E Pei o le Susu Suamalie

Saunia e Yolanda Morales Posadas

Afai e te taliaina ma faaaogaina le talalelei moni a le Alii, o le a faasuamalieina lou olaga e pei ona faasuamalieina o le susu e le suka.

Na ou ola ae o se tagata faamaoni, faamoemoeina e mulimuli i mataupu faavae na aoaoina ai au e o’u matua, i si o la’ua malamalama itiiti faalelotu. Peitai, ina ua mavae le maliu o lo’u tama i le 2005, i le 15 o o’u tausaga, na avea au o se tagata ese. Masalo o se auala e faailoa atu ai lo’u tiga i le le faatofa atu ia te ia. O le a ou faanoanoa pea i le le sogi atu ia te ia ao lei alu o ia i le falemai.

Ina ua mavae lona maliu na amata ona ou pipii atu i tagata e le lelei ni o latou tulaga faatonuina. Na ou faia ni mea na ou faapea lava e LELEI ma na faia foi e tagata uma, peitai ua ou iloa nei e le ni mea e fiafia i ai le Alii. Na ou maua ai le fiafia, e tusa ai ma le tulaga o le fiafia faalelalolagi, ae o le mea moni lava ou te lei fiafia. E lei faamalieina au ma na i ai se mea na misi, ae ou te lei iloaina lena mea. Na amata ona le lelei o’u togi i le aoga. O le vaega e sili ona leaga na leai so’u manatu i le ala ou te maua ai le fiafia i lo’u olaga. Ou te lei vaai i lena taimi i aafiaga lelei na ou misia ma lo’u aiga ma lo’u tina, o le tagata e pito sili ona ou alofa i ai.

Ou te tatalo i le Atua i le po. E lei aoaoina au e se tasi pe faapefea ona tatalo, ae na ou lagonaina e pei o loo Ia faafofoga mai. Na ou aioi atu ia te Ia ina ia fesoasoani ia te au ia ou fiafia ma faailoa mai ia te au pe o manuia lo’u tama. Sa ou popole ne’i te’i o mafatia i se isi nofoaga. Na faaauau pea a’u talosaga mo le tele o po.

Na iu lava ina oo mai le tali. Faapea lava a’u o le a ou maua le tali e ala mai i se miti, ae nai lo lena na oo mai ni alii faifeautalai se toalua. Na la o mai i lo matou fale ia Tesema 2006. Ou te lei malamalama o i la’ua o se tali o a’u tatalo, ma e oo lava i se lesona se tasi ou te lei fia faalogo i ai. Na faalogo lo’u tina ma filifili loa e alu i le lotu. E lei toe nofo lava o ia talu mai lena taimi. Na papatisoina o ia, ma i ni nai vaiaso mulimuli ane na papatiso ai o’u tei ma lo’u uso. Na ou matauina se suiga tele lava i lo’u tina ina ua maea lona papatisoga, na oo lava ina foliga mai ua talavou ma fiafia. Na matua faatumulia lo matou fale i lona fiafia ma le toafilemu; o le taimi lava e sau ai se tasi i lo matou fale e na te lagonaina lava se suiga tele.

Na ou iloaina le mea na tulai mai ma filifili loa e alu i le lotu. O se aafiaga e le masani ai; e lei lelei lava le faiga o au i se taimi muamua. Na agalelei tamaitai ma fai faalelei a’u ma sa ou lagona ai le mafanafana i le lotu. Na auaua’i ona faatalitonuina au e moni le Ekalesia, ma na ou filifili ai e faalogologo i lesona mai i alii faifeautalai.

Na papatisoina au i le aso 3 o Fepuari, 2007, i le uarota a Uribe, Siteki a Veracruz Mekisiko, e alii faifeautalai maoae se toalua. O le a ou manatua pea i laua, ma e ou te mafaufau ia i laua o a matou agelu. O le aso o lo’u papatisoga e le mafai ona ou faagaloina. Ua ou mama mai agasala uma. Na soloiesea a’u mea sese ona o le Togiola a Iesu Keriso. Na ou lafoa’ia o’u lagona toilalo, ma ua le toe i ai se lagona lē ta’uaogaina. Ua suia i se olioli tele i totonu o lo’u loto.

Na auina mai e le talalelei moni ia te au ma lo’u aiga le fiafia tele. Ua ou maua ai ni uo e faavavau. E faaauau pea ona ou tau e faasagatau atu i le lalolagi, ae o le taimi nei ua ou maua le talalelei moni ma le Agaga o loo aumaia ia te au le fiafia ma le filemu i aso uma. O lea ua ou iloa le tali o le fesili na ou fesiligia ai le Alii mo se taimi umi lava. Afai e talia e lo’u tama sauniga na matou faia mo ia i le malumalu, ou te iloa ua ia fiafia ma ua toafilemu. Ou te talitonu ua ia taliaina le talalelei ma o loo ia faatalitali mai mo i matou.

O nisi taimi ou te toe tepa ai i tua ma iloa le tele o mea ua faamanuiaina ai au. Ou te iloa o loo i ai se fiafiaga sili atu nai lo lena na ofoina mai e le lalolagi ma ona faatosinaga ma faasoesa. O le fiafia moni e aumai i le talalelei a Iesu Keriso. O mea uma e aoaoina mai e le talalelei e mo lo tatou lelei.

Na ou maua i se tasi taimi se i-meli na faamalamalama ai e se tina i lana tama tama laitiiti o le Atua e pei lava o se suka ua e faaopoopoina i lau susu. E le mafai ona e vaaia, ae ua faasuamalieina ai mea uma. I lea lava tulaga, e le mafai ona e vaai i le talalelei moni a le Alii, ae afai e te taliaina ma faaaogaina, e faasuamalieina lou olaga e pei ona faasuamalieina o le susu e le suka.

Faamatalaga mai ia Keriso i Emau, saunia e Carl Heinrich Bloch, faaaoga ina ua faatagaina e le Falemataaga Logologoa Faavaomalo i Frederiksborg i HillerØd, Tenimaka; ata o le susu na pueina e Robert Casey