Kae ʻOua Ke Tau Toe Feʻiloaki
ʻIkai ʻAupito ke Liʻekina
ʻOku fakapapauʻi mai kiate au ʻe he ngaahi lea ʻa e Fakamoʻuí ʻo kau ki he ngaahi tohi māʻoniʻoní ʻoku ʻikai ʻaupito ke liʻekina kitautolu.
Naʻe faʻa fakaʻaongaʻi ʻe he ʻEikí ʻa e folofolá ʻi he taimi naʻá Ne ngāue fakafaifekau aí. Ko ia ʻoku ʻikai totonu ke tau ʻohovale ke ʻiloʻi ʻi he Fuakava Motuʻá ʻa e ngaahi veesi ne lea ʻaki ʻe he Fakamoʻuí ʻi he Fuakava Foʻoú. Ka naʻá ku ʻohovale he ʻaho ʻe taha ʻi heʻeku lau ʻa e ʻuluaki veesi ʻo e Saame 22: “ ʻE hoku ʻOtua, ʻe hoku ʻOtua, ko e hā kuó ke liʻaki ai aú?”
Kuo teʻeki ai ʻaupito ha taimi ne u fakakaukau ai naʻe lau ʻa e Fakamoʻuí mei he ngaahi tohi toputapú ʻi Heʻene lea ʻaki ʻa e ngaahi lea ko iá ʻi Heʻene mamahi he kolosí (vakai, Mātiu 27:46). Ne u maʻu leva ha mahino fakalaumālie loloto mei he fakakaukau ko iá.
Mahalo kuo ʻi ai ha taimi kuo tau mei fifili kotoa ai, “ ʻE ʻOtuá, ʻokú ke ʻi fē?” T&F 121:1 Ko e lahi taha ʻene hū mai ʻa e fehuʻi ko iá ki hoku ʻatamaí lolotonga e ngaahi momeniti ʻo e veiveiua fakalaumālié pe faingataʻaʻiá.
ʻI he ʻuhinga ko iá, ʻoku hangē naʻe fai ai ʻe he Fakamoʻuí ʻa e fehuʻí: Naʻe tupu nai ʻEne fehuʻí mei he taʻepauʻiá—pe ko e veiveiua ʻapē? Ko hono ʻuhingá nai he naʻe ʻi ai ha fehuʻi naʻe ʻikai maʻu ha tali ki ai ʻe hoku Fakamoʻui māfimafi mo tokaimaʻananga ʻi he momeniti ko ia naʻe fakafalala ai hoku fakamoʻuí ki Hono mālohí ke Ne tali e ngaahi fehuʻí hono kotoa pea ikunaʻi ʻa e meʻa kotoa pē?
Naʻe akoʻi au ʻi heʻeku lau ʻa e sāmé ni, neongo ʻoku ʻomai ʻe he ngaahi lea ko ʻeni ʻoku fakahā mai ai ʻa e “mamahi uhu fau ʻo e laumālié ʻi he ongo fakaloloma he mavahe mei he feʻao mo e langí,” ʻa ia mahalo naʻa Ne ʻamanaki pē ʻe hoko mai, kae ʻikai mahino kakato kiate Ia, ka naʻe ʻikai ko ha fakaʻilonga ia ʻo ha loto veiveiua.1
Naʻe ʻikai ngata pē ʻa e hoko ʻEne tangi ki Heʻene Tamaí ʻi he houa naʻá Ne faingataʻaʻia taha aí ʻo fakaʻaongaʻi ʻa e ngaahi lea mei he ngaahi tohi māʻoniʻoní ko ha fakamoʻoni ʻo e tuí, ka ko ha faingamālie mahuʻinga foki ia ke akoʻi ai. Neongo ʻoku kamata ʻaki ʻa e Saame 22 ha fehuʻi, ka ko hano fakahaaʻi ia ʻo ha fuʻu falala lahi ʻoku ʻikai liʻekina Ia ʻe he ʻOtuá:
“Naʻe falala ʻa ʻemau ngaahi tamaí kiate koe: naʻa nau falala, pea naʻá ke fakamoʻui ʻa kinautolu.
“Naʻa nau tangi kiate koe, pea naʻe fakamoʻui ʻa kinautolu: naʻa nau falala kiate koe, pea naʻe ʻikai te nau mā” (veesi 4–5).
ʻI hono fakaʻaongaʻi ʻo e ngaahi taukei ʻa e tangata faʻu sāmé ke tomuʻa fakalika mai ʻaki e mamahi ʻa e Fakamoʻuí, ʻoku tomuʻa fakahā mai ʻi he sāmé ʻa hono manukiá (veesi 7–8), (ʻa e fakamaau taʻetotonú mo e tautea ne hoko mai aí (veesi 11–13), ʻEne mamahi mo ʻEne faingataʻaʻiá (veesi 14), ʻEne fieinuá (veesi 15), ʻa hono fakamonuka Hono ongo nimá mo e vaʻé (veesi 16), pea mo e talotalo mo tufa Hono ngaahi kofú (veesi 18).
Neongo naʻe fakaʻaongaʻi pē ʻe he Fakamoʻuí ʻa e veesi ʻuluakí, ka ʻoku tuʻu ʻa hono toenga ʻo e sāmé ko ha fakamoʻoni ʻe taha ko Ia ʻa e Mīsaia naʻe talaʻofa maí, naʻe fakahoko ʻe Heʻene mamahí ʻa e kikité, pea naʻá Ne falala kakato ki Heʻene Tamaí.
Naʻe ʻomi ʻe he mahino ko ʻení ha fuʻu ʻilo fakapapau ki hoku laumālié naʻe ʻikai taʻeʻaonga ʻeku tuí. Ka naʻe toe mālohi ange ʻi heʻeku ʻiloʻi ko ia naʻe ʻikai ha fakaveiveiua ʻia Sīsuú ʻa e fakamoʻoni ʻi he saame ko iá ki he ngaahi taimi ne u fifili ai pe kuo liʻaki koā au ʻe he ʻOtuá pe hohaʻa hoku lotó kuo ʻikai te Ne fanongo mai ki heʻeku tangí.
“ ʻA kimoutolu ʻoku manavahē [ki he ʻOtuá], fakafetaʻi kiate ia; fakaʻapaʻapa kiate ia ʻa kimoutolu ko e hako ʻo Sēkopé; pea manavahē kiate ia ʻa kimoutolu kotoa pē ko e hako ʻo ʻIsilelí.
“He naʻe ʻikai te ne manuki pe fehiʻa ki he mamahi ʻo e mamahiʻiá [Sīsū]; pea naʻe ʻikai te ne fufū [ʻe he Tamaí] ʻa hono fofongá ʻiate ia; ka ʻi heʻene [Sīsū] tangi kiate iá, naʻá ne ongoʻi” (veesi 23–24; ko e toki tānaki atu hono fakamamafaʻí).
Ko e Fakapoʻuli ʻi he Tutukí, tā ʻe Gustave Doré