o le perisitua. Mai lena taimi, na fesoasoani tuafafine o le Aualofa e faalautele le galuega o le Malumalu o Navu. …
“I le 1855, ua valu tausaga talu ona taunuu le Au Paia muamua i Iuta, na faatulagaina loa le Maota mo Faaeega Paia. O Eliza R. Snow, se tasi o uluai tagata o le Aualofa muamua ma na ia faasaoina faamaumauga o lena faalapotopotoga, na valaaulia e Peresitene Polika Iaga i le 1866 e avea ma peresitene aoao o le Aualofa. O ia ma isi tuafafine na avea ma tagata faigaluega faamaoni i le Maota mo Faaeega Paia. Ina ua maea Malumalu o St. George, Logan, ma Manti, na malaga nei tuafafine i malumalu taitasi ina ia mafai ona latou faia galuega mo e ua maliliu iina.”1
Ata na tusia e Jerry Garns