Kerisimasi i le Lalolagi Fou
I Amerika, o le faailoga o le soifua mai o le Faaola—o se po e aunoa ma le pogisa—na laveaiina ai ē na talitonu.
Mata e te iloa pe a na faafuaseia ona i ai se fetu fou i le lagi i se tasi o po? Atonu e leai. Ae e mautinoa lava lou matauina o se po e le pogisa—o se po e faatumauina le pupula e pei o le aoauli e tusa lava pe ua goto ifo le la. O se mea la lena e matua faigata lava ona misia, aemaise lava pe afai na e i ai i le motu o tagata lea na tu ai Samuelu le sa Lamana i luga o le au pa o le aai ma ta’u atu faailoga ma mea ofoofogia maoae o le a avea ma faailoga o le soifua mai o le Alo o le Atua. Afai na e faalogo i le saunoaga a Samuelu, e mautinoa lava lou mataituina o faailoga.
Misiona a Samuelu i Saraemila
O Samuelu o se sa Lamana lea na poloaiina e le agelu e alu atu i le nuu o Saraemila e valaau atu i tagata sa Nifae ia salamo. I le taimi lava lea i le talafaasolopito o le Lalolagi Fou e pei ona faamauina i le Tusi a Mamona, sa avea moni lava tagata sa Lamana ma tagata e sili ona amiotonu —lea na manaomia ai se perofeta sa Lamana. E mautinoa lava na silafia e le Alii o le a umi sina taimi mo sa Nifae e liliu ese ai mai i o latou auala amioleaga ma talia o Ia o se Togiola o le lalolagi, o lea na Ia auina mai ai Samuelu i le lima tausaga muamua ane ina ia sauniaina tagata mo Lona afio mai.
E ese mai le talaiina o le salamo, na taitaiina Samuelu e le agelu e aoao tagata o Saraemila e uiga i faailoga o le soifua mai o Iesu Keriso. E tusa ai la, na folafola atu e Samuelu i le lima tausaga o le a i ai “faailoga i le aso o lona afio mai; aua faauta, e i ai i le lagi malamalama tetele, e iu ina leai se pogisa i le po a e lei oo i le ao e afio mai ai o ia, e ui ina i ai i tagata e peiseai o le ao” (Helamana 14:3). Na ia tau mai o lenei faailoga o le a tulai mai “o le po foi lea a o lei fanau mai o ia [o le Alii]” (Helamana 14:4). E le gata i le valoiaina o le po e leai se pogisa, ae na ta’u atu foi e Samuelu ia i latou e matamata mo le “fetu fou … , tou te lei vaaia se fetu faapea” (Helamana 14:5).
Tauemuina o e Talitonu
E tusa ma le lima tausaga talu ona maea valoaga a Samuelu, na tauemuina e na faatuatua e o latou fili, o e na faapea mai, “Ua mavae le aso, ma ua le taunuu upu a Samuelu; o le mea lea e le aoga ai lo outou olioli ma lo outou faatuatua i lenei mea” (3 Nifae 1:6). Na fuafuaina foi e e na le talitonu e fasiotia tagata na talitonu pe afai e le taunuu faailoga i le aso na tuupoina (tagai i le 3 Nifae 1:9).
Ina ua lata mai le aso o le faailoga o le lima tausaga, na amata ona “matua faanoanoa e ua talitonu, ne’i le taunuu na mea sa folafolaina” (3 Nifae 1:7). Ae na faaauau pea ona latou “faatalitali i lena ao ma lena po ma lena ao e pei o le ao e tasi, ina ia iloa ai e i latou ua le fai fua lo latou faatuatua” (3 Nifae 1:8).
Ua Faataunuuina Valoaga
Na oo ina ua latalata mai lena aso na tuupoina e maliliu ai e na talitonu. O le popolega a ona tagata na matua faanoanoa ai le perofeta o Nifae ma ia talosaga atu ai i le Tama Faalelagi “ona o lona nuu, ioe, o i latou semanu a faaumatia ona o lo latou fatuatua. [Ma] na ia matua alaga atu o ia i le Atua i le aso atoa” (3 Nifae 1:11–12). Na faafofogaina ana tagi, ma na fetalai atu le Alii ia te ia, “Ina faaea ia lou ulu ma ia loto tele; aua faauta, ua lata mai le aso o lenei po foi e tuuina atu ai le faailoga, a o taeao e alu atu ai a’u i le lalolagi e faaali atu ai i le lalolagi ou te faataunuuina mea uma ua ou poloaiina ia folafolaina atu i fofoga o a’u perofeta paia” (3 Nifae 1:13). O lena po, “ua leai se pouliuli i le goto o le la” (3 Nifae 1:15), e pei ona muai fofogaina mai e Samuelu. O mea uma na valoia e Samuelu na faataunuuina, e oo lava i le faailoa mai o le fetu fou.
