Ngaahi Tefito ʻo e Tui 1:13

13 ʻOku mau tui ʻoku totonu ke faitotonu, angatonu, sino maʻa, angalelei, anga-māʻoniʻoni, pea failelei ki he kakai kotoa pē; ko e moʻoni, ʻoku mau lava ke pehē ʻoku mau muimui ki he naʻinaʻi ʻa Paulá—ʻOku mau tui ki he ngaahi meʻa kotoa pē, ʻoku mau ʻamanaki lelei ki he ngaahi meʻa kotoa pē, kuo mau kātakiʻi ʻa e ngaahi meʻa lahi, pea ʻoku mau ʻamanaki ke mau lava ʻo kātakiʻi ʻa e ngaahi meʻa kotoa pē. Kapau ʻoku ʻi ai ha meʻa ʻoku māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí, ko e ngaahi meʻa ia ʻoku mau fekumi ki aí.

ʻOku Tau Tui

“Ko e tefitoʻi tui mahuʻinga ko [ʻení] ʻokú ne fakahaaʻi ʻetau tui fakalotú. ʻOku totonu ke tau toutou fakakaukau ki ai. Pea ka ʻi ai ha taimi ʻoku ʻahiʻahiʻi ai kitautolu ke tau fai ha faʻahinga meʻa ʻoku kovi pe kākā pe ʻuli, ʻe hū ki heʻetau fakakaukaú ha faʻahinga mālohi lahi peheni, ko ha lea te ne kāpui kotoa e tōʻonga ʻo hotau ʻulungāangá.”

Palesiteni Gordon B. Hinckley (1910–2008), “ ʻOua Naʻa Manavahē ke Fai Lelei,” Liahona, Fēpueli. 2000, 5.

Sino Maʻa

“Ko e [tōʻonga fakasekisualé] ʻoku ʻikai ko ha meʻa fakasino pē. Ko hono moʻoní, ko e angamaʻá mo e anganofó ʻoku kamata ia mei he laumālié, ka ʻoku ʻikai ʻi he sinó. ʻOkú [na] fakahaaʻi ʻa e tuʻunga hotau laumālié. ʻI he taimi ʻoku feongoongoi ai hotau laumālié pea mo e ngaahi moʻoni ʻo e ongoongoleleí, ʻoku tau loto ke moʻui ʻi ha ngaahi tuʻunga māʻolunga, pea ʻoku fakahā ʻe heʻetau ngaahi tōʻongá ʻa e holi ko iá. Ko ia, ko e angamaʻá pea mo e anganofó ʻoku ʻikai ko e fakaʻehiʻehi pē mei he tōʻonga fetuʻutaki [fakasekisuale] kimuʻa ʻi he malí pea mo e anganofo hili ʻa e malí. ʻOkú na fakahaaʻi ʻa e tuʻunga ʻo ʻetau moʻui fakalaumālié.”

Terrance D. Olson, “Ko e Ngaahi Moʻoni ʻo e Moʻui Maʻá,” Liahona, ʻOkatopa. 1999, 31.

Angalelei

Ko e angaleleí ko e angaʻofa mo e foaki, ko e foʻi lea ki aí—ko e failelei. Lolotonga e ngāue fakafaifekau ʻa Sīsū Kalaisí, naʻá Ne “faʻa feʻaluaki ʻo fai lelei, … he naʻe ʻiate ia ʻa e ʻOtuá” (Ngāue 10:38). ʻI hoʻo moʻui angaleleí, ʻe fakamālohia pea hiki hake koe ʻe he ʻOtuá.

Naʻinaʻi ʻa Paulá

Vakai, Filipai 4:8, ko e konga ʻo e tohi mei he ʻAposetolo ko Paulá ki he Kāingalotu ʻi Filipaí.

Fekumi Ki he Ngaahi Meʻá ni

Lau ʻa e konga ʻi he Ki Hono Fakamālohia ʻo e Toʻu Tupú ko e “Fakafiefiá mo e Mītiá” (peesi 17). ʻOku fenāpasi nai e fakafiefia ʻokú ke filí mo e ngaahi tuʻunga moʻui ko ʻení pea mo e tefito ʻo e tui hono hongofulu mā tolú? Fakakaukau ke ke hiki ʻi hoʻo tohinoá ʻa e founga kuo tāpuakiʻi ai koe ʻi hoʻo fili e mītia ʻoku leleí.

Angamaʻa

“Ko e angamaʻá ‘ko ha sīpinga ia ʻo e fakakaukaú mo e ʻulungāangá ʻa ia ʻoku makatuʻunga ʻi ha ngaahi tuʻunga angamaʻa ʻoku māʻolunga’ (Malangaʻaki ʻEku Ongoongoleleí, 118). ʻOku kātoi ai ʻa e angamaʻá mo e moʻui maʻá. ʻOku kamata ʻa e angamaʻá ʻi he lotó mo e ʻatamaí. … Ko e fakatahatahaʻi ia ʻo ha ngaahi fili iiki mo ha fanga kiʻi ngāue ʻe lauiafe. … ʻOku maʻu ʻe he kakai fefine mo tangata angamaʻá ha lāngilangi mo ha mālohi ʻi honau lotó. ʻOku nau maʻu ha loto falala he ʻoku nau moʻui taau ke maʻu pea tataki kinautolu ʻe he Laumālie Māʻoniʻoní.”

Elaine S. Dalton, Palesiteni lahi ʻo e Kau Finemuí “Ko ha Foki ki he ʻUlungāanga Maʻá”Liahona, Nōvema. 2008, 78–80.