Fesili & Tali

“E faigata ia te au le faaosofia o au lava e faitau ia tusitusiga paia. E mafai faapefea ona faaosofia a’u?”

O le suesueina o tusitusiga paia e mafai ona faigata i le taimi muamua. O le tele ia o mataupu e aoaoina, ma o tagata ma nofoaga e foliga mai e matua ese lava. Ae o le suesueina o tusitusiga paia o le a avea o se aafiaga faamalieloto pe a e tumau ai.

Faataitai le suesuega a le perofeta o Alema na faamatalaina (tagai i le Alema 32:27–34). Na ia aoao mai faapea afai e te “tuuina mai se mea” i lou olaga mo afioga a le Atua, o le a faateleina ai lou loto ma faamalamalamaina ai lou mafaufau. O le a faaosofia ai foi oe e faaauau pea le faitauina o tusitusiga paia aua, e pei ona folafola mai e Alema, o le a amata ona suamalie ia te oe afioga a le Atua (tagai i le Alema 32:28).

O le isi auala e maua ai se uunaiga o le sailia lea o le tele o faamanuiaga e maua mai i le suesueina o tusitusiga paia:

• O le suesue soo ma le faamaoni i tusitusiga paia o le a valaaulia ai le Agaga i lou olaga, tali i au fesili, fesoasoani ia mama ou mafaufauga, faaosofia oe e auauna atu i isi, fesoasoani ina ia anoa au tatalo, ma fausia lau molimau ia Iesu Keriso ma le Toefuataiga.

• O le a aoaoina oe e tusitusiga paia i le auala e maua ai le faatuatua, le ala e iloa ai le Agaga Paia, ma le ala e salamo ai. O le a aoaoina oe pe aisea tatou te manaomia ai se Faaola, aisea e tatau ai ona i ai le faafeagai, aisea na foafoaina ai lenei fogaeleele, ma le anoanoai o isi mea.

A o e tofo i nei faamanuiaga, e te le tau faamalosia oe lava e faitau—o le a e sagisagi atu i ai.

O Tusitusiga Paia e I Ai Tali

O le faitauina o le 2 Nifae 32:3, e mafai ai ona e vave malamalama i le mafuaaga e manaomia ai lo tatou faitau ma suesue i tusitusiga paia. Ou te iloa o loo i ai i tusitusiga paia tali uma o a tatou fesili! E tatau ona tatou malamalama ua tuuina mai tusitusiga paia e fesoasoani i lo tatou agai i luma ia atoatoa, lea e avea ma se vaega matua taua o lenei olaga. Ua tofu uma i tatou ma ni nai minute i aso taitasi ua tuueseina mo le faitauina o tusitusiga paia.

Sergij C., 21 tausaga, Novosibirsk, Rusia

O Se Molimau Malosi Atu

Ou te le i faitau lava i tusitusiga paia vagana ai ina ua fautua mai le peresitene o Tamaitai Talavou ou te galue i la’u polokalama o le Alualu i Luma o le Tagata Lava Ia. Na ta’u mai ai ia te au ou te faitau i tusitusiga paia i aso uma mo ni nai vaiaso. Ina ua uma ona faia lea mea, e lei toe taofia lava lo’u faitauina. O la’u fautuaga sili o le tatau lea ona e galue i lau tusi o le Alualu i Luma o le Tagata Lava Ia po o le Tiute i le Atua. Tago e lu’i oe lava e faitau ma saga faitau atili i tusitusiga paia, ma o le a e vaaia se suiga o oe lava ia. Ou te ta’u atu ia te oe lenei mea e aunoa ma se masalosalo—o le a e iloa ai o loo ia te oe se molimau malosi atu.

Paola S., 16 tausaga, Cortés, Honduras

Tatalo mo se Malamalamaaga

E tusa lava pe tele ni au galuega faatino ma meaaoga o le aoga, ua ou tuuesea lava na mea ae amata faitau muamua ia tusitusiga paia. Ou te amata i se tatalo e valaaulia ai le Agaga Paia ina ia faamalamalamaina le afioga a le Atua. Ma e ala mai foi i le fesoasoani mai a tusi lesona o le seminare, ua amata ai ona faatupulaia ma faaauau le faaosofia o a’u e faitau tusitusiga paia.

Elieser N., 16 tausaga, Ilocos Norte, Filipaina

Ofutau o le Atua

O le ki mo le atiina ae o soo se amioga masani, o le manao. Ia fai ma ou manaoga le faitau i aso uma. Ia tausia se faamaumauga o le aofaiga o mea e te faitauina, ma ia taumafai e faitau i le taimi lava e tasi i aso uma. E fesoasoani ia te oe e atiina ae ai le faia e le aunoa. O le faitauina o tusitusiga paia e pei lava o le ofuina o le ofutau o le Atua. E le mafai ona e alu e te tau e aunoa ma lou ofutau. Aua e te alu i se lalolagi o le agasala e aunoa ma le ofutau o le Atua. Puipuia oe lava ia—faitau i tusitusiga paia.