E Leai se Faapogai mo le Le Talitonu
I totonu o le Tusi Paia e leai se faamaumauga o se po e lei pogisa i le taimi na soifua mai ai Keriso ma sa na o sina ta’ua puupuu mai o se fetu fou, na vaaia e le Au Makoi lea na mulimuli i ai e oo i le tamameamea o Keriso (tagai i le Mataio 2:2, 9–10). I le nuu o Iuta, na o sina vaega na molimauina ia faailoga o le soifua mai o Keriso, e pei o leoleo mamoe (tagai i le Luka 2:8–18). Ae i Amerika, “o tagata uma ua i luga o le fogaeleele atoa e amata mai i sisifo e oo atu i sasae, o le laueleele i le itu i matu atoa ma le laueleele i le itu i saute” na vaaia faailoga ma iloa “e le pine ona afio mai le Alo o le Atua” (3 Nifae 1:17).
Aisea na molimau ai e le toatele o tagata faailoga o le soifua mai o le Faaola i le Lalolagi Fou? O upu a Samuelu na tuuina mai ai se faamalamalamaga: “Ua faapea mai foi le agelu ia te au: E iloa e nisi e toatele mea e sili i nei mea, ina ia latou talitonu e taunuu nei faailoga ma ia mea e ofo ai i luga o lenei laueleele uma, ina ia le toe i ai se ala e le talitonu ai le fanauga a tagata” (Helamana 14:28; faaopoopo i ai le faamamafa).
Faasaolotoina Mulimuli Ane
Ina ua toe oso ae le la i le lagi ina ua mavae le po e aunoa ma le pogisa, na “iloa ai” e tagata “o le aso lena e fanau mai ai le Alii, ona o le faailoga sa tuuina mai” (3 Nifae 1:19). Manatu faalemafaufau la i le fiafia! Na faasaoina e na talitonu. Na faasaoina o latou ola mai le oti mai lima o o latou fili lē talitonu. I le tulaga faaleagaga, na faasaoina foi i latou, aua na afio mai le Alo o le Atua i le lalolagi e laveai tagata uma mai a latou agasala e ala i Lana Togiola.
E le masani ona tatou mafaufau i le Kerisimasi o se faamanatuina o le faasaolotoina, e pei o le Paseka i tagata Iutaia, o e faamanatuina le faasaolotoina o le fanauga a Isaraelu mai le nofo pologa i Aikupito. Ae o le aso na soifua mai ai le Faaola na avea lava ma aso o le faasaolotoina o e talitonu i le Lalolagi Fou.
Ao e faamanatuina le Kerisimasi i lenei tausaga, ia manatua mea na tutupu i Amerika faapea foi ma mea na tutupu i le isi itu o le kelope i le nofoaga na soifua mai ai le Faaola. E ui o Lona soifua mai na aumaia ai le saolotoga faaleagaga o tagata uma, ae e moni lava na laveaiina ai mai le oti se vaega o le au talitonu totoa i le Lalolagi Fou. Ma o Lona soifua mai e faaauau pea le ofoina atu ai o le laveaiina mo i latou uma o e talia o Ia e avea ma lo latou Alii ma Faaola.
Agavale: ata vali na saunia e Walter Rane; luga: O Samuelu Le Sa Lamana o loo Vavalo, saunia e Arnold Friberg
Agavale: Na Tauina Atu i Leoleo Mamoe le Soifua Mai o Keriso, na saunia e Arthur A. Dixon, faaaloaloga a le Falemataaga o Talafaasolopito a le Ekalesia; pito i luga: Faauta i le Tamai Mamoe a le Atua, Walter Rane, faaaloaloga a le Falemataaga o Talafaasolopito a le Ekalesia