Ko e Ngaahi Tohi Folofolá Ko e Folofola ia ʻa e ʻOtuá

Fai ʻe JoAnn Child mo Cristina Franco

“Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí” (2 Nīfai 32:3).

ʻI he Tohi ʻa Molomoná, ʻoku fakamatala ai ʻe Līhai ki hono fāmilí ʻa ʻene misi ki he ʻakau ʻo e moʻuí. ʻI he misi ʻa Līhaí naʻá ne fakaʻamu ke kai hono fāmilí ʻi he fua ʻo e ʻakaú, ʻa ia naʻe “lelei hake ʻi he fua kotoa pē” (1 Nīfai 8:15). Naʻá ne mamata ki ha kakai tokolahi naʻa nau haʻu ʻi he hala naʻe fakatau ki he ʻakau ʻo e moʻuí, ka naʻa nau hē atu ʻi he ʻao fakapoʻulí ʻo puli mei he halá. Naʻe pīkitai ʻa e niʻihi ki he vaʻa ukamea naʻe taki atu ʻi he halá ki he fuʻu ʻakaú. Naʻa nau vivili atu ki muʻa, mo pikimaʻu ki he vaʻa ukameá kae ʻoua kuo nau aʻu ki he fuʻu ʻakaú ʻo kai mei hono fuá, pea naʻa nau fiefia ai. (Vakai, 1 Nīfai 8).

Naʻe lotu ʻa e foha ʻo Līhai ko Nīfaí ke ne ʻiloʻi ʻa hono ʻuhinga ʻo e ngaahi meʻa naʻe mamata ki ai ʻene tamaí. Naʻe fakahā kia Nīfai ʻa e misi tatau mo ʻene tamaí. Naʻe akoʻi ʻe he Laumālié kia Nīfai ʻoku fakafofongaʻi ʻe he ʻakau ʻo e moʻuí ʻa e ʻofa ʻa e ʻOtuá. Naʻe fakahā kia Nīfai ʻo ne mamata kia Sīsū Kalaisi, ko e ʻAlo ʻo e ʻOtuá, ʻokú ne akoʻi mo tāpuakiʻi e kakai ʻi he funga ʻo māmaní. Naʻe akoʻi foki kia Nīfai ʻoku fakafofongaʻi ʻe he vaʻa ukameá ʻa e folofola ʻa e ʻOtuá. (Vakai, 1 Nīfai 11.)

Ko e Ngaahi Folofolá ko e Folofola ia ʻa e ʻOtuá. ʻOku hangē ʻa hono lau ʻo e folofolá ko e pipiki ki he vaʻa ukameá. Te tau ʻilo ai ʻa e meʻa ʻoku fie maʻu ʻe Sīsū ke tau fai mo lea ʻakí. Te tau maʻu ʻa e mālohi ke tekeʻi ʻa e ʻahiʻahí pea tau ʻalu atu ki he ʻakau ʻo e moʻuí pea ongoʻi e ʻofa ʻa e ʻOtuá.◼

ʻEkitivitií

Kumi hake ʻa e ngaahi fakamoʻoni fakafolofola ʻi he peesi 65 ke ʻilo hono ʻuhinga ʻo e ngaahi meʻa naʻe mamata ki ai ʻa Līhai mo Nīfai ʻi heʻena misi ki he ʻakau ʻo e moʻuí. Kosiʻi ʻo toʻo e ngaahi fakatātaá ke vahevahe mo e niʻihi kehé ʻa e ngaahi meʻa ʻokú ke ʻiló. ʻE lava foki ke ke kole ki hoʻo mātuʻá pe ʻe lava ke ke vahevahe ʻa e talanoá ʻi he efiafi fakafāmili ʻi ʻapí.

Ngaahi tā fakatātā ʻa Dilleen Marsh

ʻAkau ʻo e Moʻuí

1 Nīfai 11:21–22

Malaʻe ʻAtaʻataá

1 Nīfai 8:20

Ngaahi ʻAo Fakapoʻulí

1 Nīfai 12:17

Vaʻa Ukameá

1 Nīfai 11:25

Kakai Manukí

1 Nīfai 8:26–27

Fale Lahi mo ʻAtaʻataá

1 Nīfai 11:35–36

Hala Fāsiʻi mo Lausiʻí

1 Nīfai 8:20

Selaia, Samu mo Nīfai

1 Nīfai 8:13-14