Andrew G., 18 tausaga, Maine, ISA

O Se Mea mo Tagata Uma

E fesoasoani ia te au e mafaufau ai e uiga i mea o loo i tusitusiga paia. E le gata ina i ai le talalelei, aoaoga a Keriso, ma poloaiga, ae o ni tusi o mea maoae—aemaise lava le Tusi a Mamona—e tumu i taua, tagata lauiloa, tagata lelei, ma tagata leaga. O loo i ai i tusitusiga paia se mea mo tagata uma.

Eve W., 15 tausaga, Nevada, ISA

E Le Na o se Tusi

Aua e te mafaufau i tusitusiga paia ua na o se tusi e tatau ona e faitau i ai mo le seminare pe ona o le mea e tatau ona e faia. E te faitau ai i afioga a le Atua. O loo i ai mea maoae na tutupu, mafatiaga, ma taua. O tusitusiga paia o se molimau lea ia Iesu Keriso—o Ia o lo tatou Faaola, na Ia afutoto ma maliu mo i tatou. Na valoia e perofeta Lona tulaga paia. Na maliliu le toatele ona e lei mafai ona latou teena le mea na latou iloa e moni. E le i maluelue lo latou faatuatua. E tatau ona tatou taumafai uma ina ia faatuatua e pei o i latou.

Kaleb L., 14 tausaga, Iuta, ISA

E Finagalo o Ia e Talanoa ia te Oe

E i lo tatou Tama Faalelagi le tali o fesili taitasi e te fesiligia ai o Ia; pau lava le mea e te faia o le faitau lea o tusitusiga paia ma faaaoga i lou olaga. O le iloaina e finagalo le Tama Faalelagi e talanoa ia te oe ma tali i au tatalo o le a fesoasoani ia te oe e saili ai o Ia i aso uma i tusitusiga paia. A e usiusitai i Ana afioga, o le a faaleleia atili lou olaga, ma o le a e maua le malutaga ma le filemu. O le a e fiafia pe a e faalogoina Lona siufofoga.

Elberth R., 18 tausaga, Ixtapaluca, Mekisiko

Amatalia se Amioga Masani o le Faitautusi

O le amatalia o se amioga masani e mafai ona fesoasoani tele. Amata lemu; faitau pe a ma le tasi pe lua mataupu i aso taitasi. E le pine ae e maua se amioga masani o le faitauina o tusitusiga paia. E masani lava ona ou faitauina ni nai mataupu i afiafi taitasi ma usuina se viiga. O lenei faasologa masani ua siitia ai au ma maua ai se vaaiga fiafia mo mea o le a aumai e le isi aso e sosoo ai. Ma ua ou maua ai se malamalama sili o lesona i le seminare. O tusitusiga paia o se faamanuiaga. Ia faaaogaina ma le tatau.

Taylor C., 15 tausaga, Uosigitone, ISA

Fautuaga mo Lou Olaga

E faamatala mai e tusitusiga paia aafiaga o tagata e feagai ma faigata e talitutusa foi ma tatou. Pe a amata lou faitauina o tusitusiga paia, fai se tatalo ma ia e faatuatua o le a e maua fautuaga mo lou olaga. O tusitusiga paia o se tasi lea o auala e fesootai mai ai le Tama Faalelagi i Ana fanau. Tatou te mauaina i tusitusiga paia le malosi e fetaiai ai ma soo se ituaiga o tofotofoga, ma e ou te tuuina atu la’u molimau pe a lelei ona aoaoina i tatou, o le a faamanuiaina i tatou i le iloatino o le lelei mai le leaga ma o le a tatou taumamao ai mai i mailei a Satani.

Anderson F., 19 tausaga, São Paulo, Pasila

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Sili Atu ona Fiafia I Ai

President Gordon B. Hinckley

“Ou te faafetai mo le faamamafaina o le faitau i tusitusiga paia. Ou te faamoemoe o le a avea lenei ma mea e sili atu ona outou fiafia i ai nai lo se tiute; a le o lea, o le a avea ma se faaaliga o le alofa i le afioga a le Atua. Ou te folafola atu a o outou faitauina, o le a faamalamalamaina o outou mafaufau ma o le a siitia o outou agaga. Muamua, e foliga e faigata, peitai o le a suia lena i se suiga matagofie i manatu ma upu o mea paia.”

Peresitene Gordon B. Hinckley (1910–2008), “O Le Malamalama I Totonu Ia Te Outou,” Liahona, Iulai 1995, 112.

O Le Isi Fesili

“I nei taimi le mautonu, e faapefea ona ou tausia se uiga lelei e uiga i le lumanai?”

Auina mai lau tali a o lei oo i le aso 15 o Ianuari, 2011, i le:

Liahona, Questions & Answers 01/11

50 E. North Temple St., Rm.2420

Salt Lake City, UT 84150-0024, USA

Po o le i-meli: [e-mail]

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, ma (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lomiaina ai lau tali ma lou ata.